Read gitonga Ezekiele 15 Bible Online

Ezekiele 15 - gitonga bible

Ezekiele 15

¹Mazu gha Ambuya ghanguza kwaku ine,

²“Mwana wa munthu, Kumbi muti wa mphereska uruska uli miti yose yinyake, mphanda ya mphereska yo ye mukati mu miti yamu lisuwa?

³Kumbi ŵatoko nkhuni kwaku wo ndi kuchita nawo kanthu ke kose? Kumbi ŵanthu ŵatoko chipharaŵaja ndi kupayikapo chiyaŵi die chose?

⁴Awona, chipong'eka ku moto kuti chiŵi nkhuni; sono asani moto wanyekeska uku ndi uku, ndi pakati viyo, kumbi chingaŵa ndi nchitu ye yose?

⁵Ehe, po chenga cha msuma, kuti chinguŵa ndi nchitu ye yose cha; ndi uli ukongwako asani moto wanyekeska ndi kupirizga, kumbi chingaŵa so ndi nchitu ye yose!

⁶Chifukwa cho atiti Ambuya Chiuta: Nge ndi nkhuni ya mphereska mukati mu miti yamu lisuwa yo ndapereka ku moto, viyo so ndimu ndiperekiyenge ŵakuja mu Yerusalemu.

⁷Ndikarazganga chisku changukumikana nawo; nanga ŵangapozomoka ku moto, kweni ndipuuli moto ukaŵarghanga; ndipo mukaziŵanga kuti ine ndine Ambuya, po ndirazga chisku changu kumikana nawo.

⁸Ndipo ndichitiskenge charu chiŵe mapopa, chifukwa ŵachita kwambura magomezgeka, atiti Ambuya Chiuta.”