Read gitonga Ezekiele 19 Bible Online

Ezekiele 19 - gitonga bible

Ezekiele 19

¹Ndipo iwe, samphuskiya mafumu ghaku Yisraele chitenje, ukambe kuti:

²Nadi, anyoko ŵenga nkharamu yinthukazi mukati mu zinkharamu! Yingugona pasi mukati mu zinkharamu za mpupuka, yaleranga ŵana ŵake.

³Yingukuzga yumoza wa ŵana ŵake; wanguŵa nkharamu ya mpupuka, yingusambira kuko nyama; yinguparuwa ŵanthu.

⁴Mitundu ya ŵanthu yingusoka kumikana nayo; yingukoreka mu mbuna yawo; ŵanguza nayo ndi zimbeja kucharu cha Egipiti.

⁵Po yinguwona kuti yasunjizgika, ndi kuti chigomezgu chathaŵa, yinguto mwana wake munyake kumusanduska nkharamu ya mpupuka.

⁶Yingwendayenda mukati mu zinkharamu; yinguŵa nkharamu ya mpupuka, yingusambira kuko nyama; yarghanga ŵanthu.

⁷Ndipo yingupankhuwa malinga ghawo ghakukho, kupasuwa misumba yawo; charu chingutenthema ndi wose ŵakuŵamo pa mazu gha kubangura kwake.

⁸Sono mitundu yinguyithyiya viŵana kosekose; ŵanguyizinga ndi mkwawu; yingukoreka mu mbuna yawo.

⁹Ŵanguyiŵika mu chipanga ndi zimbeja, ŵanguza nayo ku karonga wa Babiloni; ŵanguyitore mu nyumba ya ulinda, mwakuti mazu ghake ghareke kuvwika so pa mapiri gha Yisraele.

¹⁰Anyoko ŵanguŵa nge ndi mphereska mu munda wa mphereska, ŵanguwokeka pafupi ndi maji, ŵakupasa vinandi, ŵakuŵa ndi mphanda zinandi, chifukwa cha unandi wa maji.

¹¹Muti wake wanthazi ukongwa unguŵa ndodo ya wakweruzga; ungukwere kuchanya ukongwa mukati mu mphanda zakunyekezgana; wunguwoneka mu utali wake pamoza ndi unandi wa mphanda zake.

¹²Kweni mphereska yinguzuwika mu ukari, yingupong'eka pasi; mphepo yakutuwa ku vuma yinguyimizga; chipasi chake chingupurutuka, muti wake wanthazi ungufota; moto unguwupirizga.

¹³Sono ukuwokeka mu bozwa, mu charu cha kumira ndi chachiparamba.

¹⁴Ndipo moto watuwa mu liŵavu lake, wapirizga mphanda ndi vipasi vyake, mwakuti kuti wajamo so muti wanthazi cha, ndodo ya chifumu ya wakweruzga mulivi. Ichi nchitenje, ndipo chaŵa chitenje mbwenu.