Read gitonga Ezekiele 24 Bible Online

Ezekiele 24 - gitonga bible

Ezekiele 24

¹Pa zuŵa la chumi, la mwezi wa chumi, mu chirimika cha chinkhonde ndi chinayi, mazu gha Ambuya ghanguza kwaku ine:

²“Mwana wa munthu, ulembe zina la zuŵa ili, inya zuŵa lenili ili. Karonga waku Babiloni wagoŵa ku Yerusalemu zuŵa lenili.

³Kamba ntharika ku nyumba ya chigaruka uŵanene kuti, ‘Viyo atiti Ambuya Chiuta: Jarikapo mumphika, jarikapo, udemo maji:

⁴ŵikamo mathuŵi gha nyama, mathuŵi ghose ghamampha, chigha ndi mkono; uzazemo viwanga vyakusankhika.

⁵Utoko chakusankhika chavyakuŵeta, uwunjike mulu wa nkhuni kusi kwake; ubike mathuŵi ghake, viwanga vyake navyo vipwapwatenge nwenimo.’

⁶“Chifukwa cho atiti Ambuya Chiuta: Soka lo msumba wa ndopa, ku mumphika wo wachita uloso, weniwo uloso wake kuti waturiya kubwalo cha! Tuzganimo thuŵi ndi thuŵi, kwambura kusankha cha.

⁷Chifukwa ndopa zo wakudiska zeche mukati mwake; wanguzinika pa jarawi, kuti wanguzidira pasi kuti waziwundi ndi fuvu cha.

⁸Kuyuska ukari wangu, kuwezge thayu, ndopa zo wangudiska ndazinika pa jarawi, mwakuti zireke kuwundika.

⁹Chifukwa cho Ambuya Chiuta watiti; Soka lo ku msumba wa ndopa! Ine nani so ndikachitanga mulu ukuru.

¹⁰Unjika nkhuni, pemba noto, bika umampha nyama, ubuwe yo yafya, viwanga vifye.

¹¹Sono jarika mumphika wambura kanthu pa maka, alinga kuti ufye, ndipo mkuŵa wake ufye, mwakuti kufipa kwake kusongonokemo, uloso wake umare.

¹²Ndajivukiska kwa waka, chingana ndi moto kuti utuzgamo kugandirwa kwa uloso wake cha.

¹³Uloso wake nkhufipiskika kwa ukazuzi wako. Chifukwa ndingwesa kukusuka kuti ungutozgeka cha kukufipirwa kwako, ndipo kuti ukatozgekanga so cha mpaka penipo ine ndakhorwa ndi kukara kwangu paku iwe.

¹⁴Ine Ambuya ndarongoro; kukachitikanga, ndikachichitanga; kuti ndikaweriyanga kuvuli cha, kuti ndikarekeliyanga, pamwenga kugowoka nako so cha, kwakulingana ndi nthowa zako ndi machitidu ghako ndikakweruzganga, atiti Ambuya Chiuta.”

¹⁵Ghangundiziya so mazu gha Ambuya:

¹⁶“Mwana wa munthu, awona, nde pafupi kutuzgako likondwa ku maso ghako kwamabuchibuchi; kweni ureke kutenje pamwenga kuliya nanga nkhudiska masozi.

¹⁷Fwifwinthiya, kweni kwakuvwika cha; kuchita kutenjere wakufwa cha. Manga chilemba chako, vwara viyato vyako; ungajaranga milomo yako cha, nanga nkhurgha chiŵande cha ŵakutenje.”

¹⁸Viyo ndingukamba ku ŵanthu ndi mlenji, ndipo ku mazulo muwoli wangu wangufwa. Ku mlenji unyake ndinguchita nge ndi mwenimo ndingulangulikiya.

¹⁹Ndipo ŵanthu ŵangunena nane, “Kumbi kuti ukatikambiyanga cha cho vinthu ivi vititing'anamuliya, po iwe uchita viyo?”

²⁰Ine ndingunena nawo, “Ghangundiziya mazu gha Ambuya:

²¹‘Kamba ku nyumba yaku Yisraele, Viyo atiti Ambuya Chiuta: Ehe, ndikafipiskanga malo ghangu ghakupaturika, kujikuzga kwa mazaza ghamu, likondwa la maso ghinu, ndi linweka la mzimu winu; ndipo ŵana ŵinu ŵanthurumi ndi ŵanthukazi wo mwaŵasiya kuvuli ŵakabayikanga ndi lipanga.

²²Imwe mukachitanga mo ine ndachitiya kuti mukajaranga milomo yinu cha, pamwenga kurgha vya ŵakutenje.

²³Vilemba vikaŵanga ku mitu yinu, viyato ku marundi ghinu; kuti mukatenjenga nanga nkhuliya cha, kweni mukawondanga mu kwananga kwinu ndi kutamantha yumoza ku munyake.

²⁴Viyo ndimu Ezekiele wakaŵiyanga chisimikizgu kwaku imwe, mukachitanga kwakulingana ndi vyose vyo iyo wachita. Chitakuti chafika ichi, penipo ndipo mukaziŵanga kuti Ine ndine Ambuya Chiuta.’

²⁵“Ndipo iwe, mwana wa munthu, pa zuŵa lo ndikatuzgiyangapo malinga ghawo, chimwemwe ndi unkhankhu wawo, likondwa la maso ndi linweka la mitima yawo, ndipo so ŵana ŵawo ŵanthurumi ndi ŵanthukazi,

²⁶yo wapozomoka mu zuŵa leniliya ndiyo wakazanga kwako kuzachikunene makani.

²⁷Pa zuŵa liya mlomo wako ukajurikiyanga kwaku yo wapozomoka, ukarongoronga kuti ukaŵanga so wambuwu cha. Viyo ukaŵanga chisimikizgu kwaku iwo; ndipo ŵakaziŵanga kuti ndine Ambuya.”