Read gitonga Ezekiele 27 Bible Online

Ezekiele 27 - gitonga bible

Ezekiele 27

¹Mazu gha Ambuya ghanguza kwaku ine:

²“Sono iwe, mwana wa munthu, buska chitenje paku Turo,

³munene Turo, yo waja pakuserere ku nyanja, wa maronda wa ŵanthu ŵamu malikumba ghanandi gha nyanja, viyo atiti Ambuya Chiuta: Awe Turo, wakamba kuti, ‘Ine nde wakutowa kwakufikapo.’

⁴Mphaka zako ze mukati imo mwazinyanja; ŵazengi ŵako ŵakukuzenga wakunozga.

⁵Ŵangucheka mathabwa ghako ghose gha milombwa yaku Seniri; ŵanguto sidara kutuwa ku Lebanoni kukuchitiya mlongoti.

⁶Miti ya mung'ona yaku Bashani ndiyo ŵangukuseme zinkhafu; malo ghako ghakujapo ghapachanya ŵangughakhoma ndi mathabwa gha muŵaŵa ghakutuwa ku malikumba ghaku Kupro, ghakunozgeka ndi tuminyanga twa njovu.

⁷Saru za bafuta za kujeduka zaku Egipiti, ndizu zenga mathanga ghako, zachitanga nge ndi mbendera yako; za bulu ndi zakufyuŵara zakutuwa kumalikumba ghaku Elisha ndizu zenga chivwinkhu chako.

⁸Ŵakuja mu Sidoni ndi Arvada ndiwo ŵenga ŵamlima nyanja; ŵanthu ŵazeru ŵaku Zemere ŵenga mwaku iwe, ndiwo ŵenga ŵakwendeska zingaraŵa.

⁹Ŵara-ŵara ŵaku Gebala ndi ŵanthu ŵawo ŵazeru ŵenga mwaku iwe, ŵenga ŵakusindiya marunga gha ngaraŵa; ngaraŵa zose za mu nyanja pamoza ndi ŵakuteŵeta ŵawo ŵenga mwaku iwe, kugulana maronda ghako.

¹⁰“Perese, Ludi ndi Puti ŵenga mu nkhondo yako ngembanthu ŵakurwa nkhondo; ŵangupayika nguru ndi chisoti mwaku iwe; ŵangukupaska lumbiri.

¹¹Ŵanthu ŵaku Arvada ndi Heleki ndiwo ŵanguzingirizga malinga ghako ndipo ŵanthu ŵaku Gamada ŵenga mu vitanthali vyako; ŵangukoroŵeka nguru zawo kuzingirizga malinga ghako; ŵangukutoweska kwakufikapo.

¹²“Tarshishi wanguchita nawe maronda chifukwa cha usambasi wako unandi wa mtundu mtundu; siliva, chisulo, tini, ndi muthovu wo ŵangusinthiskana ndi maronda ghako.

¹³Javani, Tubala, ndi Mesheke ŵanguchita nawe maronda; ŵanguguliskana ŵanthu ndi viyaŵi vya mkuŵa mu maronda ghako.

¹⁴Bete-togarma wanguguliskana maronda ndi iwe ndi ŵakavalo, ŵakavalo ŵankhondo, ndi nyulu.

¹⁵Ŵanthu ŵakuRodo ŵanguchita nawe maronda; malikumba ghanandi gha nyanja ghenga misika yako yakuziŵikwa, pakuzachikulipa iwe ŵangukupingiya minyanga ya njovu ndi miti ya mbawa.

¹⁶Edomu wanguchita nawe maronda chifukwa cha vyamampha vyako vinandi; wangugulana nawe mya yakuzirwa, vyakufyuŵara, vya maŵanga-maŵanga bafuta wakutowa, malikorombe, ndimya yiyera yakuzirwa.

¹⁷Yuda ndi Yisraele ŵanguchita nawe maronda; ŵangugulana nawe trigu, ma olive ndi nkhuyu za mruwuku, uchi, mafuta, ndi mankhwala ghakuchizgiya.

¹⁸Damasko wanguchita nawe maronda chifukwa cha usambasi wako ukuru mu vinthu vyose; vinyo waku Helboni, ndi weya utuŵa,

¹⁹vinyo waku Uzala ŵangusinthiskana ndi maronda ghako; visulo vya kusula, kasia, ndi Kalamusi ndivyo vyenga vyakugulana mu maronda ghako.

²⁰Dedani wangugulana nawe maronda mu vyakuvwara vyakuŵika pa vyakugarapo.

²¹Arabia ndi mafumu ghose ghaku Kedara ndiwo ŵenga ŵa maronda ŵakukhumbikwa ukongwa chifukwa cha mberere, ŵabira, ndi mbuzi; mwaku ivi ndimo ŵanguchita nawe maronda.

²²Ŵa maronda ŵaku Sheba ndi Rama ŵangugulana nawe; ŵangusinthiskana nawe ndi vyakuzirwa vyakununkhira vya mtundu mtundu, ndi vya mya yose yakuzirwa, ndi golide.

²³Harani, Kane, Edeni, Ashuru ndi Kilmada ŵanguchita nawe maronda.

²⁴Aŵa ŵangugulana ndi iwe mu vyakuvwara vyakusankhika, mu saru za bulu ndi za maŵanga-maŵanga, ndi mikeka ya milala ya mitundumitundu, yakukurungika ndi vingwe vyakukhozge mumphepete; mwaku ivi ndimo ŵanguchita nawe maronda.

²⁵Ngaraŵa zaku Tarshishi zingukwende chifukwa cha maronda ndi iwe. Viyo unguzazika ndi katundu munandi mukati mu zinyanja.

²⁶Ŵamlima nyanja ŵako ŵangukutore iwe mu nyanja zikuru. Mphepo yaku vuma yakufyore mukati mu zinyanja.

²⁷Usambasi wako, vyuma vyako, ndi maronda ghako gha vyakugulana, ŵakwendeska ndi ŵarongozgi ŵa ngaraŵa, ŵakusindiya ngaraŵa, ŵakugula maronda ghako, ŵanthu ŵako wose ŵankhondo wo ŵe ndi iwe, pamoza ndi mzinda wose wo we mukati mwako, mudodome mukati mu zinyanja pa zuŵa la kupasuka kwako.

²⁸Pa chibumuzi cha kuliya kwa ŵarongozgi ŵa ngaraŵa charu chisukunika,

²⁹kutuliya pasi pa ngaraŵa zawo wose ŵakuvuŵa nkhafu. Ŵakwendeska pamoza ndi wose ŵakurongozga ngaraŵa mu nyanja ŵaza ŵama pa likumba.

³⁰Ŵatenje kwakubongo paku iwe, kuliya kwakuŵaŵa mtima. Kudira fuvu ku mitu yawo ndi kugadabuka mu vyoto;

³¹ŵajimeta maphara chifukwa chaku iwe, kujivwarika vigudulu, ŵaliriya paku iwe mwakuŵaŵa kwa mtima, ndi kutenje kwa kupweteka.

³²Mukukunkhuruka kwawo ŵasoka chitenje paku iwe, watenjere iwe: ‘Njani yo wakupasukapo kali nge ndi Turo mukati mu nyanja?

³³Ghachiza maronda ghako kutuwa mu zinyanja, ungugutiska ŵanthu ŵanandi ukongwa; ndi uzali wa usambasi wako ndi maronda ghako ungusambasiska ŵakaronga ŵa charu.

³⁴Sono wasweke mu nyanja, mu zindimba za maji; ŵamaronda ndi ŵamlima Nyanja wose ŵaliriya pamoza nawe.

³⁵Wose ŵakuja mu malikumba gha nyanja ŵazizwa paku iwe; ndipo ŵakaronga ŵawo ŵe mu mantha ghakuru, visku vyawo vyang'anamuka.

³⁶Ŵamaronda woŵe mukati mu ŵanthu ŵatukumbiya twa kayuzi; wafika ku umari wakofya ndipo kuti ukaŵangapo so cha muyaya.’ ”