Read gitonga Ezekiele 28 Bible Online

Ezekiele 28 - gitonga bible

Ezekiele 28

¹Mazu gha Ambuya ghanguza kwaku ine:

²“Mwana wa munthu, kamba ndi karonga waku Turo, Viyo atiti Ambuya Chiuta: Chifukwa cha kujikuzga kwa mtima wako, ndipo wakamba kuti ‘Ndine chiuta, ndija pa chitengo cha ŵachiuta, mukati mu zinyanja,’ kweni ndiwe munthu, kuti we chiuta cha, nanga wamweni utijipima kuŵa wazeru nge ndi chiuta.

³Inya wendi zeru nadi kuruska Danyele; kulivi kakubisika kwaku iwe;

⁴mu zeru yako ndipo ndi mukuwamo kwako wajisambasiska wamweni, waunjika golide ndi siliva mu vyakusungamo vyuma;

⁵ndi chinjeru chako chikuru mumaronda wandaniska mausambasi ghako, viyo mtima wako waŵa wakujikuzga mu usambasi wako;

⁶viyo atiti Ambuya Chiuta: Pakuti utijighanaghana kuŵa wazeru nge ndi chiuta:

⁷chifukwa cho, ehe, ndizenge ndi ŵalendo paku iwe, ŵakofya ukongwa mu mitundu; ŵakawewepuwanga malipanga ghawo kumikana ndi unozgi wa zeru yako ndipo ŵakafipiskanga kugadima kwako.

⁸Ŵakakusiskiyanga pasi pa Zenje, ndipo ukafwanga nyifwa yaŵakubayika mukatikati mu zinyanja.

⁹Kumbi ukakambanga mbwenu kuti, ‘Ndine chiuta,’ mu maso gha ŵakukubaya wo, po iwe munthu ŵaka, kuti we chiuta cha, mu manja ghaku wo ŵatukupweteka?

¹⁰Ukafwanga nyifwa ya ŵambura kuchinjika ndi janja la ŵalendo, pakuti ndarongoro, atiti Ambuya Chiuta.”

¹¹Ndipo so mazu gha Ambuya ghanguza kwaku ine,

¹²“Mwana wa munthu, buska chitenje pa karonga waku Turo, umunene kuti, Viyo atiti Ambuya Chiuta, ‘Iwe unguzighirika chifukwa cha umampha wakufikapo, wakuzala vinjeru wakutowa mu utozi.

¹³Unguŵa mu Edeni, mu munda waku Chiuta; mya yose yakuzirwa yenga chakuvwinkha chako, karneliani, topazi, jaspere, krusolite, berulo, ndi onike, safire, karbanike, ndi emaraldi; vyakujarika ndi vyakuchita kuzganga vinguchitika ndi golide. Pa zuŵa lo iwe ungulengeke ivi vingurongosoleke.

¹⁴Pamoza ndi kerubi mlinda wakupakika, ndingukuŵika iwe, iwe wenga pa phiri lituŵa laku Chiuta, ungwenda mukati mu mya ya moto.

¹⁵Unguŵa wambura kalema munthowa zako kutuwa muzuŵa lo ungulengeke, mpaka po kulakwa kungusanirikiya mwaku iwe.

¹⁶Mukwandana kwa maronda ghako unguzazika ndi nkhaza, reka ungulakwa; chifukwa cho ndingukutaya nge nchinthu chakukazuzgika kutuwapo pa phiri laku Chiuta, ndipo kerubi mlinda yo wangukudikiska kukutuzga mukati mu mya ya moto.

¹⁷Chifukwa cha kutowa kwako mtima wako ungujikuzga; unguvundiska vinjeru vyako chifukwa cha kugadima kwako. Ndingukupong'a pasi; ndingukujarika nkhuli paurongo pa ŵakaronga, kugutiska maso ghawo paku iwe.

¹⁸Pa chifukwa cha unandi wa maubendezi ghako, kureka kuchita urunji mu maronda ghako ungukazuzga malo ghako ghakupaturika; viyo ndingutuzga moto mukati mwako; wo ungukupirizga, ndipo ndingukusanduska choto pa charu mu maso ghaku wose wo ŵangukuwona.

¹⁹Wose wo ŵatikuziŵa mukati mu ŵanthu ŵazizwa nawe; wafika ku umari wakofya ndipo kuti ukaŵangapo so cha muyaya.’ ”

²⁰Ghangundiziya so mazu gha Ambuya:

²¹“Mwana wa munthu, razga maso ghako ku Sidoni, ndi chima paku iyo.

²²Kamba kuti, Viyo atiti Ambuya Chiuta: “Ehe, ndimikana nawe, Sidoni, ndikavumbuwanga unkhankhu wangu mwaku iwe. Ndipo ŵakaziŵanga kuti ine ndine Ambuya, po ndifiska vyeruzgu vyangu mukati mwake, ndi kuvumbuwa utuŵa wangu mwaku iyo;

²³chifukwa ndikamutumiyanga chideru, ndi ndopa mu ŵagurwi ŵake; ndipo ŵakubayika ŵakawanga mukati mwake, ndi lipanga lo lamikana nayo mose mose. Penipo ndipo ŵakaziŵanga kuti ine ndine Ambuya.

²⁴“Ndipo pa nyumba yaku Yisraele kuti pakaŵanga so kankhandi wakulasa pamwenga munga wakuŵapweteka cha mukati muŵa kuzengezgana ŵawo wose wo ŵanguŵayuyuwa. Penipo ndipo ŵakaziŵanga kuti ndine Ambuya.

²⁵“Viyo atiti Ambuya Chiuta: Penipo ndikaunganiskanga nyumba yaku Yisraele kutuwa mukati mu ŵanthu mwaku ŵeniwo akuparghang'ikiyamo, ndikuvumbuwa utuŵa wangu mwaku iwo mu maso gha ŵa mitundu, po ndipo ŵakajanga mu charu chawo ndi chawo cho ndikupaska ku mteŵeti wangu Yakobe.

²⁶Ndipo ŵakajangamo kwakufwasa, ŵakazenganga zinyumba ndi kupanda mphereska. Ŵakajanga kwakufwasavi, po ndifiska vyeruzgu paku wose ŵakuzengezgana ŵawo wo ŵanguŵayuyuwa. Sono penipo ndipo ŵakaziŵanga kuti ine ndine Ambuya Chiuta wawo.”