Read gitonga Ezekiele 29 Bible Online

Ezekiele 29 - gitonga bible

Ezekiele 29

¹Pa zuŵa la chumi ndi ghaŵi, mwezi wa chumi, mu chirimika cha chumi, ghangundiziya mazu gha Ambuya:

²“Wa mwana wa munthu, razga chisku chako kwaku Farao karonga wa Egipiti, uchime kumikana nayo pamoza ndi Egipiti yose,

³kamba, unene kuti, viyo atiti Ambuya Chiuta: Awona, ndimikana nawe, Farao karonga wa Egipiti, nchalinda mukuru yo wagona mukati mu misinji yake, yo watiti, ‘Nile wangu, ngwakundamweni; ndikumulenga ndine.’

⁴Ndiŵikenge zimbeja mu vibwanyo vyako, ndikubatikiska somba zamu misinji yako mu mamba ghako; ndipo ndikakuzuwuwanga kukutuzga mukati mu misinji yako, pamoza ndi somba zose zamu misinji yako zo zabatika mu mamba ghako.

⁵Ndipo ndikakupong'anga mu mapopa, iwe pamoza ndi somba zamu misinji yako; wamukuwa mu dondo pakwero kuti ukawunjikikanga chingana nkhuŵikika cha. Ndakupereka kuŵa chakurgha cha vinyama vya charu ndi viyuni vya mude.

⁶“Penipo ndipo wose ŵakuja mu Egipiti ŵakaziŵanga kuti ine ndine Ambuya. Chifukwa chovyo cho iwe unguchita kuŵa Yisraele chinguŵa nge ndi ndodo ya dete,

⁷wamweniwe pakukuko, ungufyoka, ndipo ungulasa maphewa ghawo ghose, po ŵangunyekezga paku iwe, ungufyoka, ndipo viunu vyawo vyose unguvisukuniska;

⁸chifukwa ichi atiti Ambuya Chiuta: Ehe, ndikazanga ndi lipanga paku iwe, kudumuwako kwaku iwe munthu ndi nyama,

⁹ndipo charu cha Egipiti chikaŵanga phasulu ndi mapopa. Sono ndipo ŵakaziŵanga kuti ine ndine Ambuya. “Chifukwa iwe unguti, ‘Nile ngwangu, ndingumwata ndine,’

¹⁰mu chifukwa cho, awona ndimikana nawe, ndimikana ndi misinji yako, ndikasanduskanga charu cha Egipiti mapopa yigho ndi phasulu, kutuwa ku Migdolo mpaka ku Siyene, kurutiliya ku mphaka yaku Etiopia.

¹¹Kuti rikaporotangamo rundi la munthu pamwenga la nyama cha; chikaŵanga charu chambura wakujamo kwa virimika machumi ghanayi (40).

¹²Ndipo ndikachitiskanga charu cha Egipiti phasulu mukati mu vyaru vya phasulu; ndi mizi yake yikaŵanga mapopa mukati mu mizi ya mapopa kwa virimika machumi ghanayi, ndimbininiskiyenge ŵaEgipiti mukati mu mitundu, ndikuŵaparghang'iya mukati mu vyaru.

¹³“Pakuti Ambuya Chiuta atiti: Pavuli pa virimika machumi ghanayi, ndikawunjikanga ŵaEgipiti kutuwa mu ŵanthu wo ndinguŵambininiskiyamo;

¹⁴ndipo ndikawezgiyanga umampha pa Egipiti, ndi kuŵawezge so mu charu cha Patrosi, charu cha kawi kawo; ndipo kwenikuwa ŵakaŵanga ufumu wakupepuka.

¹⁵Inya ukaŵanga ufumu wakupepuka kuruska ma ufumu ghanyake, ndipo kuti ukajikwezgiyanga so pachanya pa mitundu cha; ndiŵachefyenge ukongwa mwakuti ŵareke kuusa so pachanya pa mitundu.

¹⁶Ndipo kuti wakaŵanga so chigomezgu cha nyumba yaku Yisraele cha, ichi chikaŵanga chikumbusku pa mauheni ghawo, ŵachiwere ku Egipiti kupenja chovyo. Sono ndipo ŵakaziŵanga kuti ine ndine Ambuya Chiuta.”

¹⁷Pa zuŵa lakudanga la mwezi wakudanga, mu chirimika cha machumi ghaŵi pachanya vinkhonde ndi viŵi, mazu gha Ambuya ghanguza kwaku ine:

¹⁸“Mwana wa munthu, Nebukadanezara karonga wa Babiloni, wakuŵagwiriska nchitu ukongwa ŵankhondo ŵake kumikana ndi Turo; mutu wa munthu yose unguchita phara ndipo pa phewa paku we yose pangukulika; kweni kutuwa iyo mweneko chingana mba nkhondo ŵake kuti ŵangusaniya mphoto kutuwa ku Turo cha kulipa nchitu yo wanguchita pa kumikana nayo.

¹⁹Chifukwa cho Ambuya Chiuta atiti: Awonani, ndikaperekanga charu cha Egipiti kwaku Nebukadanezara karonga waku Babiloni; wakayoranga usambasi wake wose, kuwuskoŵa ndi kuwukwamphuwa; ndipo ndi wo wamukuwa mphoto ya ŵankhondo ŵake.

²⁰Ndamupaska charu cha Egipiti ngendi mphoto yake yo wangutakatakiya, chifukwa wangutakatakiya ine, atiti Ambuya Chiuta.

²¹“Pa zuŵa leniliya nkhaŵikanga mazaza ghatumphuke mu fuku laku Yisraele, ndipo ndikajuranga milomo yako mukati mwawo. Penipo ndipo ŵakaziŵanga kuti ine ndine Ambuya.”