Read gitonga Ezekiele 30 Bible Online

Ezekiele 30 - gitonga bible

Ezekiele 30

¹Ghangundiziya mazu gha Ambuya:

²“Mwana wamunthu, chima, ukambe kuti, Viyo atiti Ambuya Chiuta: Liya ukongwa, ‘Owe zuŵa lo!’

³Pakuti zuŵa laŵandika, zuŵa la Ambuya laŵandika; likaŵanga zuŵa la mitambo, nyengo ya soka ku mitundu.

⁴Lipanga likazanga pa Egipiti, urwirwi ukaŵanga mu Etiopia, penipo ŵakubayika ŵawa mu Egipiti, po usambasi wake wayoreka, ndipo viŵanja vyake vyawiskika pasi.

⁵Etiopia, Puti, Ludi, wose ŵa Arabia, ndi Libiya ndi ŵanthu ŵamu vyaru vyo ŵazomerezgana navyo, ŵakabayikiyanga pamoza nawo ndi lipanga.

⁶“Viyo atiti Ambuya: Wo ŵazomerezgana ndi Egipiti ŵakawanga, ndipo kujikuzga kwake kwa nthazi kukasiskikiyanga pasi; kutuwa ku Migdolo mpaka ku Siyene ŵakawanga ndi lipanga mukati mwake, atiti Ambuya Chiuta.

⁷Ndipo wakaŵanga phasulu mukati mu vyaru vya phasulu mizi yake yikaŵanga mapopa mukati mu mizi ya mapopa.

⁸Sono ndipo ŵakaziŵanga kuti ndine Ambuya, asani ndapemba moto pa Egipiti, ndikuti wose ŵakumovya ŵabwanganduka.

⁹“Mu zuŵaliya mathenga gha mankharo ghakarutanga kutuwa kwaku ine kwachiŵawofya ŵa Etiopia ŵambura kuphwereko; ndipo pa zuŵa la soka la Egipiti urwirwi ukazanga paku iwo; pakuti, ehe, lituza!

¹⁰“Viyo atiti Ambuya Chiuta: Ndimarizgenge usambasi wa Egipiti, ndi janja laku Nebukadanezara karonga waku Babiloni.

¹¹Iyo ndi ŵanthu ŵake pamoza nayo, mtundu wakofya kwakuruska, ŵakazanga kuzachiparghang'a charu; ndipo ŵakawe wepuwanga malipanga ghawo kumikana ndi Egipiti, charu chikazazanga ŵakubayika.

¹²Ndikamuskenge Nile, ndikuguliska charu mu manja gha ŵanthu ŵa mphurupuru; ndizenge ndi phasulu mu charu ndi paku chose cho chirimo, ndi janja la ŵalendo; ine, Ambuya, ndarongoro.

¹³“Viyo atiti Ambuya Chiuta: Ndiparghang'enge ŵangoza, ndikurekeska vikozgo mu Mefisi; kuti mukaŵanga so fumu cha mu charu cha Egipiti inya ndiŵikengemo mantha mu Egipiti.

¹⁴Patrosi ndikamusanduskanga phasulu, ndi kupong'a moto ku Zoani, ndipo ndikafiskanga nchitu za cheruzgu pa Tebesi.

¹⁵Ndipo ndikapunguliyanga ukari wangu pa Pelusimu, linga lakukho la Egipiti, ndi kudumuwako mzinda wa Tebesi.

¹⁶Ndipembenge moto mu Egipiti; Pelusimu wakaŵanga mu soka likuru; Tebesi wakabwangandukanga, malinga ghake ghakawiskikanga.

¹⁷Ŵanyamata ŵamu Ono ndi ŵamu Pibeseti ŵakabayikanga ndi lipanga; ŵanthukazi ŵakarutanga ku umkoli.

¹⁸Pa Tehafenesi lumwi likaŵanga mdima, po ndiphwanya ufumu wa Egipiti kwenikuwa, ndipo nthazi ya kujikuzga kwake yikamaranga; wakabenekerekanga ndi mtambo, ŵana ŵake ŵanthukazi ŵakarutanga ku umkoli.

¹⁹Viyo ndimu ndikafiskiyanga nchituza cheruzgu pa Egipiti. Penipo ndipo ŵakaziŵanga kuti ine ndine Ambuya.”

²⁰Pa zuŵa la chinkhonde ndi chiŵi, mwezi wakudanga, mu chirimika cha chumi ndi chimoza, ghangundiziya mazu gha Ambuya:

²¹“Mwana wa munthu, ndafyo janja laku Farao karonga wa Egipiti; sono awona, kuti lamangika cha mwakuti lipo, kulimanga ndi bandeje, alinga kuti liŵi lanthazi pakuko lipanga.

²²Chifukwa cho atiti Ambuya Chiuta: Awona, ndimikana ndi Farao, karonga wa Egipiti, ndikaphwanyanga manja ghake ghose ghaŵi, lanthazi ndiliya lakufyoka kali; ndipo ndiwiskiyenge pasi lipanga la mujanja lake.

²³Ndikambininiskiyanga ŵaEgipiti mu mitundu, ndi kuŵaparghang'iya mu vyaru.

²⁴Ndikalimbiskanga manja gha karonga waku Babiloni, ndiŵikenge lipanga langu mu janja lake; kweni manja ghaku Farao ndikafyonga, ndipo wakatamanthanga nge ndi munthu yo walasika kwa nyifwa.

²⁵Ndikakhozganga manja gha karonga waku Babiloni, kweni manja ghaku Farao ghakawanga; ndipo ŵakaziŵanga kuti ndine Ambuya. Penipo ndikaperekanga lipanga langu mu janja la karonga waku Babiloni, wakalinyoroskiyanga pa charu cha Egipiti;

²⁶ndikaparghang'iyanga ŵaEgipiti mu mitundu ndi kuŵambininiskiya mu vyaru. Sono ndipo ŵakaziŵanga kuti ine ndine Ambuya.”