Read gitonga Ezekiele 35 Bible Online

Ezekiele 35 - gitonga bible

Ezekiele 35

¹Mazu gha Ambuya ghanguza kwaku ine:

²“Mwana wa munthu, razga chisku chako pa phiri Seiri uchimi kumikana nalo,

³ukambe kuti, Viyo atiti Ambuya Chiuta: Ehe, wa phiri la Seiri, ndimikana nawe, nditambaluriyenge janja langu paku iwe, ndipo ndikakusanduskanga phasulu ndi mapopa.

⁴Ndipasuwenge mizi yako, ukaŵanga phasulu, ndipo ukaziŵanga kuti ine ndine Ambuya.

⁵Chifukwa unguŵa ndi kutinkha kwa muyaya, ungupereka ŵaYisraele ku nthazi ya uyi wa lipanga mu nyengo ya soka lawo, pa nyengo ya kulangika kwawo kwakumariya;

⁶mu chifukwa cho, mo ndiliri wamoyo, atiti Ambuya Chiuta, ndikakurongosoliyanga ku ndopa, ndopa zikakurondonga; pakuti wasuskika ndi ndopa, chifukwa cho ndopa zikakurondonga.

⁷Ndilisanduskenge mapopa ndi phasulu phiri la Seiri; ndipo ndikadumuwangako wose wo ŵatuza ndi kuruta.

⁸Ndizazenge mapiri ghako ndi ŵakubayika, mu mitunthu yako ndimu madambo ghako ndi muvinkhwawu vyako vyose ŵakubayika ndi lipanga ŵakawangamo.

⁹Ndikakusanduskanga phasulu la muyaya, ndipo misumba yako kuti yikaŵanga ndiŵakujamo cha. Penipo ndipo ukaziŵanga kuti ine ndine Ambuya.

¹⁰“Chifukwa iwe unguti, ‘Mitundu iyi yiŵi ndi vyaru ivi viŵi vikaŵanga vyangu, ndikaviharanga’ nanga Ambuya ŵenga kwenikuwa

¹¹chifukwa cho, mo ndiliri wamoyo, atiti Ambuya Chiuta, chifukwa cha ukari ndi sanji yo ungurongo, chifukwa cha tinkhu lako lo unguŵa nalo paku iwo, ine ndikachitanga nawe kwakukozgana, ndikajiziŵiskanga mukati mwako, pakukweruzga.

¹²Sono po ndipo ukaziŵanga kuti ine, Ambuya, ndavwa kutemba kwako kose ko ungutemba, kuti, ‘Mapiri gha Yisraele ghaŵa phasulu, ndipo ghapaskika kwaku ifwe kuti tigharghe.’

¹³Ndipo iwe ungujikwezga paku ine ndi milomo yako, ungwandaniska mazu ghako kumikana nane, ine ndingughavwa.

¹⁴Viyo atiti Ambuya Chiuta: Mwakuti charu chose cha pasi chikondwe, ndikakusanduskanga iwe phasulu.

¹⁵Nge ndimo iwe ungukondwe pa chihara cha nyumba yaku Yisraele, po yinguŵa phasulu, viyo ndimu ndikachitiyanga nawe; ukaŵanga phasulu, phiri la Seiri, ndi Edomu yose, yose teteti. Penipo ndipo ŵakaziŵanga kuti ine ndine Ambuya.”