Read gitonga Ezekiele 37 Bible Online

Ezekiele 37 - gitonga bible

Ezekiele 37

¹Janja la Ambuya linguŵa paku ine, ndipo angundituzgiya kubwaro mu Mzimu wa ambuya, ndi kundijarika pasi mukati mu dambo, linguzaza ndi viwanga.

²Ndipo angundirongozga kwakuvizunguliya vyo; ehe, vyenga vinandi ukongwa mu dambo, ndipo awonani, vyenga vya kumira kwakufikapo.

³Ndipo angunena nane, “Mwana wa munthu, kumbi viwanga ivi vingaŵa so ndi umoyo?” Ine ndinguti, “A, Ambuya Chiuta muziŵa ndimwe.”

⁴Angunena nane, “Chima ku viwanga ivi, uvinene kuti, Owe mwa viwanga vya kumira, vwani mazu gha Ambuya.”

⁵Viyo atiti Ambuya Chiuta ku viwanga ivi: “Ehe, ndikserezganga mvuchi mwaku imwe, ndipo mukaŵanga ŵamoyo.

⁶Ndikaŵikanga misipi mwaku imwe, ndikawerezgiyanga mnofu paku imwe, ndi kukuburumutizgani ndikhungu, ndi kuserezga mvuchi mukati mwinu, mukaŵanga ŵamoyo, ndipo mukaziŵanga kuti ine ndine Ambuya.”

⁷Viyo kwakulingana ndimo ndingulangulikiya ndinguchima, ndipo po ndachimanga, kunguŵa chiwawa, avwani, mphokotophokotu, viwanga vinguza pamoza, chiwanga kulunga ku chiwanga.

⁸Ndipo ndichilereska, ndinguwona misipi, ndi minofu yinguzamo mwaku vyo, ndi khungu linguviburumutizga, kweni mvuchi ndiwo mwengavi.

⁹Sono angunena nane, “Chima ku mvuchi, chima, wa mwana wa munthu, unene mvuchi, viyo atiti Ambuya Chiuta: Mvuchi we, zanga kutuliya ku mphepo zinayi, tutiya pa ŵakubayika yaŵa, mwakuti ŵaŵe ŵamoyo.”

¹⁰Viyo ndinguchima kwakulingana ndimo angundilanguliya, mvuchi ungusere mwaku vyo, ndipo vinguŵa vyamoyo, vinguma ndi marundi ghawo, vyenga mzinda ukuru ukongwa.

¹¹Penipo angunena nane, “Mwana wa munthu, viwanga ivi ndi nyumba yose yaku Yisraele. Awona, ŵatiti, ‘Viwanga vidu vyamira, chigomezgu chidu chawara, tadumurika kwamara.’

¹²Chifukwa cho chima, ŵanene kuti, Viyo atiti Ambuya Chiuta: Ehe, ndikajuranga miunda yinu, ndi kumuyuskiyani kubwaro kwa miunda, mwa ŵanthu ŵangu imwe, ndikamuwezgiyaninga kwinu mu charu chaku Yisraele.

¹³Ndipo mukaziŵanga kuti ine ndine Ambuya, asani ndajura miunda yinu, ndi kumuyuskiyani kubwaro, mwa ŵanthu ŵangu.

¹⁴Ndiserezgenge Mzimu wangu mwaku imwe, mukaŵanga ŵamoyo, ndimujarikeninge mu charu chaku mwaŵeni; penipo ndipo mukaziŵanga kuti ine, Ambuya, ndarongoro, ndipo ndachita, atiti Ambuya.”

¹⁵Ghangundiziya mazu gha Ambuya:

¹⁶“Mwana wa munthu, uto ndodo ulembepo, ‘Yaku Yuda, ndi ŵana ŵaku Yisraele pamoza nayo,’ uto so ndodo yinyake ulembepo, ‘Yaku Yosefe (ndodo yaku Efraimu) ndi nyumba yose yaku Yisraele pamoza nayo’;

¹⁷uzilunge yimoza ku yinyake, mwakuti yiŵe ndodo yimoza mu janja lako.

¹⁸Ndipo asani ŵanthu ŵako ŵatikufumba, ‘Asi ungatinene cho ung'anamuwa ndi ivi?’

¹⁹Uŵanene kuti, Viyo atiti Ambuya Chiuta: Awonani, nde pafupi kuto ndodo yaku Yosefe (yo yemu janja laku Efraimu) ndi mafuku ghaku Yisraele pamoza nayo; ndipo ndibatikizganenge ndi ndodo yaku Yuda, kuti ziŵe ndodo yimoza, alinga kuti mu janja langu ziŵe ndodo yimoza.

²⁰Penipo ndodo zo walembepo zaŵa mu janja lako pa maso pawo,

²¹uŵanene kuti, Viyo atiti Ambuya Chiuta: Ehe, ndikawezganga, ŵaYisraele kutuwa mu mitundu yose mo ŵakuya, ndikaŵawunjikanga kutuwa uku ndi uku, ndikaŵaserezganga mu charu chawo;

²²ndipo ndikaŵasanduskanga mtundu umoza mu charu, pachanya pa mapiri ghaku Yisraele; karonga yumoza ndiyo wakaŵanga karonga waku wose; kuti ŵakaŵanga mitundu yiŵi cha, nanga nkhuti ŵakagaŵikananga kuŵa maufumu ghaŵi nako so cha.

²³Kuti ŵakajikazuzganga ndi ŵangoza ŵawo nanga ndi vinthu vya maunyakazi ghawo so cha, pamwenga ndikanthu kose ka majumphu ghawo, kweni ndiŵataskenge mu vyakuwerevuli vyawo vyose mwaku vyenivyo ŵananga, ndikaŵaphotonga; ŵakaŵanga ŵanthu ŵangu, ndipo ine ndikaŵanga Chiuta wawo.

²⁴“Mteŵeti wangu Davidi wakaŵanga karonga wawo; ndipo wose ŵakaŵanga ndi mliska yumoza. Ŵakarondonga malangulu ghangu ndi kuphwere virunguchizgu vyangu.

²⁵Wakajanga mu charu cho ŵangujamo auskemwe cho ndingupaska mteŵeti wangu Yakobe; iwo, ndi ŵana ŵawo, pamoza ndi ŵana ŵa ŵana ŵawo ŵakajanga mwaku cho muyaya; ndipo Davidi mteŵeti wangu wakaŵanga fumu yawo muyaya.

²⁶Ndikapangananga nawo phanganu la chimangu; likaŵanga phanganu la muyaya ndi iwo; ndiŵatumbikenge ndi kuŵandaniska ndipo ndikajarikanga malo ghangu ghakupaturika mukati mwawo muyaya.

²⁷Malo ghangu ghakujamo ghakaŵanga ndi iwo; iwo ŵakaŵanga ŵanthu ŵangu, ndipo ine ndikaŵanga Chiuta wawo.

²⁸Sono penipo ndipo mitundu yikaziŵanga kuti ine Ambuya ndaphoto ndi kupatuwa Yisraele, po malo ghangu ghakupaturika ghaŵa mukati mwawo muyaya.”