Read gitonga Ezekiele 38 Bible Online

Ezekiele 38 - gitonga bible

Ezekiele 38

¹Mazu gha Ambuya ghanguza kwaku ine:

²“Mwana wa munthu razga chisku chako kwaku Gogi, wa charu chaku Magogi, fumu ya pachanya yaku Mesheke ndi Tubala, uchime kumikana nayo,

³ukambe kuti, Viyo atiti Ambuya: Awona, ndimikana nawe Gogi, fumu ya pachanya yaku Mesheke ndi Tubala;

⁴ndikung'anamuliyenge kuvuli, ndikakoloŵekanga mbeja mu vibwanyo vyako, ndikuguzenge pamoza ndi nkhondo yako yose, ŵakavalo ndi ŵakukwerapo ŵawo, wose ŵakuwo mbakuvwara vya nkhondo, ndi mzinda ukuru, wose ŵendi vivekeru, nguru, ŵasoro malipanga;

⁵Perese, Kushi, ndi Puti ŵe pamoza nawo, wose ŵendi nguru ndi visoti vya chisulo;

⁶Gomeri ndi mzinda wake wose; Bete-togarma kutuwa kutali ku vigaŵa vyaku nkhonde ndi maliŵanja ghake, ŵanthu ŵanandi ŵe pamoza nawe.

⁷“Jinozgeni ndipo muŵeŵakujinozga, iwe pamoza ndi maliŵanja ghose gho ghawungana kwakukuzunguliya, iwe uŵenge wakuŵavikiriya.

⁸Pavuli pa virimika vinandi ukadanikanga, mu virimika vya umari ukarutanga kumikana ndi charu cho chikuwezgeka ku nkhondo, charu cho ŵanthu ŵa mitundu yinandi ŵanguwunganamo kumikana ndi mapiri ghaku Yisraele gho ghaŵa mapopa kwa nyengo yitali; ŵanthu ŵake ŵakuwezgeka kutuwa mu mitundu ndipo sono wose pamoza ŵaja kwakufwasa.

⁹Ukayendanga panthazi, ukazanga nge nchimphunga, ukaŵanga nge ndi bingu lakubenekere charu, iwe ndi maliŵanja ghako ghose, ndi ŵanthu ŵanandi pamoza nawe.

¹⁰“Viyo atiti Ambuya Chiuta: Pa zuŵa liya maghanghaano ghakazanga mu mtima wako, ndipo ukarungurukanga chiŵembu chiheni.

¹¹Kuti, ‘Ndikakweranga kulimbana ndi charu cha mizi yambura malinga; ndikarotokiyanga pa ŵanthu ŵachisisi wo ŵaja kwa kufwasa, wose ŵaja mwambura malinga, ŵalivi mipiringizgu pamwengamalikomo.’

¹²Kuphanga vyakuskowa ndi kuyora usambasi; kupasuwa malo gha mapopa gho sono ghendi ŵanthu ŵakujamo, ŵanthu wo ŵakuwungana kutuwa mu mitundu, wo ŵaŵeta ng'ombe ndi usambasi, wo ŵaja pakatikati pa charu chapasi.

¹³Sheba ndi Dedani ndi ŵamaronda ŵaku Tarshishi ndipo ndi mizi yake yose ŵakatinge kwaku iwe, ‘Kumbi waziya kuzachikusa vya kuskowa? Kumbi maliŵanja ghako waghawunjikiya kupinga usambasi, kututuwa siliva ndi golide, kututuwa ng'ombe ndi vyuma, kuphanga vyakuskowa vinandi?’

¹⁴“Chifukwa cho, mwana wa munthu chima munene Gogi, Viyo atiti Ambuya Chiuta: Pa zuŵa liya po ŵanthu ŵangu ŵaYisraele ŵaja kwakufwasa, iwe ukavuruvundukanga.

¹⁵Ukazanga kutuwa ku charu chako kutali ku vigaŵa vya umari vyaku nkhonde, iwe ndi ŵanthu ŵanandi pamoza nawe, wose mbakukwera pa wakavalo chimzinda chikuru ukongwa, chinkhondo chanthazi,

¹⁶ukazanga kurwana ndi ŵanthu ŵangu ŵaYisraele, ngendi mtambo ubenekere charu. Mu mazuŵa gha umari ndikutonge kuti umikane ndi ŵanthu ŵangu, mwakuti mitundu yindiziŵe, alinga kuti pakuporote mwaku iwe Gogi, ndivumbuwe utuŵa wangu paurongo pawo.

¹⁷“Viyo atiti Ambuya Chiuta: Kumbi ndiwe paku mweniyo mu ŵateŵeti ŵangu ŵa mchimi ŵaku Yisraele ndakambiyangapo mu mazuŵa gha mwaka, ŵeniwo mu mazuŵa ghenigha ŵanguchima kwa virimika vinandi kuti ndikatonga iwe kumikana nawo?

¹⁸Kweni pa zuŵa leniliya, penipo Gogi wakazanga kumikana ndi charu cha Yisraele, atiti Ambuya Chiuta, ukari wangu ukakorenga.

¹⁹Chifukwa mu sanji yangu ndi mukukore kwa ukari mwangu ndikamba kuti, Pa zuŵa leniliya kukaŵangapo kuyaghayika kukuru mu charu chaku Yisraele;

²⁰somba za mu nyanja, tuyuni twa mude, nyama za mudondo, ndi vyakukwaŵa vyose, ndi ŵanthu wose woŵe pa chisku cha charu chapasi, ŵakambwambwanthiyanga pa maso pangu, mapiri ghakapong'ekanga pasi, vinkhwawu vikawanga, ndipo viliŵa vyose vikabwangandukiyanga pasi.

²¹Ndikadananga chakofya cha mtundu we wose kulimbana ndi Gogi, atiti Ambuya Chiuta; lipanga la munthu yose likamikananga ndi mbali wake.

²²Chideru ndi kudiska ndopa vikaserenga pamoza nayo ku cheruzgu, ndikang'iskanga paku iyo ndi pa maliŵanja ghake ndi pa ŵanthu wose wo ŵenayo pamoza vuwa ya maji ghanandi, matalala, fukunyira ndi moto.

²³Viyo ndikarongonga ukuru wangu ndi utuŵa wangu ndikajiziŵiskanga ndamweni mu maso gha mitundu yinandi, penipo ndipo ŵakaziŵanga kuti ine ndine Ambuya.”