Read gitonga Ezekiele 7 Bible Online

Ezekiele 7 - gitonga bible

Ezekiele 7

¹Mazu gha Ambuya ghanguza kwaku ine:

²“Iwe, mwana wa munthu, Ambuya Chiuta atiti ku charu cha Yisraele: Umari! Umari wafika pa visongo vinayi vya charu.

³Sono umari we paku imwe, ndikatumanga ukari wangu paku imwe, ndikweruzgeninge kwakulingana ndi nthowa zinu; ndikakulanganinga chifukwa cha maunyakazi ghinu ghose.

⁴Jiso langu kuti likarekeliyanga cha, nanga nkhuti ndichiti lisungu nako cha; kweni chifukwa cha nthowa zinu ndikakulanganinga, po maukazuzi ghinu ghe mukati mwinu. Po ndipo mukaziŵanga kuti ine ndine Ambuya.

⁵“Viyo atiti Ambuya Chiuta: Soka pa soka! Awonani, lafika.

⁶Umari wafika, umari wafika; wayukiya paku imwe. Ehe, wafika.

⁷Umari wafika paku imwe, owe mwa ŵakuja mu charu; nyengo yafika, zuŵa le pafupi, zuŵa la chiwawa, kuti nkhamphomezi ka likondwa mu mapiri cha.

⁸Sono kwaja kanyengo kamanavi ndipunguliyenge ukari wangu, ndikufiska kukara kwangu paku imwe, ndikweruzgeninge kwakuyana ndi nthowa zinu; ndikulangeninge pa maukazuzi ghinu ghose.

⁹Ndipo jiso langu kuti likarekeliyanga, nanga nkhuŵa ndi lisungu cha; ndikakulanganinga kwakulingana ndi nthowa zinu, po maunyakazi ghinu ghe mukati mwinu. Sono mukaziŵanga kuti ine ndine Ambuya, wo apuma.

¹⁰“Awonani, zuŵa! Ehe, lafika! Soka linu laza, ukazuzi wabuka, kujikuzga kwatunda.

¹¹Nkhaza zakuwa kuŵa nthonga ya uheni; palivi yumoza waku iwo wakajanga, nanga vya uzali wawo, pamwenga usambasi wawo; ndipo kuti wakaŵangako cha wakuŵatenje mukati mwawo.

¹²Nyengo yafika, zuŵa liŵandika. Wakugula wareke kusekere, wakuguliska wareke kuliya, chifukwa ukari we pawumba wawo wose.

¹³Pakuti wakuguliska kuti wakawerenga kwaku cho chaguliskika cha, po ŵeche ndi umoyo. Chifukwa ukari we pawumba wawo wose, kuti ukaweriyanga vuli cha; ndipo chifukwa cha uheni wake, palivi nanga njumoza wakusunga umoyo wake.

¹⁴Ŵamba mbata wose ŵajirongoso; kweni palivi nanga njumoza wakuya ku nkhondo, pakuti ukari wangu we pa wumba wawo wose.

¹⁵“Lipanga le kubwaro, chideru ndi chilala vye mukati, yo we mu munda watufwa ndi lipanga; ndipo yo we mu msumba nja ndi chiwowota vithwazuwa.

¹⁶Ndipo asani ŵajako ŵakuthaŵa, ŵakaŵanga pa mapiri, nge ndi nkhunda za mudambo, wose ŵatenje, we yose pa uheni wake.

¹⁷Manja ghose ghatomboroka, ndipo makongono ghose ghazizira nge ndi maji.

¹⁸Ŵatijivwarika vigudulu mu chiunu, mantha ghati ŵabenekere; soni ze pa visku vyose, ndi phara pa mitu yawo yose.

¹⁹Ŵapong'a siliva wawo mu ŵagurwi, golide wawo waŵa nge nchinthu cha mwikhu; siliva wawo ndi golide wawo kuti viziŵa kuŵataska cha mu zuŵa la ukari wa Ambuya; kuti ŵaziŵa ku mariska nja yawo pamwenga kugutiska navyo chifu chawo cha. Chifukwa kubende kwawo kwaŵaŵiya chiguŵisku.

²⁰Chitowero chawo chakujeduka ŵanguchitiya unkhankhu wa ŵaka, ndipo ŵanguchita vikozgu vyawo vya maunyakazi ndi vinthu vyawo vya maukazuzi, mu chifukwa cho ndikachichitanga kuŵa chinthu cha mwikhu kwaku iwo.

²¹Ndipo ndikaperekanga nge nchakuliwa mu manja gha ŵalendo, ndi ku ŵaheni ŵa charu cha pasi nge nchakuskoweka; ŵakachikazuzganga.

²²Ndituzgengeko chisku changu kwaku iwo, mwakuti ŵakazuzge malo ghangu ghakupaturika; ŵakuphanga ŵakaserenga kughakazuzga,

²³ndi kughasanduska phasulu. “Chifukwa charu chazaza mirandu ya ndopa ndipo msumba wazaza viwawa,

²⁴nditonge mitundu yiheni kwakuruska kuti ŵazipoke zinyumba zawo; ndikamariskanga kujikuzga kwawo kwanthazi, ndipo malo ghawo ghatuŵa ghakakazuzgikanga.

²⁵Po urwirwi wafika, ŵakapenjanga chimangu, ndipo kuti chikaŵangapo cha.

²⁶Soka lituza pa soka, mbiri yirondo mbiri; ŵapenja chiwona ku mchimi, kweni dangu limara ku mzukuru, ndi fundu ku ŵara.

²⁷Karonga watenje, fumu yavwara soka, ndipo manja gha ŵanthu mu charu ghaphapha ndi mantha. Ndiŵachitiyenge kwakulingana ndi nthowa zawo, ndipo kwakuyana ndi vyeruzgu vya ŵeneko ndiŵeruzgenge; sono ŵakaziŵanga kuti ine ndine Ambuya.”