Read gitonga Danyele 2 Bible Online

Danyele 2 - gitonga bible

Danyele 2

¹Mu chirimika cha chiŵi cha muwusu waku Nebukadanezara, Nebukadanezara wangulota maloto; ndipo mtima wake ungusuzgika nagho, ndi tulu twake tingukamuka.

²Viyo karonga wangulangula kuti ŵaukwi, ŵaziŵi nyenyezi, ŵakuwombeza, ndi ŵaKaldiya ŵadanike kuzachivumbuliya karonga maloto ghake. Viyo ŵanguza ndi ŵanguma paurongo pa karonga.

³Ndipo karonga wanguti kwaku wo, “Ndalota loto, ndipo mtima wangu usuzgika kuti, mphanyi ndinguziŵa cho loto ling'anamuwa.”

⁴Viyo ŵaKaldiya ŵanguti ku karonga, “Karonga mujaliliye ŵamoyo! Tineniyeni taŵaŵanda ŵinu loto, ndipo timukambiyeninge cho ling'anamuwa.”

⁵Karonga wangwamuka ŵaKaldiya kuti, “Mazu gho ghatuwa mwaku ine ngakuneneska: asani kuti mutindiziŵiska cha cho loto lo ling'anamuwa, mudumulikenge tumana-tumana, ndipo nyumba zinu zisandukenge makunthu.

⁶Kweni asani mungandiziŵiska cho loto lo ling'anamuwa, murondenge vyawanangwa, mphoto ndi ulemu ukuru. Viyo ndiziŵiskeni loto lo ndi cho ling'anamuwa.”

⁷Ŵangwamuka kachiŵi, ŵanguti, “Karonga watinene taŵaŵanda ŵake loto, ndipo timuziŵiskenge cho ling'anamuwa.”

⁸Karonga wangwamuka kuti, “Ndiziŵa umampha limu kuti mukhumba kuŵa ndi nyengo, chifukwa mwawona kuti mazu gho ghatuwa mwaku ine ngakuneneska,

⁹asani mureka kundinene cho loto ling'anamuwa, kumuŵiyeninge kulangika kumoza pe.”

¹⁰ŴaKaldiya ŵangumwamuka karonga kuti, “Palivi munthu panu pasi yo wangaziŵa kufikapo pa khumbo la karonga; chifukwa paŵavi karonga mukuru ndi wamazaza yo wadanga wafumbapo chinthu nge ndi ichi ku ŵaukwi, pamwenga ŵaziŵi nyenyezi, pamwenga ku ŵaKaldiya.

¹¹Chinthu cho karonga wafumba nchinonono, palivi yo wangachivumbuwa ku karonga kweni ŵachiuta pe ndiwo wo kuti mbanthu cha.”

¹²Pa chifukwa ichi karonga wangutundiya ndi kukaripa, ndipo wangulangula kuti ŵazeru wose ŵamu Babiloni ŵabayike.

¹³Viyo dangu lingutuwa kuti ŵazeru ŵabayike; ndipo ŵangupenja Danyele ndi ŵanyake wo ŵasungananga nayo kuti ŵabaike.

¹⁴Apa Danyele wangwamuka ndi maghanaghano gha vinjeru kwaku Arioki, mura wa ŵaronda ŵa karonga, mweniyo wanguruta kwachibaya ŵavinjeru wose ŵamu Babiloni.

¹⁵Wanguti kwaku Arioki, nduna ya karonga, “Chifukwa nchine dangu la karonga ndakofya viyo?” Arioki wanguŵangwanduliya Danyele makani yagha.

¹⁶Ndipo Danyele wangusere ndi wanguŵeyere karonga kuti wamupaske nyengo yakuti wamunene karonga cho loto lake ling'anathuwa.

¹⁷Sono Danyele wanguruta ku nyumba yake, ndi wanguziŵiska makani yagha kwaku Hananiya, Mishaele, ndi Azariya ŵamoza nayo,

¹⁸ndipo wanguŵanene kuromba lisungu laku Chiuta wa kuchanya, pa chamuchibisibisi ichi. Mwakuti Danyele ndi ŵamoza nayo ŵareke kubayikiya pamoza ndi ŵazeru ŵamu Babiloni.

¹⁹Viyo chamuchindindi ichi chinguvumbulika kwaku Danyele mu chakuwona cha usiku. Viyo Danyele wanguthamika Chiuta wakuchanya.

²⁰Danyele wanguti: “Lithamikike zina laku Chiuta muyaya ndi muyaya, chifukwa zeru ndi nthazi vyake.

²¹Wasintha maora ndi zinyengo, wasezga ŵakaronga ndi kumika ŵakaronga ŵanyake; wapaska zeru ku ŵazeru ndi kuziŵa kwaku wo ŵawamo;

²²wavumbuwa vyamu ndimba ndi vinthu vyamuchibisibisi, waziŵa cho chemu mdima, ndi ukweru we kwaku iyo.

²³Kwaku imwe, Chiuta wa ŵada, ndipereka viwongo ndi marumbu, chifukwa mwandipaska zeru ndi nthazi, ndipo sono mwandivumbuliya cho tingufumba kwaku imwe, chifukwa mwativumbuliya makani gha karonga.”

²⁴Viyo Danyele wangusere kwaku Arioki mweniyo karonga wangumutondo kwananga ŵazeru ŵamu Babiloni; wangusere ndi wanguti kwaku iyo, “Ungabayanga cha ŵazeru ŵamu Babiloni; ndiserenge paurongo pa karonga, ndipo ndakumunene karonga cho loto lake ling'anamuwa.”

²⁵Viyo Arioki wangumuserezga Danyele ruŵiruŵi paurongo pa karonga ndipo wanguti kwaku iyo, “Ndasaniya munthu yo njumoza wa ŵamikoli ŵaku Yuda mweniyo wangaziŵa kunene karonga kang'anamuridu ka loto lake.”

²⁶Karonga wanguti kwaku Danyele, yo zina lake lenga Belteshazara, “Kumbi ungaziŵa kundinene cho loto lo ndalota ling'anamuwa?”

²⁷Danyele wangwamuka karonga wanguti, “Palivi ŵanthu ŵazeru, manyi mbaziŵi nyenyezi, ŵaukwi, pamwenga ŵakuziŵa zinyengo wo ŵangaziŵa kunena chamuchibisibisi cho karonga wafumba.

²⁸Kweni waliko Chiuta kuchanya yo wavumbuwa vyamuchibisibisi, ndiyo waziŵiska Karonga Nebukadanezara cho chiŵengeko mu mazuŵa ghakunthazi. Loto ndi chiwona cha mutu winu muchigona mu chita, ndi ivi:

²⁹Kwaku imwe, a karonga, po mungugona pa chita chinu ghanguza maghanaghano ghaku vyo vikaŵangako.

³⁰Chamuchibisibisi ichi chavumbulika kwaku ine, nchifukwa cha zeru zo ndenazo cha kwakuruska wose ŵanyake wo ŵaliko, kweni nchifukwa chakuti kang'anamuridu kaziŵikwe ku karonga mwakuti muziŵi maghanaghano gha mutu winu.

³¹“Munguwona, a karonga, chikozgu chikuru. Chikozgu ichi chikuru ndi chakugadima ukongwa, chikuma paurongo pinu, ndipo kawonekedu kake kenga kakofya.

³²Mutu wa chikozgu ichi, wenga wa golide wakugadima, chifuŵa chake ndi manja ghake vya siliva, rufu lake ndi vigha vyake vya mkuŵa,

³³misolonthi yake ya chisulo, marundi ghake kurwandi gha chisulo ndi kurwandi gha dongo.

³⁴Mo mungulereske, mwa ungudumulika ndi janja la munthu cha, ndipo unguwa pa chikozgu, pa marundi ghake gha chisulo ndi dongo, ndikughavikita tumana-tumana.

³⁵Viyo chisulo, dongo mkuŵa, siliva, ndi golide vinguvikitika tumana-tumana vyose pamoza, ndi vinguŵa nge ndi mwere wa chihanya wakupepeteke pasi, ndi mphepo yinguviputiskiya kutali, mwakuti vingawoneka so cha. Kweni mwa uwa ungutekenya chikozgu cho, ungusanduka phiri likuru ndi linguzaza charu chose chapasi.

³⁶“Ili ndilo loto; sono timuneniyeninge karonga kang'anamuridu kake.

³⁷Imwe, a karonga, karonga wa ŵakaronga, Chiuta wakuchanya wakupaskani ufumu, mazaza ndi nthazi, ndi unkhankhu,

³⁸ndipo wapaska mu janja linu, kwekose ko ŵana ŵa ŵanthu ŵaja, nyama zamu dondo, ndi viyuni vya mude. Wamuchitani imwe kuwusa vyose. Ndimwe mutu wa golide.

³⁹Pavuli pinu payukenge ufumu unyake umanako ndi winu ndiso ufumu wachitatu wa mkuŵa, wo uwusenge pa charu chose chapasi.

⁴⁰Ndipo kuŵenge ufumu wa chinayi, wanthazi nge nchisulo, pakuti chisulo chifyo ndi kuthibuska vinthu vyose; ndi nge nchisulo mo chitekenyuliya, ukaswanga ndi kutekenyuwa vyose.

⁴¹Nge ndimo munguwone marundi ndi vikumbu, kurwandi kwa dongo la muwumbi, ndi kurwandi kwa chisulo, ukaŵanga ufumu wakugaŵikana; kweni ukaŵangamo wanthazi nge za chisulo, nge ndimo munguwone chisulo kusazgikana ndi dongo.

⁴²Ndipo nge ndimo vikumbu vya marundi vinguŵiya kuti kurwandi chisulo ndi kurwandi dongo, viyo ndimo uŵiyenge ufumu, kurwandi wanthazi, ndi kurwandi wakutomboroka.

⁴³Nge ndimo munguwone chisulo chakusazgika ndi dongo, viyo ŵasazgikanenge mu zinthengwa, kweni kuti ŵabatikanenge ndi munyake cha nge ndimo chisulo chireke kusazgikiyana ndi dongo.

⁴⁴Ndipo mu mazuŵa gha ŵakaronga wo, Chiuta wa kuchanya wakamikanga ufumu wo kuti ubwangandulikenge cha, nanga nkhuti mazaza ghake ghapere ku fuku linyake cha. Ubwanganduwenge maufumu ghose yagha kughamara; ndipo ukaŵangako muyaya;

⁴⁵nge ndimo munguwone mwa uwa kutuwa ku phiri wo kuti ungusweka ndi janja la munthu cha, ndipo ungutekenya chisulo, mkuŵa, dongo, siliva, ndi golide, Chiuta mkuru wamuziŵiska karonga ndi vyo vikaŵangako pavuli. Nadi ndi loto leneko, ndi kang'anamuridu kake nako nkhakuneneska.”

⁴⁶Viyo karonga Nebukadanezara wanguwa kavunama, kulambiya Danyele, ndipo wangulangula kuti sembe ndi vya chema vipasikeke kwaku iyo.

⁴⁷Karonga wanguti kwaku Danyele, “Kwakuneneska Chiuta wako ndi Chiuta wa ŵachiuta, ndi karonga wa ŵakaronga, muwuvumbuzi wa vya muchindindi, chifukwa iwe wavumbuwa cha muchindindi ichi.”

⁴⁸Viyo karonga wangupaska Danyele ulemu ndi vyawanangwa vinandi, ndi kumumika kuŵa wakuwusa chigaŵa chose cha Babiloni.

⁴⁹Danyele wangupempha karonga, ndi wangumika Shadreke, ndi Mesheke, ndi Abedenego pa milimu ya kulamula mu charu chaku Babiloni; kweni Danyele wanguja mu bwalo la karonga yo.