Read gitonga Danyele 5 Bible Online

Danyele 5 - gitonga bible

Danyele 5

¹Karonga Beleshazara wanguchitiya nduna zake chikwi chimoza (1,000) dghera likuru. Wangulaŵa vinyo panthazi pa chikwi cho.

²Beleshazara wanguti walaŵa vinyo, wangulangula kuti ŵazi navyo viyaŵi vya golide ndi siliva vyo vingutoreka ndi wiske Nebukadanezara mu nyumba yaku Chiuta mu Yerusalemu, mwakuti karonga, mafumu ghake, ŵawoli ŵake, ndi mabwezi ghake ghanthukazi ŵamwiyemo.

³Viyo ŵanguza navyo viyaŵi vya golide ndi vya siliva vyo vingutoreka mu nyumba yaku Chiuta mu Yerusalemu; ndipo karonga, mafumu ghake, ŵawoli ŵake, ndi mabwezi ghake ghanthukazi ŵangumwiyamo mwaku vyo.

⁴Ŵangumwa vinyo ndi ŵangukankhuska ŵachiuta ŵa golide ndi siliva, ŵa mkuŵa, ŵa chisulo, ŵa muti, ndi ŵa mwa.

⁵Pa nyengo yeniyo minwi ya janja la munthu yinguwoneka, ndi yingulemba pa chimati cha chiliŵa cha nyumba ya karonga, kurazgana ndi chikolero nyali. Karonga wanguliwona janja lichilemba.

⁶Viyo kawonekedu ka karonga kangusintha ndi maghanaghano ghake ghangundengulana.

⁷Karonga wangudanirizga kuti ŵazi nawo ŵamaula, ŵaKaldiya, ndi ŵaziŵi nyenyezi. Karonga wanguti ku ŵanthu ŵavinjeru ŵamu Babiloni, “Yose yo wangaŵerenga lembo ili ndi kundinene kang'anamuridu kake, wakavwarikikanga vyakuvwara vichesamu ndi ukufu wa golide mu khosi lake, ndipo wakaŵanga wakuwusa wachitatu muufumu wangu.”

⁸Viyo wose ŵavinjeru ŵa karonga ŵangusere, kweni kuti ŵanguziŵa kuŵerenga lembo lo cha nanga nkhumunene karonga kang'anamuridu kake.

⁹Viyo karonga Beleshazara wangusuzgika ukongwa, kawonekedu kake kangusanduka, ndi nduna zake zinguzizikika.

¹⁰Fumukazi ya karonga, pa chifukwa cha mazu gha karonga ndi nduna zake, yinguza mu chipinda cha dghera. Ndipo yinguti, “Karonga mujaliliye ŵamoyo muyaya, maghanaghano ghinu ghangamsuzganinga cha nanga nkhusanduka kwa kawonekedu kinu.

¹¹Walimu munthu mu ufumu winu mwaku yo mwe mzimu wa ŵachiuta ŵatuŵa. Mu mazuŵa gha auskemwe, ukweru, vinjeru, ndi zeru nge ndi zeru za ŵachiuta vingusanirika mwaku iyo. Karonga Nebukadanezara uskemwe, wangumumika kuŵa mura wa ŵaukwi, ŵamaula, ŵaKaldiya, ndi ŵaziŵi nyenyezi,

¹²chifukwa mzimu wamampha, kuziŵa, ndi vinjeru kung'anamuwa maloto, kukonkhoska vyakuzizika, ndi kurongoso maunonono vingusanirika mwaku Danyele uyu; mweniyo karonga wangumudana zina lakuti Belteshazara. Danyele wadanike ndipo wazakukuneniyani kang'anamuridu ka loto.”

¹³Viyo Danyele wangutoreke paurongo pa karonga. Karonga wanguti kwaku Danyele, “Iwe ndiwe yo Danyele yumoza wa ŵamikoli ŵaku Yuda, mweniyo ada karonga ŵangutuwa nayo ku Yuda.

¹⁴Ndavwa ndi iwe kuti mzimu wa ŵachiuta ŵatuŵa we mwaku iwe, ndi kuti ukweru, vinjeru, ndi zeru zakufikapo visanirika mwaku iwe.

¹⁵Sono ŵazeru ndi ŵamaula, ŵangutoreke muno paurongo pangu kuti ŵaŵerenge lembo ili, ndi ŵandiziŵiske kang'anamuridu kake; kweni kuti ŵangundiziŵiska cha kang'anamuridu ka lembo ili.

¹⁶Kweni ndavwa kuti uziŵa kundinene kang'anamuridu ndi kufwatuwa maunonono. Sono asani ungaŵerenga lembo ndi kundiziŵiska kang'anamuridu kake, ukavwarikikanga vyakuvwara vichesamu ndi ukufu wa golide mu khosi lako, ndi ukaŵanga wakuwasa wachitatu mu ufumu wangu.”

¹⁷Viyo Danyele wangwamuka paurongo pa karonga, wanguti, “Vyawanangwa vinu vyaku mwaŵeni; mphoto yo mupaski munyake; kweni ndimuŵerengiyenge karonga lembo lo ndi kumuziŵiska kang'anamuridu kake.

¹⁸Ehe, karonga, Chiuta Wamachanya wangupaska Nebukadanezara ausu ufumu, kuzirwa, unkhankhu ndi mazaza;

¹⁹ndipo chifukwa chakuzirwa ko wangumupaska, ŵanthu wose, mitundu ya ŵanthu, ndi makambidu ŵangutenthema ndi kopa paurongo pake. Yo wangukhumba kubaya, wangubaya, ndipo yo wangukhumba kusunga, wangumsunga wamoyo. Yo wangukhumba kumsoska, wangumsoska; ndipo yo wangukhumba kusiska, wangumsiska.

²⁰Kweni penipo mtima wake ungujitukumuwa, ndi mzimu wake ungunonopeskeka wanguchita vyose kwakujikuzga, ndipo wangusiskika pa chitengo chake, cha ufumu.

²¹Unkhankhu wake ungutuzgikako kwaku iyo. Wangudikiskikiya kutali ndi ŵanthu, vinjeru vyake vingusanduka nge vya nyama, ndi wajanga pamoza ndi ŵaburu ŵamu dondo; warghanga uteka nge ndi ng'ombe, liŵavu lake linguzumbwa ndi dungwi la kuchanya, mpaka penipo wanguziŵa kuti Chiuta wa Machanya wausa pa ufumu wa ŵanthu, ndikuti wamikapo kuwusayo iyo wamukhumba.

²²Ndipo iwe Beleshazara mwana wake, ulivi kujiyuyuwa mu mtima wako, chingana wachiziŵa ichi chose;

²³kweni wajisoska wamweni kulimbana ndi Ambuya wa kuchanya. Viyaŵi vya mu nyumba yawo vyatoreke paurongo pinu, imwe ndi nduna zinu, ŵawoli ŵinu, ndi mabwezi ghinu ghanthukazi mwamwiyamu vinyo; mwakankhuska ŵachiuta ŵa siliva ndi golide, mkuŵa, chisulo, muti, ndi mwa, ŵeniwo kuti ŵawona cha, chingana nkhuvwa, pamwenga kuziŵa; kweni Chiuta mu manja ghaku mweniyo mwe mvuchi winu, ndi mwaku mweniyo mwe nthowa zinu zose, kuti mwamukankhuska cha.

²⁴“Viyo chikufi cha janja chingutumika kutuliya kwaku iyo, ndipo lembo ili lingulembeka.

²⁵Lembo lo lingulembeka ndi ili: MENE, MENE, TEKEL, PARSIN.

²⁶Yaka ndikokang'anamuridu kake: MENE, Chiuta waŵerenga unandi wa mazuŵa gha ufumu winu ndi kughamara;

²⁷TEKEL, Mwapimika pa mweso ndi mwasanirika kuti mwe ŵayuyu;

²⁸PERES, ufumu winu wagaŵika ndi wapaskika ku ŵaMede ndi ŵaPerese.”

²⁹Viyo Beleshazara wangulangula kuti Danyele wavwarikike nkhazu ndi ukufu mu khosi lake, ndipo kunguwandiskika kuti waŵi wakuwusa wachitatu mu ufumu.

³⁰Mu usiku weniuwa Beleshazara karonga wa ŵaKaldiya wangubayika,

³¹ndipo Dariusi muMede wanguto ufumu, wenga ndi virimika machumi ghankhonde ndi limoza pachanya viŵi (62).