Read gitonga Danyele 6 Bible Online

Danyele 6 - gitonga bible

Danyele 6

¹Chingumukondweska Dariusi kumika mafumu machumi pe chumi, pachanya machumi ghaŵi (120) mu ufumu wake wose.

²Ŵara ŵawo ŵangumika ŵarongozgi ŵatatu, yumoza waku wo wenga Danyele, kuti mafumu ghose ghaperekenge makani kwaku iwo, mwakuti karonga wareke kusuzgika.

³Paku yaŵa ŵatatu, ndi mukati mu mafumu ghose, Danyele wangusanirika wamagomekezgeka chifukwa mzimu umphemphyemu wenga mwaku iyo. Ndipo karonga wangukhumba kumukwezga kulamula ufumu wose.

⁴Viyo ŵarongozgi wo ndi mafumu ŵangupenja kafukwa kakumikirana ndi Danyele pa makani gha ufumu; kweni ŵengavi kusaniya nthowa nanga nkhafukwa kakumutole makani, chifukwa wenga wamagomezgeka, ndipo pengavi ubudi pamwenga kafukwa kakusanirika mwake.

⁵Viyo ŵanthu yaŵa ŵanguti, “Tikasaniyanga nthowa cha yakumutole kafukwa uyu Danyele, kwambura nge takasaniya mu chifukwa cha dangu laku Chiuta wake.”

⁶Viyo ŵarongozgi yaŵa ndi mafumu yagha ŵanguza ku karonga ndi ŵanguti kwaku iyo, “Karonga Dariusi, ujaririye wamoyo muyaya!

⁷Ŵarongozgi wose ŵa ufumu, ŵeruzgi, ndi mafumu, ŵaupu ndi zinduna, ŵazomerezgana kuti karonga wamike dangu la ufumu ndi walikhozge kuti, yose yo wasopenge Chiuta munyeke, kwa mazuŵa machumi ghatatu (30) kwambura kuti ndimwe pe karonga, wapong'eke muzenje la nkharamu.

⁸Sono imwe karonga, khozgani dangu ili ndi musayinde zina linu pa karata uyu, kuti lireke kusinthika, nge ndi dangu la ŵaMede ndi ŵaParese lo kuti lisinthika cha.”

⁹Viyo karonga Dariusi wangusayinda zina lake pa karata yo wa dangu.

¹⁰Penipo Danyele wanguziŵa kuti karata wa dangu wasayindika wangusere mu nyumba yake ndi wangujura madangazi muchipinda cha muchanya ghakurazga ku Yerusalemu; wangujikama makongono ghake katatu mu zuŵa ndi wanguromba ndi kuwonga paurongo paku Chiuta wake, nge ndimo wachitiyanga pakudanga.

¹¹Viyo ŵanthu yaŵa ŵanguungana ndi ŵangusaniya Danyele waromba ndi waŵeyere paurongo paku Chiuta wake.

¹²Ndipo ŵanguza paurongo pa karonga kukamba ndi dangu lo karonga wangumika, ŵanguti, “Kumbi mulivi kusayinda karata wa dangu kuti, we yose yo wasopa Chiuta munyake pamwenga munthu munyake mu mazuŵa machumi ghatatu (30) kwambura nge nkhwaku imwe karonga, wapong'ekenge mu zenje la nkharamu?” Karonga wangwamuka wanguti, “Nchakuneneska chinthu cho, kwakulingana ndi dangu la ŵaMede ndi ŵaPerese lo lisinthika cha.”

¹³Ndipo wangwamuka paurongo pa karonga wanguti, “Danyele yo njumoza wa ŵamikoli ŵaku Yuda kuti watukuphwereni cha imwe karonga, pamwenga dangu lo mukusayinda, wasopa katatu pa zuŵa.”

¹⁴Penipo karonga wanguvwa mazu yagha, wanguŵa ndi chitima chikuru, ndipo wangukhumba kumutaska Danyele, wangurimbarimba mpaka dazi lingusere.

¹⁵Kweni ŵanthu yaŵa ŵanguza ku karonga ndi mtima umoza, ndi ŵanguti kwaku iyo, “Muziŵa, imwe karonga kuti, ndi dangu la ŵaMede ndi ŵaPerese ndipo kuti nchakwenere cha kuti dangu pamwenga langulu lo lamikika ndi karonga lisinthike.”

¹⁶Viyo karonga wangulangula, ndipo wanguza Danyele wangutoreka ndi wangupong'eka mu zenje la nkharamu. Ndipo karonga wanguti kwaku Danyele, “Mphanyi Chiuta wako yo utumtataliya nyengo zose wakutaske!”

¹⁷Wanguto mwa ndi wanguuŵika pa khomo la zenje, ndipo karonga wanguuzighiriya ndi chizighiriyu chake ndi chizighiriyu cha nduna zake, mwakuti pa ŵevi kanthu kakusinthika kakukwaska Danyele.

¹⁸Viyo karonga wanguruta ku nyumba yake, wangukana kurgha usiku wose ndipo chingana vyakumbiya vyengavi kutoreke kwaku iyo, ndi tulo nato twengavi kuzamo mu maso ghake.

¹⁹Viyo ku matandakucha, karonga wanguyuka ndi wanguruta kwaruŵi ku zenje la nkharamu.

²⁰Penipo wangufika pafupi ndi zenje mwenimo wanguŵa Danyele wangudanirizga ndi mazu ghachitima, ndi wanguti kwaku Danyele, “Danyele wamteŵeti waku Chiuta wamoyo, kumbi Chiuta wako yo uteŵete mazuŵa ghose wakutaska ku nkharamu?”

²¹Ndipo Danyele wanguti ku karonga,

²²“Karonga muŵi ŵamoyo muyaya! Chiuta wangu watuma mungelo wake, wajara milomo ya nkharamu, ndipo kuti zandipweteka cha, chifukwa ndasanirika wambura kalema paurongo pake, ndipo so paurongo pinu, ndilivi kuchita kaheni, a karonga.”

²³Viyo Karonga wangukondwa ukongwa, ndi wangulangula kuti Danyele watuzgike mu zenje. Viyo Danyele wangutuzgika mu zenje, ndi mwengavi kusanirika chingana ndi bamba mu liŵavu lake, chifukwa wangugomekezga mwaku Chiuta wake.

²⁴Ndipo karonga wangulangula, ndipo ŵanthu ŵa ŵangupacha Danyele ŵangutoreka ndi ŵangupong'eka mu zenje la nkharamu, iwo, ŵana ŵawo, ndi ŵawoli ŵawo; ndipo ŵenga ŵandafike pasi pa zenje, nkharamu zinguŵaparuwa ndi kuvikita viwanga vyawo vyose.

²⁵Ndipo karonga Dariusi wangulemba ku ŵanthu wose, mitundu ya ŵanthu, ndi makambidu, ŵakuja mu charu chose: “Chimangu chandaniskike kwaku imwe.

²⁶Ndimika dangu kuti mu muwusu wangu wose ŵanthu ŵatenthemi ndi kopa paurongo paku Chiuta waku Danyele. Pakuti ndi Chiuta wamoyo, wajaririya muyaya; ufumu wake kuti umarenge cha ndi muwusu wake ngwambura chigoti.

²⁷Wataska ndi kuwombo wachita visimikizgu ndi vyakuziziswa kuchanya ndi pasi.”

²⁸Viyo Danyele uyu wangukuzgika mu muusu waku Dariusi ndi mu muwusu waku Sirusi mu Perese.