Read gitonga Hoseya 13 Bible Online

Hoseya 13 - gitonga bible

Hoseya 13

¹Po Efraimu wangukamba, ŵanthu ŵangutenthema; wangukuzgika mu Yisraele; kweni wangwananga chifukwa chaku Bala ndi wangufwa.

²Ndipo sono wanangiyanangiya, ndi kujipangiya vikozgu vyakusongono, ŵangoza ŵakupangika umampha ndi siliva wawo, vyose ndi nchitu ya fundi. Ŵatiti, “Perekani sembe ku ŵangoza.” Sono ŵanthu ŵa fyofyontha mathole!

³Chifukwa ichi ŵakaŵanga nge ndi nyankhuŵinda wa mlenji, pamwenga nge ndi dungwi lo lakamuka ruŵi. Nge ndi mwere wo wuputa pa malo ghakupepete, pamwenga nge ndi usi wakuturiya pa dangazi.

⁴Ndine Ambuya Chiuta winu kutuwa ku charu cha Egipiti. Muziŵa Chiuta munyake cha, kweni ine pe, ndipo pade paku ine palivi mtaski munyake.

⁵Ndenga ine yo wangukuziŵani mu mapopa, mu charu cha chilala.

⁶Kweni po ŵangurgha ukongwa, ŵanguguta, ndipo mtima wawo ungujitukumuwa; chifukwa ichi ŵangundiruwa.

⁷Viyo ndiŵenge nge ndi nkharamu kwaku iwo, nge ndi nyalubwe ndiŵakhazgenge pa nthowa.

⁸Ndiŵarotokiyenge nge ndi chipembere yo waphangika ŵana ŵake, ndiparuwenge nganga yawo, ndipo nkhaŵarghanga nge ndi nkharamu, nge ndimo chikoko cha mu dondo chiparuriya.

⁹Ndikuparghang'enge iwe, Yisraele; ndiyani wangakovya?

¹⁰Karonga wako wepani kukutaska; mafumu ghako ghe pani kukuvikiriya gho unguti, “Ndipaskeni karonga ndi mafumu”?

¹¹Ndingukupaska ŵakaronga mu ukari wangu, ndipo ndaŵatuzgako mu kandundu kangu.

¹²Ubendezi waku Efraimu wamangika, kwananga kwake kusungika mu nkhokwe.

¹³Urwirwi wa pakubara mwana umuziyenge, kweni ndi mwana wambura zeru, chifukwa sono kuti wajirongo cha pa mlomo wa nthumbu.

¹⁴Kumbi nkhaŵawombonga ku nthazi ya muunda? Kumbi nkhaŵawombonga ku nyifwa? Wa nyifwa we, urwirwi wako we pani? Wa muunda we, kuparghang'a kwako kwe pani? Lisingu labisika ku maso ghangu.

¹⁵Chingana wangandana nge ndi dete lakupandika, mphepo yakuvuma, mphepo ya Ambuya, yikazanga, yakutuwa ku lisuwa; ndipo kubwibwituka kwake kukakamukanga, chisimi chake nacho chikakamukanga; yikaskowanga chinthu chose chakuzirwa.

¹⁶Samaria wasuskikenge chifukwa wagaruka kwaku Chiuta wake; wakabayikanga ndi lipanga, ŵamujedu ŵawo ŵatekenyulikenge tumanatumana ndi ŵanthukazi ŵawo ŵa nthumbu ŵakapangulikanga.