Read gitonga Hoseya 4 Bible Online

Hoseya 4 - gitonga bible

Hoseya 4

¹Vwani mazu gha Ambuya imwe mwa ŵaYisraele; chifukwa Ambuya ŵe ndi mlando ndi ŵakuja mu charu. Palivi chigomezgu, chingana mbulemu, pamwenga kuziŵa Chiuta mu charu.

²Mwe kurapa, kupusika, kubaya, kuba, ndi kuchita ureŵi, ŵabwanganduwa zimphaka, ndipo kubaya kurondo kubaya.

³Chifukwa ichi, charu chitenge, ndipo wose wo ŵaja mwaku cho ŵakhuluruka nthazi, ndi so nyama zamu dondo, ndi tuyuni twa mude, chingana ndi somba zamu nyanja nazo zitoreka.

⁴Ndipuuli munthu wareke kutendeka munyake, ndi wareke munthu kupacha munyake; chifukwa ine nditendekana ndi iwe, wa mzukuru.

⁵Mukaguŵanga ndi msana, ndi mchimi nayo waguŵenge pamoza namwe ndi usiku; ndipo nkhananganga anyoko.

⁶Ŵanthu ŵangu ŵanangika chifukwa chakuŵavi zeru, chifukwa mwapata zeru, ine nane nditukupata kuŵa mzukuru wangu. Chifukwa waruwa dangu laku Chiuta wako, nane ndiruwenge ŵana ŵako.

⁷Kwakulingana nge ndimo ŵangwandaniyana ukongwa, ndimu so ŵangundilakwiya; ndisinthenge unkhankhu wawo kuŵa soni.

⁸Waturgha kwananga kwa ŵanthu ŵangu; ŵaŵika mtima pa kulakwa kwawo.

⁹Kukaŵanga viyo ku ŵanthu, ndi ŵazukuru, ndiŵarangenge chifukwa cha kendero kawo, ndi kuŵawezge nchitu zawo.

¹⁰Warghenge kweni kuti ŵagutenge cha; ŵachitenge ureŵi kweni kuti ŵandanenge cha; chifukwa ŵareka kuphwere Ambuya mwakuti ŵaŵika mitima yawo pa ureŵi.

¹¹Vinyo ndi vinyo mufya, watuzgako vinjeru vyawo.

¹²Ŵanthu ŵangu ŵafumba fundu ku chimuti, ndipo ndodo yawo yitiŵakonkhoske. Chifukwa mzimu wa ureŵi waŵarandizga, ndipo ŵareka Chiuta wawo chifukwa ŵakhumba kuchita ureŵi.

¹³Ŵapereka sembe pachanya pa mapiri, ndi ŵapereka mipasku pa tumapiri, musi mu miti ya kankhandi, ndi mkongwe, ndi mtaŵa chifukwa miduzi yawo njamampha. Chifukwa ichi ŵana ŵinu ŵanthukazi ŵachita ureŵi, ndi awoli ŵinu nawo ŵachita ureŵi.

¹⁴Ndiŵarangenge cha ŵana ŵinu ŵanthukazi ŵachichita ureŵi, chingana mbawoli ŵinu ŵachichita ureŵi; chifukwa ŵanthurumi nawo ŵapatukiya ku ŵareŵi, ndi kupereka sembe ndi ŵanthukazi ŵareŵi; ndipo ŵanthu ŵambura vinjeru ŵamupasuka.

¹⁵Chingana muchita maureŵi, imwe ŵaYisraele, kweni Yuda wangananganga cha. Mungazanga ku Gilgala cha chingana nkhukwere ku Betavene, pamwenga kurapa, “Ambuya wamoyo.”

¹⁶Yisraele wangangamika nge ndi ng'ombe yinthukazi yimana; kumbi sono Ambuya angaziŵa kuŵaliska nge ndi mwana wa mberere mu dambo lisani?

¹⁷Efraimu wabatikana ndi ŵangoza mlekeni yija.

¹⁸Mpingu wa ŵaloŵevu, wajipereka ku maureŵi; ŵatanja kulengeskeka kwakuruska unkhankhu wawo.

¹⁹Mphepo yaŵavungiya mu mapapa ghake, ndipo ŵalengeskekenge chifukwa cha majochero ghawo.