Read gitonga Yoele 1 Bible Online

Yoele 1 - gitonga bible

Yoele 1

¹Mazu gha Ambuya gho ghanguza kwaku Yoele mwana waku Petuele.

²Avwani ichi, imwe mwa ŵara, tegherezgani gutu, imwe mose muja mu charu! Kumbi chinthu chaviyo chikuŵako mu mazuŵa ghinu, pamwenga mu mazuŵa gha auskemwe?

³Konkhomiyani ŵana ŵinu ndi chenichi, ndipo ŵana ŵinu ŵakambiye ŵana ŵawo, ndi ŵana ŵawo ŵatauliye mgonezi unyake.

⁴Cho chasiyika ndi chiungu, charghika ndi zombe. Cho chasiyika ndi zombe, charghika ndi ŵaphanana. Cho chasiyika ndi ŵaphanana, charghika ndi matondo.

⁵Yukani, imwe ŵakuloŵe ndi muliye, nditenjeni, imwe mose mwa ŵakumwa vinyo, chifukwa cha vinyo mufya, pakuti watuzgikako ku mlomo winu.

⁶Chifukwa mtundu waza ndi kurwana ndi charu changu, wanthazi ndi wambura kuŵerengeka; weniwo minyu ghake ghenge nga nkharamu, wendi vibwanyu nge vya nkharamu yinthukazi.

⁷Wananga mphereska zangu, ndi kuswanuwa mikuyu yangu; wayikomo ndikularauwa makungwa ghake ndi kungapong'a pasi; mphanda zake zamira gwa.

⁸Tenjeni nge ndi mwali wavwala chigudulu muchiunu chifukwa cha murumi wapa umwali wake.

⁹Sembe ya vyakurgha ndi sembe ya vyakumwa zarekeka mu nyumba ya Ambuya. Ŵazukuru ŵatenje, ŵateŵeti ŵa Ambuya.

¹⁰Minda yanangika, charu chitenje, chifukwa trigu wanangika, vinyo wakamuka, mafuta ngamana.

¹¹Rengani soni mwa ŵalimi, tenjeni ŵalimi ŵa mphereska, chifukwa cha trigu ndi barile;[1] chifukwa chivuna mu minda chanangika.

¹²Mphereska zifota, mkuyu ufota. Muti wa zobara, kanchindwi, ndi masuku, miti ya mdondo yose yafota; ndi likondwa kulive ku ŵana ŵa ŵanthu.

¹³Vwarani chigudulu, muliye imwe ŵazukuru, tenjeni mwa ŵateŵeti ŵa jochero la sembe. Sereni, mwaŵakuvwala vigudulu ndi cherezgani usiku wose, owe! Mwa ŵateŵeti ŵaku Chiuta wangu! Chifukwa mpasku wa vyakurgha ndi mpasku wa vyakumwa vyagota ku nyumba yaku Chiuta winu.

¹⁴Patuwani zuŵa lakufunga kurgha mudane unganu wakupaturika. Unjikani ŵaraŵara ndi ŵakuja mu charu wose mu nyumba ya Ambuya Chiuta winu; ndi muliliye ku Ambuya.

¹⁵Owe, zuŵa liya! Chifukwa zuŵa la Ambuya laŵandika, nge ndi phasulu kutuliya kwaku Wanthazi zose, lituza.

¹⁶Kumbi vyakurgha asi vyamara pa maso pidu, mulive chimwemwe ndi likondwa mu nyumba yaku Chiuta widu?

¹⁷Mbeu yavunda pasi pa dongo, nyumba za vyakurgha zapasuka; nkhokwi zabwanganduka chifukwa mbeu zatondeka kukoma.

¹⁸Vyakuŵeta viragha, miskambu ya ng'ombe yazingariwa chifukwa chipozwa kulivi; chingana ndi miskambu ya mberere njakutomboroka.

¹⁹Ambuya, ndililiya imwe. Chifukwa moto wawocha vipozwa mu dondo, ndi mlipu wawocha miti yose mu dondo.

²⁰Chingana ndi nyama za mu dondo zilili ya kwaku imwe chifukwa misinji yakamuka, ndipo moto wawocha uteka wamu dondo.