Read gitonga Amosi 3 Bible Online

Amosi 3 - gitonga bible

Amosi 3

¹Vwani mazu yagha Ambuya akamba kususka imwe, mwa ŵanthu ŵaku Yisraele kususka mbumba yose yo ndikutuzga mu charu cha Egipiti:

²“Imwe pe ndimwe ndakuziŵani mu mbumba zose zapa charu chapasi; mu chifukwa ichi ndimulangeninge chifukwa cha mauheni ghinu ghose.

³“Kumbi ŵaŵi ŵayende pamoza, asani ŵalivi kuzomerezgana?

⁴Kumbi nkharamu yingabangula mudondo, asani yilivi nyama? Kumbi mwana wa nkharamu wabangula ku mphanji yake asani walivi kurgha kanthu?

⁵Kumbi chiyuni chingawira muchiŵana cha pasi kwambura mtazi wakuchithyiya? Kumbi mtazi ungandindimiya kutuwa pa chiŵana, asani ulivi konja kanthu?

⁶Kumbi mbata yingambika mumsumba, ndipo ŵanthu ŵangareka kopa? Kumbi chiheni chingaŵamo mu msumba, kwambura kuti chachitika ndi Ambuya?

⁷Nadi Ambuya Chiuta kuti wachita kanthu cha kakuwubende, kwambura kuti wadanga wakavumbuliya ku ŵateŵeti ŵake ŵamchimi.

⁸Nkharamu yichibangula; ndiyani wareka kopa? Ambuya Chiuta wakamba; ndiyani wangareka kuchima?”

⁹Wandiskani mu malinga mu Asiriya ndi mu malinga mu charu cha Egipiti, kuti, “Unganani pa mapiri gha Samaria, ndi muwone vivurupi vikuru mukati mwake, ndi visuzgu mukati mwake.”

¹⁰“Kuti ŵaziŵa cha kuchita urunji,” atiti Ambuya, “wo ŵalonga vivurupi ndi kuphanga mu malinga ghawo.”

¹¹Chifukwa ichi, atiti Ambuya Chiuta: “Kupindikana kukazingirizganga charu, ndipo kukasiskiyanga pasi nthazi yako, ndipo malinga ghako ghamuphangika.”

¹²Viyo atiti Ambuya: “Nge ndimliska wapokeska vigha viŵi, pamwenga chipikita cha gutu kutuwa mu mlomo wa nkharamu, viyo ndimo ŵaYisraele wo ŵaja mu Samaria ŵamufwanthamukiya, ndi nyondo ya kachita ndi chita chikuru.”

¹³“Vwani, ndi simikizgani ndi nyumba yaku Yakobe,” atiti Ambuya Chiuta, Chiuta wa maŵanja,

¹⁴“kuti, pa zuŵa lenilo ndilangenge Yisraele chifukwa cha ulakwi wake, ndilangenge so majochero gha Betele, ndi masengwe gha majochero ghakadumulikanga, ndikuwa pasi.

¹⁵Nkhapumanga nyumba ya chifuku ndi nyumba ya chihanya; ndi nyumba za minyanga, zikanangikanga, ndipo nyumba zikuru zamumara,” atiti Ambuya.