Read gitonga Amosi 5 Bible Online

Amosi 5 - gitonga bible

Amosi 5

¹Vwani mazu yagha ndikutoriyani mu chitenje, nyumba yaku Yisraele!

²“Ŵakusankhika ŵangu ŵaYisraele ŵawa ndipo kuti ŵakayukanga so cha ŵasiyika pa charu chawo palivi wakuŵayuska!”

³Chifukwa atiti Ambuya Chiuta: “Msumba wo ungutuwa ndi chikwi chimoza (1,000), ukaŵanga ndi machumi pe chumi (100) ŵakujapo, ndi wo ungutuwa ndi machumi pe chumi (100) ukaŵanga ndi chumi limoza (10) ŵakujapo, ku nyumba yaku Yisraele.”

⁴Chifukwa atiti Ambuya ku nyumba yaku Yisraele:

⁵“Penjani ine ndipo muŵenge ŵamoyo; kweni mungapenjanga Betele, ndipo mungaserenga mu Gilgala cha, pamwenga kujumpha Beresheba; chifukwa Gilgala wakarutanga nadi ku umkoli, ndi Betele nayo wasandukenge chawaka.”

⁶Penjani Ambuya ndipo muŵenge ŵamoyo, vinu angakole nge ndi moto mu nyumba yaku Yosefe, ndiyinganyeka ndi pangaŵavi yumoza wamuzimwiyenge moto wo Betele.

⁷Imwe musanduska cheruzgu kuŵa cha kuŵaŵa, ndi kutaya pasi urunji!

⁸Yo wangupanga chirimila ndi mauta ndi wasanduska mdima kuŵa mlenji; ndi kufipiska msana kuŵa usiku, yo wadana maji gha nyanja ndi kughapunguriya pa chisku cha charu chapasi, Ambuya ndilo zina lawo,

⁹yo wachita pharghaniko kumweturiya pa ŵanthazi, mwakuti pharghaniko lize pa linga.

¹⁰Ŵatimutinkha yo wachenya mu likomo, ndi ŵanyanyara nayo yo wakamba uneneska.

¹¹Chifukwa nchakuti mukandirizga ŵakavu, ndi kupoka mithulu yawo ya trigu, mwazenga nyumba za mya yakusema; kweni kuti mujengemo cha; mwalima minda ya mphereska yakukondweska; kweni kuti mukamwanga vinyo wake cha.

¹²Chifukwa ndiziŵa unandi wamaulakwi ghinu ndi ukuru wa mphuru-puru zinu; imwe musuzga ŵarunji, imwe muronde vinda, ndi kupatuska ŵakavu mu likomo.

¹³Chifukwa ichi ŵakuchenje ŵamujachete mu nyengo yeniyo; chifukwa ndi nyengu yiheni.

¹⁴Penjani umampha, uheni cha, kuti muŵe ŵamoyo; viyo Ambuya Chiuta wa maŵanja, wakaŵanga namwe, nge ndimo mwakambiya.

¹⁵Tinkhani uheni, ndi yanjani umampha, ndi mumike urunji mulikomo; pamwenga Ambuya, Chiuta wa maŵanja, wangaŵa ndi lisungu, ndi ŵakujako ŵaku Yosefe.

¹⁶Chifukwa ichi atiti Ambuya, Chiuta wa maŵanja, Ambuya: “Mu maluluwa mose mukaŵangachitenje; ndipo mu ŵagurwi wose ŵakatinge, ‘Owe! owe!’ Ŵakadananga ŵalimi kuzachiliya ndi kwazachiliya ndi wo mbakugozga mu chitenje,

¹⁷ndi mu minda yose ya mphereska mukaŵanga chitenje, chifukwa ndidumuwenge mukati mwinu,” atiti Ambuya.

¹⁸Owe; kwaku imwe mukhumba zuŵa la Ambuya! Chifukwa nchine mukhumba kuŵa ndi zuŵa la Ambuya? Ndi mdima, kuti mbukweru cha;

¹⁹kwenge ndipa munthu wanguthaŵa ku nkharamu ndipo wangukumana ndi chipembere; pamwenga wangusere mu nyumba ndi kunyekezga janja lake ku chimati, ndipo njoka yingumuruma.

²⁰Asi zuŵa la Ambuya ndi mdima, ndi kuti mbukweru cha, ndi la mfufu lambura chingana mbukweru?

²¹“Nditinkha, ndiyeya madghera ghinu, ndipo kuti ndikondwa ndi maunganu ghinu ghakupaturika cha.

²²Chingana mundipaska sembe zinu zakocha ndi sembe zinu za vyakurgha kuti ndizirondiyenge cha, ndi sembe zinu za chimangu za nyama zinu zakututuŵa kuti ndizilereskenge cha.

²³Tuzganiku kwaku ine chiwawa cha sumu zinu; kambidu ka ŵazezeŵinu kuti nditegherezgenge cha.

²⁴Kweni rekani uneneska wendi nge ndi maji, ndi urunji nge ndi msinji wakupopoma mazuŵa ghose.

²⁵“Kumbi mungupereka kwaku ine sembe ndi mipasku mu virimika machumi ghanayi (40) mubozwa, mwa nyumba yaku Yisraele?

²⁶Mukatonga Sakuti karonga winu, ndi Kaiwana chiuta winu wa nyenyezi, vikozgo vinu, vyo mungujipangiya;

²⁷chifukwa ichi nkhamutoriyaninga ku uŵanda kujumpha Damasko,” atiti Ambuya mweniyo zina lake ndi Chiuta wa maŵanja.