Read gitonga Obadiya 1 Bible Online

Obadiya 1 - gitonga bible

Obadiya 1

¹Chiwona chaku Obadiya. Viyo atiti Ambuya Chiuta ndi Edomu: Tavwa makani gho ghatuliya ku Ambuya, ndipo thenga latumika mukati mu mitundu: “Yukani! tiyeni timuyukiye kurwana nayo nkhondo!”

²Ehe, nkhakuŵikanga kuŵa mumana mukati mu mitundu, ukayuyurikanga ukongwa.

³Kujikuzga kwa mtima wako kwaupusika, iwe uja mu zimphanji za majarawi, wamweniwe malo ghako ghakujapo ghe pachanya, iwe mu mtima wako ukamba, “Njani wandisiskiyenge pasi pa dongo?”

⁴Chingana utijitukumuwa wija nge ndi nombo, chingana chivimbo chako che mukati mu nyenyezi, ndikusiskiyenge pasi, atiti Ambuya.

⁵Asani ŵankhungu ŵanguza kwako, ndi asani ŵakuskoŵa ŵanguza ndi usiku owe! kupasuka viŵi! kumbi kuti ŵatinge ŵabenge cha vyakuŵakwana? Asani ŵakupontho mphereska ŵanguza kwako kuti ŵatinge ŵasiyengeko zakujaliya cha?

⁶Mo vyaku Esau vyatoleke, usambasi wake wapenjeka!

⁷Ŵanthu wose wo ŵenga pa chimangu ndi iwe ŵakupusika, ŵakudikiskiya ku mphaka; wose wo ŵenga pa phangano nawe ŵakugoda; ŵabwezi ŵako ŵamagomekezgeka ŵakuthya msampha kusi kwako kuti iwe uziŵa ndi ichi cha.

⁸Kumbi mu zuŵa lo ndirekenge, atiti Ambuya, kuparghang'a ŵavinjeru ŵaku Edomu, ndi ŵazeru mu phiri laku Esau?

⁹Ndi vinkhara vinu vimarenge nthazi, owe Temana, viyo kuti munthu yose waku phiri laku Esau wadumulike ndi kubayika.

¹⁰Chifukwa cha phuzu lako lo unguchitiya mbali wako Yakobe, soni zikukonge, ndipo ubayikeyenge limu.

¹¹Pa zuŵa lo unguma pade, pa zuŵa lo ŵalendo ŵanguskoŵa vyuma vyake, ndi ŵakwenda ŵangusere mu malikomo ghake ndi kuchitiya mphenduzga Yerusalemu, iwe wengenjumoza waku wo.

¹²Kweni iwe, mphanyi ungwene ndi zuŵa la mbali wako, zuŵa la soka lake; kuti mphanyi wakondwa cha ndi ŵanthu ŵaku Yuda mu zuŵa la pharghaniko lawo; kuti mphanyi wajikuzga cha, mu zuŵa la suzgu.

¹³Mphanyi ungureka kusere mu malikomo gha ŵanthu ŵangu mu zuŵa la soka lake, mphanyi ungureka kukondwa pa suzgu yake mu zuŵa la soka lake; pamwenga kuskoŵa chuma chake mu zuŵa la soka lake.

¹⁴Ndipo mphanyi kuti unguma mu nthowa cha kubaya ŵake wo ŵathaŵanga; pamwenga kuti, mphanyi ungupereka cha wo ŵangujapo mu zuŵa la suzgu.

¹⁵Chifukwa zuŵa la Ambuya laŵandika pa mitundu yose. Nge ndimo wachitiya, viyo ndimo kuchitikiyenge kwako, nchitu zako ziwezgeke pa mutu wako.

¹⁶Chifukwa nge ndimo mwamwiya pa phiri langu lakupaturika, viyo ndimo mitundu yose yakuzunguriya yikamwiyanga kwambura kurekezga; ŵamwenge, ndi kumeza, ndipo ŵaŵenge nge ŵengako cha.

¹⁷Kweni mu phiri Zioni mukaŵanga wo ŵapozomoka, ndipo liŵenge lakupaturika; ndipo ŵamu nyumba yaku Yakobe ŵaŵenge navyo vihara vyawo ndi vyawo.

¹⁸Nyumba yaku Yakobe yiŵenge moto, ndi nyumba yaku Yosefe mlipu; ndipo yaku Esau yiŵenge viputu; ŵakaviwochanga ndi kuvimara, ndipo paulengevi ŵakujapo ŵamu nyumba yaku Esau; chifukwa Ambuya akamba.

¹⁹Ndipo ŵaku Negebe ŵakarondanga phiri laku Esau, ndi wo ŵaku Shefela charu cha ŵaFilisti, ŵakarondanga charu chaku Efraimu ndi charu chaku Samaria, ndi Benjamini wakarondanga Gileada.

²⁰Ndipo ŵamikoli wo ŵemu Hala ŵamu mzinda wa ŵanthu ŵaku Yisraele, ŵakarondanga Filistia mpaka ku Zarefata; ndipo ŵamikoli ŵaku Yerusalemu, wo ŵemu Safarada, ŵakarondanga misumba yaku Negebe.

²¹Ŵakutaska ŵakakweriyanga ku phiri Zioni kweruzga phiri laku Esau; ndipo ufumu uŵenge wa Ambuya.