Read gitonga Yona 1 Bible Online

Yona 1 - gitonga bible

Yona 1

¹Sono mazu gha Ambuya ghanguza kwaku Yona mwana waku Ambitayi, ghakuti,

²“Soka, ruta ku Nineve, msumba ukuru, ndi ukadanirizge ku ususka, pakuti uheni wawo wakwere paurongo pangu.”

³Kweni Yona wangusoka kuthaŵiya ku Tarshishi, kutuwapo paurongo pa Ambuya wangusikiya ku Yopa, ndi wangusaniya ngarawa yakulazgiya ku Tarshishi. Viyo wanguripa maripiro pakiyo, ndi wangusere mwaku yo, kuruta nawo ku Tarshishi, kuthaŵa paurongo pa Ambuya.

⁴Kweni Ambuya angutuma mphepo yikuru pa nyanja, ndipo kwenga lirondo lanthazi pa nyanja, viyo ngaraŵa yenga pafupi kusweka.

⁵Viyo ŵakwendeska ŵangopa, ndipo munthu yose wangudanirizga kwaku chiuta wake; ndi ŵangupong'a katundu yose yo wenga mu ngaraŵa kuyipepuska. Kweni Yona wangusikiya pasi mukati mwa ngarawa, ndipo wangura, ndikugona weniukongwa.

⁶Viyo nduna ya ngarawa yinguza kwake ndi yinguti kwaku iyo, “Ung'anamuwanji iwe pakugona? Yuka, dana kwaku Chiuta wako! Vinu Chiuta wako wangatikumbuka kuti tireke kuyowa.”

⁷Ndipo wanguti yose ku munyake, “Zaninge, ndi tichite mphenduzga, mwakuti tiziŵe chifukwa nchakuyani uheni uwu watiwiya.” Viyo ŵanguchita mayera, ndipo mayera ghanguwa paku Yona.

⁸Viyo ŵanguti kwaku iyo, “Tinene chifukwa nchakuyani uheni uwu watiwiya ifwe? Kumbi mlimu wako ngune? Ndipo waturiya nunkhu? Charu chako ndi ninchi? Ndipo ndiwe waku ŵanthu naŵa?”

⁹Ndipo wanguti kwaku iwo, “Ndine mu Hebere ndipo nditopa Ambuya, Chiuta wa kuchanya, yo wakwata nyanja ndi mtunda.”

¹⁰Viyo ŵanthu yaŵa ŵangopa weniukongwa ndipo ŵanguti kwaku iyo, “Nchine cho wachita?” Chifukwa ŵanthu ŵanguziŵa kuti wathaŵa paurongo pa Ambuya, chifukwa wanguŵanene.

¹¹Ndipo ŵanguti kwaku iyo, “Kumbi tingachitanji kwaku iwe, kuti nyanja yitiŵiye bata?” Chifukwa Nyanja yinguyuka ukongwa ndi mphepo ya lirondo.

¹²Ndipo wanguti kwaku iwo, “Ndinyamuweni, ndipo ndipong'eni mu nyanja; viyo nyanja yimuŵiyeninge bata; chifukwa ndiziŵa kuti nchifukwa changu leka lirondo ili lamuwiyani.”

¹³Ndipuuli ŵanthu yaŵa ŵangwesa kuvuŵa kwakulimba kuwezge ngaraŵa ku mtunda, kweni ŵangutondeka, chifukwa nyanja yinguyuka ukongwa ndi kuŵapome.

¹⁴Chifukwa ichi, ŵanguliriya ku Ambuya, ndi ŵanguti, “Timuŵeyereni, Ambuya, tingafwa cha chifukwa cha umoyo wa munthu uyu ndipo mungaŵikanga paku ifwe cha ndopa zambura kalema; chifukwa ndimwe, Ambuya, mwachita cho nchakumukondweskani imwe.”

¹⁵Viyo ŵangumunyamuwa Yona, ndi ŵangumupong'a mu nyanja; ndipo nyanja yingureka kupoma.

¹⁶Ndipo ŵanthurumi ŵangopa Ambuya weniukongwa, ndipo ŵangupereka sembe ku Ambuya, ndi ŵangurapa marapo.

¹⁷Ndipo Ambuya angutuma chisomba chikuru kumeza Yona; ndipo Yona wenga mu nthombo ya chisomba mazuŵa ghatatu ndi mausiku ghatatu.