Read gitonga Yona 4 Bible Online

Yona 4 - gitonga bible

Yona 4

¹Kweni chingumukwiyiska ukongwa Yona, ndi wangukalipa.

²Ndipo wanguromba ku Ambuya ndi wanguti, “Ndimurombani, Ambuya, ndatinge uku ndiko kunguŵa kukamba kwangu, penipo ndenga ndeche mu charu changu? Pa chifukwa cho ndinguthaŵiya ku Tarshishi; chifukwa ndinguziŵa kuti ndimwe Chiuta walisungu, ndi wawezi, wachizita kukalipa, ndipo wakuzala chanju, ndi wakugowoke uheni.

³Chifukwa cho sono Ambuya, ndimuŵeyani tuzganimo mwangu umoyo wangu, pakuti nkhwamampha kwangu kufwa kuruska kuja wamoyo.”

⁴Viyo Ambuya anguti, “Kumbi wachita umampha kukalipa?”

⁵Viyo wangutuwa mu msumba wanguja pasi ku chigaŵa chakuvuma kwa msumba, ndi wangujizenge kwenikuwa musasa. Wanguja pasi mukati mwake mu muduzi, mpaka wawone cho chingaŵako ku msumba.

⁶Ndipo Ambuya Chiuta wangunozga mono, ndipo wanguyinozge kuti yiŵi pachanya paku Yona, kuti yimuŵiye muduzi pamutu wake, kumutaska ku suzgu yake. Viyo Yona wangukondwa weniukongwa ndi mono.

⁷Kweni penipo chiumbu chingutuwa ndi mlenji, Chiuta wangunozga chiungu cho chingurgha mono yo, viyo yingufota.

⁸Ndipo kunguŵa, penipo lumwi lingutuwa, Chiuta wangunozga mphepo yachifundizi yakuvuma, ndipo lumwi lingumocha pa mutu Yona, wanguziririka; ndipo wanguromba, ndi wanguti, “Nkhwamampha kuti ndifwe kuruska kuja wamoyo.”

⁹Ndipo Chiuta wanguti kwaku Yona, “Kumbi uchita umampha kukalipa chifukwa cha mono?” Ndipo Yona wanguti, “Ndachita umampha kukalipa, chingana ndingafwa.”

¹⁰Ndipo Ambuya anguti, “Iwe, unguwa ndi lisungu ndi mono, yeniyo kuti ungutakatakiya cha, chingana nkhuyikuzga, yo yingukuwa mu usiku, ndi kumara mu usiku.

¹¹Kumbi kuti nditenere kugowoke Nineve cha, msumba uwa ukuru, mwenimo ŵanthu ŵaruska vikwi machumi pe chumi pachanya vikwi machumi ghaŵi (120,000) wo mbambura kuziŵa mupambano pakati pa janja lawo la marghe ndi janja lawo la maze, ndipo so ng'ombe zinandi?”