Read gitonga Maŵerengedu 1 Bible Online

Maŵerengedu 1 - gitonga bible

Maŵerengedu 1

¹Ambuya angurongoro ndi Mosese mu bozwa la Sinai, mu hema lakuwunganamo, pa zuŵa lakudanga mu mwezi wa chiŵi chirimika cha chiŵi ŵanguti ŵatuwa mu charu cha Egipiti, anguti,

²“Ŵerenga wumba wose wa ŵaYisraele, mbumba zawu, ndi nyumba za auskeu, kuŵerenga ndi mazina, gha ŵanthurumi wose, yumoza yumoza;

³kuŵerenga wo ŵendi virimika machumi ghaŵi ndi kuruska po, wose wo mbakwenere kurwa nkhondo mu Yisraele, iwe ndi Aroni muŵaŵerenge mpingu ndi mpingu.

⁴Ndipo pamoza namwe waŵepo munthu yumoza wafuko le lose, yose wakuŵa mura mu nyumba za auskeu.

⁵Ndipo mazina ghaku wo ŵakamanga pamoza namwe ndi yagha. Ŵafuko laku Rubene, Elizuru mwana waku Shedeuru;

⁶waku Simeoni, Shelumiele mwana waku Zurishadai;

⁷waku Yuda, Nashoni mwana waku Aminadabu;

⁸waku Isakara, Netanele mwana waku Zuara,

⁹waku Zebuluni, Eliabu mwana waku Helono;

¹⁰kutuwa mu ŵana ŵaku Yosefe, kwaku Efraimu, Elishama mwana waku Amihudu, ndipo kutuwa kwaku Manase, Gamaliele mwana waku Gadazuru;

¹¹kutuwa kwaku Benjamini; Abidana mwana waku Gideoni;

¹²waku Dani, Ahiezere mwana waku Amishadayi;

¹³waku Ashere, Sagiele mwana waku Okorana;

¹⁴waku Gadi, Eliasafa mwana waku Daguole;

¹⁵waku Naftali, Ahira mwana waku Enana.

¹⁶Yaŵa ndiwo ŵangutondoreka kutuliya mu mpingo, ŵarongozgi ŵa mafuko gha auskeu, ŵara ŵa ŵaYisraele.”

¹⁷Mosese ndi Aroni wanguto ŵanthu yaŵa ŵazumbulika mazina.

¹⁸Ndipo ŵanguwungana wose pamoza pa zuŵa la kudanga la mwezi wa chiŵi, wanguwakonkhoske ŵaseko ŵawo mbumba ndi mbumba kwakuyana ndi nyumba za auskeu wanguŵaŵerenga yumoza yumoza, ndi kuzumbuwa mazina ghawo kwamba wa umoyo wa virimika machumi ghaŵi ndi kuruska po,

¹⁹ndimu Ambuya angulanguliya Mosese. Ndimu wanguŵaŵerenge mu bozwa la Sinai.

²⁰Ŵina Rubene, mwana waumwali waku Yisraele, migonezi yawo, ndi mbumba zawo, mu nyumba za auskeu, kwakuyana ndi unandi wa mazina ghawo, yumoza yumoza, munthurumi we yose kwamba wa virimika machumi ghaŵi ndi kuruska po, wo ŵangaziŵa kurwa nkhondo:

²¹ŵina Rubene ŵanguŵerengeka ŵenga vikwi machumi ghanayi ndi vinkhonde ndi chimoza pachanya machumi pe chumi ghankhonde (46,500).

²²Ŵina Simeoni, migonezi yawo ndi mbumba zawo, mu nyumba za auskeu, wo ŵanguŵerengeka, kwakuyana ndi unandi wa mazina ghawo, yumoza yumoza munthurumi yose wa virimika machumi ghaŵi ndi kuruska po, wose wo ŵanguziŵa kurwa nkhondo:

²³Ŵina Simeoni ŵenga vikwi machumi ghankhonde ndi vinkhonde ndi vinayi pa chanya machumi pe chumi ghatatu (59,300).

²⁴Ŵina Gadi, migonezi yawo, ndi mbumba zawo, mu nyumba za auskeu, kwakuyana ndi unandi wa mazina ghawo, ŵa virimika machumi ghaŵi ndi kuruska po, wose wo ŵangaziŵa kurwa nkhondo:

²⁵Ŵina Gadi ŵenga vikwi machumi ghanayi ndi vinkhonde pachanya machumi ghankhonde ndi limoza ndi machumi ghankhonde (45,650).

²⁶Ŵina Yuda migonezi yawo ndi mbumba zawo mu nyumba za auskeu ndi unandi wa mazina ghawo, munthurumi yose wa virimika machumi ghaŵi ndi kuruska po wo ŵanguziŵa kurwa nkhondo:

²⁷Ŵina Yuda ŵenga vikwi machumi ghankhonde ndi ghaŵi ndi vinayi pachanya machumi pe chumi ghankhonde ndi limoza (74,600).

²⁸Ŵina Isakara, migonezi yawo, ndi mbumba zawo, mu nyumba za auskeu, kwakuyana ndi unandi wa mazina ghawo. Munthurumi yose wa virimika machumi ghaŵi ndi kuruskapo wose wo ŵangaziŵa kurwa nkhondo:

²⁹ŵina Isakara ŵenga machumi ghankhonde ndi vinayi pachanya machumi pe chumi ghanayi (54,400).

³⁰Ŵina Zebuluni, migonezi yawo ndi mbumba zawo, mu nyumba za auskeu kwakuyana ndi unandi wa mazina ghawo, ŵa virimika machumi ghaŵi ndi kuruska po wo wose wanguziwa kurwa nkhondo:

³¹ŵina Zebuluni ŵenga vikwi machumi ghankhonde ndi vinkhonde ndi viŵi pachanya machumi pe chumi ghanayi (57,400).

³²Ŵina Yosefe, wo mbena Efraimu, migonezi yawo, ndi mbumba zawo, mu nyumba za auskeu, unandi wa mazina ghawo, yose wakuŵa ndi virimika machumi ghaŵi ndi kuruska po, wo wose ŵangaziŵa kurwa nkhondo:

³³ŵina Efraimu ŵenga vikwi machumi ghanayi pachanya machumi pe chumi ghankhonde (40,500).

³⁴Ŵina Manase, migonezi yawo, ndi mbumba zawo mu nyumba za auskeu, unandi wa mazina ghawo, yose wa virimika machumi ghaŵi ndi kuruska po, wose wo ŵanguziŵa kurwa nkhondo:

³⁵Ŵina Manase ŵenga vikwi machumi ghatatu ndi viŵi, pachanya machumi pe chumi ghaŵi (32,200).

³⁶Ŵina Benjamini, migonezi yawo, ndi mbumba zawo, mu nyumba za auskeu, ndi unandi wa mazina ghawo, yose wakuŵa wa virimika machumi ghaŵi ndi kuruska po, wose wo ŵanguziŵa kurwa nkhondo:

³⁷ŵina Benjamini ŵenga vikwi machumi ghatatu ndi vinkhonde pachanya machumi pe chumi ghanayi (35,400).

³⁸Ŵina Dani migonezi yawo, ndi mbumba zawo, mu nyumba za auskeu, unandi wa mazina ghawo, munthu yose wa virimika machumi ghaŵi ndi kuruska po, wo ŵangaziŵa kurwa nkhondo:

³⁹Ŵina Dani ŵenga vikwi machumi ghankhonde ndi limoza ndi viŵi, pachanya machumi pe chumi ghankhonde ndi ghaŵi (62,700).

⁴⁰Ŵina Ashere, migonezi yawo, ndi mbumba zawo, unandi wa mazina, yose wa virimika machumi ghaŵi ndi kuruska po, wanguziŵa kurwa nkhondo:

⁴¹ŵina Ashere ŵenga vikwi machumi ghanayi ndi chimoza pachanya machumi pe chumi ghankhonde (41,500).

⁴²Ŵina Naftali, migonezi yawo, ndi mbumba zawo, mu nyumba za auskeu, ndi unandi wa mazina, yose wa virimika machumi ghaŵi ndi kuruska po, wo ŵanguziwa kurwa nkhondo:

⁴³ŵina Naftali ŵenga vikwi machumi ghankhonde ndi vitatu pachanya machumi pe chumi ghanayi (53,400).

⁴⁴Yaŵa ndi ŵeniwo ŵanguŵerengeka, wo Mosese ndi Aroni pakovyana ndi ŵarongozgi chumi ndi ŵaŵi ŵa ŵaYisraele ŵanguŵerenga, yose wangumiya nyumba ya auskeu.

⁴⁵Viyo ŵina Yisraele wose ŵa virimika machumi ghaŵi ndi kuruska po, wose wo ŵanguziŵa kurwa nkhondo.

⁴⁶Ŵenga vikwi machumi pe chumi ghankhonde ndi limoza ndi vitatu pachanya machumi pe chumi ghankhonde ndi machumi ghankhonde (603,550).

⁴⁷Kweni ŵa fuko laku Levi kuti ŵanguŵerengeka pamoza nawo cha.

⁴⁸Pakuti Ambuya anguti kwaku Mosese,

⁴⁹“Ndi fuko laku Levi pe lenilo murekenge kuliŵerenga, nanga nkhukonkhoska mbaringa unandi mu Yisraele;

⁵⁰kweni utondonge, ŵaLevi kuŵa ŵakusunga chihema chachisimikizgu, ndi viyaŵi vyake vyose, ndi vyose vyakuŵamo, ndiwo ŵakapinganga chihema cho ndi vyakutataliya vyake vyose, ndiwo ŵakachiphwerenga, ndipo ŵakamikanga mahema ghawo kuchizingirizga cho.

⁵¹Asani ŵarutenge nacho chihema, wo ŵakachijinthuwanga mbaLevi; ndipo asani chikamikikanga chihema cho, wo ŵakachimikanga mbaLevi. Ndipo asani waŵengepo munyake wakundere kufupi, wakabayikanga.

⁵²ŴaYisraele ŵamikenge mahema pa ugoŵi wake ndi yose pa ndembera yake;

⁵³kweni ŵaLevi ŵakagoŵanga kwakuzunguliya chihema chachisimikizgu mwakuti paulevi kusikiyakandundu pa mpingu wa ŵaYisraele; ndipo ŵaLevi ŵakatufuliyanga chihema chachisimikizgu.”

⁵⁴Ndipo ŵaYisraele ŵanguchita vyose; ŵanguchita kwakuyana ndimo Ambuya angulanguliya Mosese.