Read gitonga Maŵerengedu 10 Bible Online

Maŵerengedu 10 - gitonga bible

Maŵerengedu 10

¹Ndipo Ambuya angurongoro ndi Mosese,

²“Ujichitiye mbata ziŵi za siliva uchite zakusula; ziŵe zakudana ŵanthu pakuwungana, ndi kuchiska pa ugoŵi kwenda ulendo,

³ndipo asani ŵamba mbata zose ziŵi; penipo wumba wose uwunganenge kwako pa khomo la hema lakuwunganamo.

⁴Kweni asani wamba mbata yimoza pe, ŵarongozgi wo mbara ŵa mafuko gha ŵaYisraele, ŵawunganenge kwako.

⁵Asani wamba mumemezu wamu ugoŵi, wo ŵe kuchiri kuvuma ŵakasokanga kudanjiyapo.

⁶Asani wamba mumemezu kachiŵi, ŵamu ugoŵi ŵakuchiri ku malaŵi ŵakasokanga lwendo lawo. Ŵamemeze kuchiska lwendo lawo.

⁷Kweni asani wumba uwunganenge pamoza, ukambanga, kweni kuchita mumemezu cha.

⁸Ndipo ŵana ŵaku Aroni ŵazukuru, ŵakambanga zimbata. Kumba mbata zo viyo likaŵanga dangu kwinu muyaya mu migonezi yinu yose.

⁹Ndipo asani muruta ku nkhondo mu charu chinu kwachirwa ndi wakupindikana winu yo watimusuzgani, po ndipo mukambanga mumemezu ndi zimbata alinga kuti mukumbukike ndi Ambuya Chiuta winu, ndi kutaskika ku ŵarwani ŵinu.

¹⁰Ndipo so mu zuŵa linu lalikondwa, ndi pa madghera ghakutemeka, ndi pa kwamba kwa myezi yinu, mukambanga zimbata pa mipasku yinu yakocha ndi pa sembe zinu za mipasku ya chimangu; vikuŵiyeni chikumbusku paurongo pa Ambuya: Ine ndine Ambuya Chiuta winu.”

¹¹Ndipo pa zuŵa la machumi ghaŵi, la mwezi wa chiŵi, mu chirimika cha chiŵi, mtambo ungutuzgikapo pa chihema cha chisimikizgu,

¹²ndipo ŵaYisraele ŵangwenda maulendo ghawo kutuwamo mu mabozwa gha Sinai; ndipo mtambo unguma mu mabozwa gha Parana.

¹³Pakudanga ŵangwenda ulendo wawo kwakulingana ndi dangu la Ambuya kuziya mwaku Mosese.

¹⁴Ŵakudanga kusoka ulendo ŵenga ŵandembera ya ugoŵi ŵa ŵina Yuda mu maliŵanja ghawo ndipo wakutufuliya chiliŵanja chose wenga Nashoni mwana waku Aminadaba.

¹⁵Ndipo wakutufuliya chiliŵanja cha ŵina Isakara wenga Netanele mwana waku Zuara.

¹⁶Wakutufuliya chiliŵanja cha ŵina Zebuluni wenga Eliaba mwana waku Heloni.

¹⁷Ndipo penipo chihema chakupaturika chingujinthulika ndipo ŵina Gershoni ndi ŵina Merari, ŵangusoka ulendo, ŵakunyamuwa chihema cho.

¹⁸Ndipo ŵamu ugoŵi wa ŵina Rubene ŵangusoka ndi ndembera yawo liŵanja ndi liŵanja ndipo wakutufuliya chiliŵanja cho ndi Elizuru mwana waku Shedeuru.

¹⁹Ndipo wakutufuliya chiliŵanja cha ŵina Simeoni wenga Shelumiele mwana waku Zurishadai.

²⁰Ndipo wakutufuliya chiliŵanja cha ŵina Gadi wenga Eliasafa mwana waku Deule.

²¹Sono ŵina Kohati ŵangusoka, ŵakupinga, vinthu vya malo ghakupaturika, chihema chingukhomeka iwo ŵenga ŵandafike.

²²Ndipo ŵa ugoŵi wa ŵina Efraimu ŵangusoka ndi ndembera yawo liŵanja ndi liŵanja; wakutufuliya chilaŵanja wenga Elishama mwana waku Amihudu.

²³Ndipo wakutufuliya chiliŵanja cha ŵina Manase wenga Gamaliele mwana waku Pedazuru.

²⁴Wakutufuliya chiliŵanja cha ŵina Benjamini wenga Abidana mwana waku Gedeoni.

²⁵Sono wa ugoŵi wa ŵina Dani ŵangusoka, ŵangwenda kuvuli kwa ma ugoŵi ghose, ndi ndembera yawo liŵanja ndi liŵanja, wakutufuliya chiliŵanja cho wenga Ahiezere mwana waku Amishadai.

²⁶Wakutufuliya chiliŵanja cha ŵina Ashere wenga Pagiele mwana waku Okorana.

²⁷Ndipo wakutuliya chiliŵanja cha ŵina Naftali wenga Ahira mwana waku Enana.

²⁸ŴaYisraele ŵangwenda viyo liŵanja ndi liŵanja pakusoka.

²⁹Ndipo Mosese wangurongoro ndi Hobabu mwana waku Reuele mwina Midiani, musibweni waku Mosese kuti, “Iwe tirute ku charu cho Ambuya anguti, ‘Ndachipaska kwaku imwe’; urutenge nafwe, ndipo tikakuphwerenga; pakuti Ambuya akurongoro umampha paku Yisraele.”

³⁰Kweni iyo wanguti, “Kuti ndikarutanga cha; ine ndikarutanga ku charu changu ku ŵanyangu.”

³¹Ndipo Mosese wanguti, “Chondi ungatisiyanga cha, chifukwa uziŵa mo tikagoŵiyanga mu mabozwa, ndipo iwe ukatiŵiyanga maso ghidu.

³²Sono asani ukarutanga nafwe, iku chamampha che chose cho Ambuya atichitiyenge ifwe, nafwe tamukukuchitiya chenicho.”

³³Viyo ŵangusoka pa phiri la Ambuya ŵangwenda ulendo wa mazuŵa ghatatu; ndipo Bokosi la chisimikizgu la Ambuya linguŵadanjiriya pa ulendo uwu wa mazuŵa ghatatu, kwachipenja malo gha chipumulu chawo.

³⁴Mtambo wa Ambuya wenga pachanya pawo ndi msana ŵachiruta kutuliya pa ugoŵi.

³⁵Ndipo kunguŵa lichisoka Bokosi, Mosese wanguti, “Sokani, Ambuya, ŵambininike ŵamawongo ŵinu; ndipo wose ŵakukutinkhani ŵathaŵe paurongo pinu.”

³⁶Ndipo penipo linguma, ŵanguti, “Weni, Ambuya, ku ŵanthu ŵinu ŵaYisraele ŵa vikwi vikwi machumi.”