Read gitonga Maŵerengedu 15 Bible Online

Maŵerengedu 15 - gitonga bible

Maŵerengedu 15

¹Ambuya angurongoro ndi Mosese kuti,

²“Uŵanene ŵaYisraele, asani mwachifika mu charu cho mwamujamo, cho ndikukupaskani,

³ndipo mupereka ng'ombe pamwenga mberere kuŵa mpasku wapa moto pamwenga mpasku wakocha pamwenga sembe ku Ambuya, kufiska rapu pamwenga nge ndi mpasku wa wanangwa, pamwenga sembe ya panyengu zakutemeka za madghera, kuŵachitiya Ambuya fungu lamampha,

⁴sono yo wapereka mpasku wake ku Ambuya wazenge ndi mpasku waufwa chigaŵa chimoza cha chichumi cha mweso wa ufwa wamampha wakusazgika ndi chigaŵa chimoza cha vigaŵa vinayi vya mweso wa mafuta;

⁵ndi chimoza cha vigaŵa vinayi vya mweso wa vinyo uŵenge mpasku wakumwa, ujirongosole pamoza ndi mpasku wakocha, pamwenga sembe, yakubayiya mwana wa mberere yumoza;

⁶asani ndi bira, urongoso mpasku wa ufwa wa vigaŵa viŵi, vya chumi vya mweso wa ufwa wamampha, wakusazgika ndi mafuta gha chigaŵa chimoza cha vigaŵa vitatu;

⁷ndipo mpasku wakumwa uperekenge chigaŵa chimoza cha vigaŵa vitatu cha mweso wa vinyo, liŵenge sungu lamampha ku Ambuya.

⁸Asani urongoso nkhuzi kuŵa mpasku wakocha, pamwenga sembe ya chimangu, kufiska rapu, pamwenga mipasku ya chimangu ku Ambuya,

⁹uperekenge pamoza ndi nkhuzi yo mpasku wa ufwa vigaŵa chumi vya mweso wa ufwa wamampha, wakusazgika ndi chigaŵa chimoza cha vigaŵa viŵi vya mweso wa mafuta,

¹⁰ndipo ukazanga ndi sembe ya vinyo chigaŵa chimoza cha vigaŵa viŵi vya mweso, kuŵa mpasku wapa moto, wafungu lamampha ku Ambuya.

¹¹“Viyo ŵachitenge ndi nkhuzi pamwenga bira pamwenga mwana wa mberere pamwenga kana kambuzi.

¹²Kwakulingana ndi unandi waku zo mukarongosonga, viyo ndimu mukachitiyanga yumoza ndi yumoza.

¹³Wose wo ŵakaŵanga mu charu ŵakachitanga vinthu ivi mu nthowa yeniyo mukupereka mpasku wapa moto, wa fungu lakukondweska Ambuya.

¹⁴Ndipo asani mlendo waja namwe, pamwenga we yose yo we mukati mwinu mu migonezi yinu, wachikhumba kupereka mpasku wapa moto, fungu lakukondweska Ambuya, nge ndimo muchitiya imwe nayu so wachitenge kwakukozgana.

¹⁵Imwe ndi mlendo wakuja namwe mose mukavwanga dangu limoza, kuti muŵenge ŵa wumba, dangu la muyaya mu migonezi yino, mo mulili imwe ndimu wakaŵiyanga mlendo nayo paurongo pa Ambuya.

¹⁶Imwe ndi mlendo wakuja namwe mukavwanga dangu ndi langulu limoza kwambura kulekana.”

¹⁷Ndipo Ambuya angurongoro ndi Mosese,

¹⁸“Kamba ndi ŵaYisraele, mutakuti mwasere mu charu cho nditikutoriyeniko,

¹⁹muchamukurgha vya kurgha vya charu chiya, muperekenge mpasku ku Ambuya.

²⁰Muperekenge chiŵande chanthimphwa yinu yakudanga kuŵa mpasku wa mlimu wakukolora mbeu, viyo ndimu mukaperekiyanga.

²¹Mukapaskanga Ambuya mpasku wa nthimphwa yakudanga mu migonezi yinu yose.

²²“Kweni asani mwalakwa, pakureka kuchita vyo vyalangulika vyenivyo Ambuya angunene Mosese,

²³vyose vyo Ambuya angumulanguliyani mwaku Mosese, kwamba pa zuŵa lenilo Ambuya angulanguliya, kurutiriya mu migonize yinu swi,

²⁴asani mwalakwa kwambura kuziŵa, wumba wengavi kuziŵa, sono mpingu wose uperekenge nkhuzi yimoza kuŵa mpasku wakocha, wa fungu lakukondweska Ambuya, pamoza ndi mpasku wake wa ufwa ndi wake wa vyakumwa, kwakulingana ndi mluriku, ndi phongo yumoza kuŵa mpasku wapa ulakwi.

²⁵Ndipo mzukuru wakapepeskiyanga wumba wose wa ŵaYisraele, sono Ambuya akaŵagowokiyanga, chifukwa kwenga kuwura kuziŵa, ndipo ŵapereke mpasku wawo, mpasku wapa moto ku Ambuya, ndi mpasku wawo wapa ulakwi pa maso pa Ambuya, chifukwa cha kuwura kuziŵa kwawo.

²⁶Ndipo Ambuya akagowokiyanga wumba wose wa ŵaYisraele, ndi mlendo wakuja nawo, pakuti ŵanthu wose ŵanguwura kuziŵa.

²⁷“Asani yumoza walakwa kwambura kuziŵa wakazanga ndi kambuzi kanthukazi ka chirimika chimoza kuŵa mpasku wapa ulakwi.

²⁸Ndipo mzukuru wakapepeskiyanga munthu yuwa paurongo pa Ambuya, yo walakwa kwambura kuziŵa, kumupepeske iyo, ndipo Ambuya akamugokiyanga.

²⁹Dangu ndimoza pe paku yo wananga kwambura kuziŵa pa mweni charu ndi pa mlendo wakuja mukati mwawo.

³⁰Kweni munthu yo walakwiya dara, manyi ndi mweni charu pamwenga mlendo wakuja namwe, ndiyo wanyoza Ambuya, munthu yo watuzgikeko, kumutuzgamo mu ŵanthu ŵake.

³¹Chifukwa wayuyuwa mazu gha Ambuya, ndi waswa dangu lawo, munthu wa viyo watuzgikeko; ulakwi wake ukamubayanga.”

³²Penipo ŵaYisraele ŵenga ŵeche mu bozwa, ŵangusaniya munthu wachideŵa nkhuni pa zuŵa la Sabata.

³³Wo ŵangumusaniya wachideŵa nkhuni ŵanguza nayo kwaku Mosese ndi Aroni, ndi ku wumba wose.

³⁴Ndipo ŵangumumanga kumsunga chifukwa kuti ŵanguziŵa cha cho ŵatenere kuchita nayo.

³⁵Sono Ambuya anguti kwaku Mosese, “Munthu yo wabayike; mpingu wose umudine ndi mya kubwalo kwa ugoŵi.”

³⁶Ndipo mpingu wose wungumutole kubwalo kwa ugoŵi, ŵangumudina ndi mya wangufwa, kwakulingana ndimo Ambuya angulanguliya Mosese.

³⁷Ambuya angunena ndi Mosese,

³⁸“Ukambe ndi ŵaYisraele, ŵanene kuti wose mu mgonezi yawo yose ŵajichitiye zimphonje mu mikano ya vivwalo vyawo, ndi kuti ŵaŵikemo kachingwe ka mtundu wa bulu pa mphonje zamu visongo;

³⁹mphonje yikakukumbuskaninga marangu ghose gha Ambuya, kuti mughavwe pa mukayidaŵiranga, mureke kupenja vyamu mtima ndi vyamu maso ghinu, vyo mwaziŵiriya kuvirondo ndi kuzerezeka navyo.

⁴⁰Viyo ndimu mukakumbukiyanga ndi kughachita marangu ghangu ghose, kuti muŵi ŵatuŵa ku Ambuya Chiuta winu.

⁴¹Ndine Ambuya Chiuta winu, yo wangukutuzgani mu charu cha Egipiti, kuti ndiŵenge Chiuta winu: ine ndine Ambuya Chiuta winu.”