Read gitonga Maŵerengedu 17 Bible Online

Maŵerengedu 17 - gitonga bible

Maŵerengedu 17

¹Ambuya angurongoro ndi Mosese,

²“Kamba ndi ŵaYisraele, ndipo uronde zindodo kwaku iwo, pa nyumba ye yose ya auskeu ndodo yimoza, kutuliya ku ŵarongozgi ŵawo kwakuyana ndi nyumba za auskeu, ndodo chumi ndi ziŵi. Zina la munthu lirembeke pa ndodo yake,

³zina la ku Aroni lirembeke pa ndodo yaku Levi, chifukwa pa mura we yose wa nyumba ndi nyumba za auskeu pakaŵanga ndodo yimoza,

⁴uziŵike mu hema lakuwunganamo paurongo pa chisimikizgu, penipo ndikumana ndi iwe.

⁵Ndipo ndodo ya munthu yo ndikamusankhanga yikamenga; umu ndimo ndimariskeyenge madinginiku gha ŵaYisraele, gho ŵadinginikiya paku iwe.”

⁶Mosese wangukamba ndi ŵaYisraele; ndipo ŵarongozgi ŵawo wose ŵangumpaska zindodo, murongozgi yose ndodo yimoza, kwakuyana ndi nyumba za auskeu, ndodo chumi ndi ziŵi; yaku Aroni nayo yenga mukati mu ndodo zawo.

⁷Ndipo Mosese wanguŵika ndodo zo paurongo pa Ambuya mu hema la chisimikizgu.

⁸Sono ndi mlenji Mosese wanguruta mu hema la chisimikizgu; ndipo wanguwona, ndodo yaku Aroni ya nyumba yaku Levi yingume ndi kubuska mani, yinguwoneska maluŵa, ndi kupasa vipasi vyakufya.

⁹Penipo Mosese wangutuzga ndodo zose zo zenga paurongo pa Ambuya ŵanguza nazo pa ŵaYisraele: ŵanguziwona, ndipo munthu yose wanguto ndodo yake,

¹⁰Ambuya angunena ndi Mosese, “Wezgiyapo ndodo yaku Aroni paurongo pa chisimikizgu, yisungikiye kuŵa chakuwoniyapo ku ŵakugaruka, kuti umare madinginiku ghawo kumikana ndi ine, vinu ŵangafwa.”

¹¹Nge ndimo angumulanguliya; ndimu Mosese wanguchitiya.

¹²Ndipo ŵaYisraele ŵanguti kwaku Mosese, “Awonani, titufwa, timara, tose timara.

¹³Yose yo wandere kufupi, yo wandere ku chihema chakupaturika cha Ambuya, watufwa. Kumbi tose tikafwangadi?”