Read gitonga Maŵerengedu 2 Bible Online

Maŵerengedu 2 - gitonga bible

Maŵerengedu 2

¹Ambuya angurongoro kwaku Mosese ndi Aroni,

²“ŴaYisraele ŵaŵikenge mahema ghawo we yose po pe ndembera yake, pamoza ndi viziŵisku vya nyumba za uskeu; wazengenge mahema kurereskana ndi hema lakuwunganamo zingirizge.”

³Kuchiri ku vuma kumatuli gha dazi ndiko ŵamikenge mahema ŵandembera yaku Yuda mu maliŵanja ghawo, Ahishoni mwana waku Aminadaba warongozgenge ŵina Yuda,

⁴unandi wa mpingu wake, vikwi machumi ghankhonde ndi ghaŵi ndi vinayi pachanya machumi pe chumi ghankhonde ndi limoza (74,600).

⁵Wo ŵakagoŵanga kundondoloska nayo mbena Isakara, Natanele mwana waku Zurara, ndiyo wakarongozganga,

⁶unandi wa mpingu wake wenga vikwi machumi ghankhonde ndi vinayi pachanya machumi pe chumi ghanayi.

⁷Pavuli paku wo paŵenge ŵina Zebuluni, Eliabu mwana waku Heloni wakarongozganga ŵina Zebuluni,

⁸unandi wa mpingu wake wenga vikwi machumi ghankhonde ndi vinkhonde ndi viŵi pachanya machumi pe chumi ghanayi (57,400).

⁹Wose wo ŵanguŵerengeka mu mpingu waku Yuda ŵenga vikwi machumi pe chumi ndi machumi ghankhonde ndi ghatatu ndi vinkhonde ndi chimoza pachanya machumi pe chumi ghanayi (186,400). Yaŵa ndiwo ŵakwamba pa ulendo.

¹⁰“Kuchiri ku malaŵi ŵina Rubene ŵakamikanga ndembera ya ugoŵi wawo liŵanja, murongozgi wa ŵina Rubene ndi Elizuru mwana waku Shedeuru,

¹¹unandi wa mpingu wake wenga vikwi machumi ghanayi ndi vinkhonde ndi chimoza pachanya machumi pe chumi ghankhonde (46,500).

¹²Ŵina Simeoni ŵakamikanga mahema ghawo pafupi nayo, murongozgi wa ŵina Simeoni ndi Shelumiele mwana wake Zurishadai;

¹³unandi wa mpingu wake wenga vikwi machumi ghankhonde ndi vinkhonde ndi vinayi pachanya machumi pe chumi ghatatu (59,300).

¹⁴Ndipo ŵina Gadi murongozgi wawo ndi Eliasafa mwana waku Renele,

¹⁵unandi wa mpingu wake wenga vikwi machumi ghanayi ndi vinkhonde pachanya machumi pe chumi ghankhonde ndi limoza ndi machumi ghankhonde (45,650).

¹⁶Wose wo ŵanguŵerengeka liŵanja ndi liŵanja, mu ugoŵi ŵaku Rubene, ŵenga vikwi machumi pe chumi ndi machumi ghankhonde ndi chimoza pachanya machumi pe chumi ghanayi ndi machumi ghankhonde (151,450). Yaŵa mba chiŵi pa ulendo.

¹⁷“Pavuli paku yaŵa hema lakuwunganamo likasonkanga, ndi ugoŵi wa ŵina Levi pakatikati pa mpingu; mo ŵangugoŵe ndimu so ŵakasokiyanga, munthu yose mu malo ghake, ndembera ndi ndembera.

¹⁸“Kuchiri ku zambwe ŵina Efraimu ŵakaŵikanga ndembera yawo mu maliŵanja ghawo, murongozgi wa ŵina Efraimu ndi Elishama mwana waku Amihudu,

¹⁹unandi wa mpingu wake wenga vikwi machumi ghanayi pachanya machumi pe chumi ghankhonde (40,500).

²⁰Ŵakuŵarondo ŵakaŵanga ŵina Manase, murongozi wa ŵina Manase ndi Gamaliolo mwana waku Pedazuru,

²¹unandi wa mpingu wake wenga vikwi machumi ghatatu ndi viŵi, pachanya machumi pe chumi ghaŵi (32,200).

²²“Pavuli paku wo mbena Benjamini, wakaŵarongozganga ndi Afidana mwana waku Gideoni,

²³unandi wa mpingu wawo ndi vikwi machumi ghatatu ndi vinkhonde pachanya machumi pe chumi ghanayi (35,400).

²⁴Wose wo ŵanguŵerengeka mu maliŵanja ghawo mu ugoŵi waku Efraimu ŵenga vikwi machumi pe chumi ndi vinkhonde ndi vitatu pachanya machumi pe chumi (108,100). Yaŵa mba chitatu paulendo.

²⁵“Ŵina Dani ŵakamikanga ndembera yawo ku nkhonde mu maliŵanja ghawo, murongozgi wa ŵina Dani ndi Ahiezere mwana waku Amishadai,

²⁶ŵa mpingu ŵake ŵenga vikwi machumi ghankhonde ndi limoza ndi viŵi pachanya machumi pe chumi ghankhonde ndi ghaŵi (62,700).

²⁷Ndipo wo ŵakamikanga mahema kulondorana nayo ndi Ashere, murongozgi ndi Pagiele mwana waku Okarana,

²⁸unandi wa mpingu wake wenga vikwi machumi ghanayi ndi chimoza pachanya machumi pe chumi ghankhonde (41,500).

²⁹Pavuli pakazanga ŵa fuko laku Naftali, murongozgi wa ŵina Naftali ndi Ahira mwana waku Enana,

³⁰unandi wa mpingu wake wenga vikwi machumi ghankhonde ndi vitatu pachanya machumi pe chumi ghanayi (53,400).

³¹Wose wo ŵanguŵerengeka ŵa ugoŵi ŵaku Dani ŵenga vikwi machumi pe chumi ndi machumi ghankhonde ndi vinkhonde ndi viŵi pachanya machumi pe chumi ghankhonde ndi limoza (157,600).”

³²Yaŵa ndiwo ŵaYisraele wo ŵanguŵerengeka kwakuyana ndi nyumba za auskeu; wose ŵamu maugoŵi wo ŵanguŵerengeka mu mipingu yawo wenga vikwi machumi pe chumi ghankhonde ndi limoza ndi vitatu pachanya machumi pe chumi ghankhonde ndi machumi ghankhonde (603,550).

³³Kweni ŵaLevi kuti ŵanguŵerengeka mu ŵina Yisraele cha, nge ndimo Chiuta wangulanguliya Mosese.

³⁴Ndipo ŵaYisraele ŵanguchita kwakulingana mwaku vyose vyo Ambuya angulanguliya Mosese, mo ŵangugoŵe pa ndembera zawo, ndimo so ŵangwende ulendo, we yose mu mbumba yake, kwakuyana ndi nyumba ya awiske.