Read gitonga Maŵerengedu 20 Bible Online

Maŵerengedu 20 - gitonga bible

Maŵerengedu 20

¹Ndipo wumba wose wa ŵaYisraele, unguza ku bozwa la Zini mu mwezi wakudanga, ŵanthu ŵanguja mu Kadeshe; ndipo Miriamu wangufwiya kwenikuwa, ndiko wanguŵikika.

²Ndipo wumba wengavi maji; sono mpingu wose unguwungana pamoza kumikana ndi Mosese ndi Aroni.

³Ŵanthu ŵangumikana ndi Mosese, ŵanguti, “Kwenga kwamampha kuti mphanyi tingufwa po ŵafwiyanga ŵabili ŵidu paurongo pa Ambuya!

⁴Chifukwa chine mwaserezga wumba wa Ambuya mu bozwa ili, kuti timariye munu, pamoza ndi viŵetu vidu?

⁵Ndipo mukutituzgiyanji, kwazitiserezga mu malo ghaheni yagha? Kuti ndi malo gha trigu cha, pamwenga gha nkhuyu, pamwenga vinyo, pamwenga zobala; ndipo maji ghakumwa kulivi.”

⁶Sono Mosese ndi Aroni ŵangutuwapo pa wumba kuruta pa khomo la hema lakuwunganamo, ndipo ŵanguwa kavunama. Ndipo unkhankhu waAmbuya unguŵawoneke,

⁷Ambuya angurongoro ndi Mosese,

⁸“Uto ndodo, ndipo uwunganiske mpingu, iwe ndi mbali wako Aroni, ndipo unene jarawi kuti lidiske maji ghake pa maso pawo, viyo maji ghakatuwanga ku jarawi ndipo mwapaske ŵanthu ŵamwe pamoza ndi viŵetu vyawo.”

⁹Mosese wanguto ndodo pa maso pa Ambuya nge ndimo angumulanguliya.

¹⁰Mosese ndi Aroni ŵanguwungang'a wumba pamoza paurongo pa jarawi, wangunena nawo, “Avwani sono, mwaŵakugaruka imwe; kumbi tingatuzga maji mu jarawi ili?”

¹¹Ndipo Mosese wangusoska janja lake wangupuma jarawi kaŵi ndi ndodo yake; ndipo ghangutuwa maji ghanandi, wumba ungumwa pamoza ndi viŵetu vyawo.

¹²Ambuya angunena ndi Mosese ndi Aroni kuti, “Pakuti mwengavi kuvwana mwaku ine, kundipatuwa mu maso gha ŵaYisraele, chifukwa chenichi kuti mwamuserezga mpingu uwu mu charu cho ndikuŵapaska cha.”

¹³Yagha ndi maji ghaku Meriba, kweniko ŵaYisraele ŵangumikana ndi Ambuya ndipo Iwo angujirongo akupaturika mukati mwawo.

¹⁴Sono Mosese wangutuma zinthumi kutuliya pa Kadeshe kuya ku Karonga waku Edomu, wanguti, “Mbali wako Yisraele watiti: Masuzgu ghose gho ghakutiwiya muziŵa;

¹⁵muziŵa mo auskefwe ŵangusikiya ku Egipiti ndipo tinguja mu Egipiti kwa nyengo yitali; ŵaEgipiti ŵangutisuzga uheni ukongwa ifwe pamoza ndi auskefwe;

¹⁶ndipo po tinguliriya ku Ambuya, iwo anguvwa nkhuta yidu, angutuma mathenga kutituzga mu Egipiti; sono ehe te munu mu Kadeshe, msumba wo wemu mphaka ya charu chinu.

¹⁷Viyo tizomerezgeni kuporota mu charu chinu, kuti tikaporotanga mu viŵera cha nanga ndi mu minda ya mphereska, pamwenga kuti tikamwanga maji mu visima vinu naku cha; tikendanga mu mseu wa Karonga pe, ifwe kuti tikapatukiyanga ku marghe pamwenga ku maze cha, mpaka po tajumpha mu charu chinu.”

¹⁸Kweni Edomu wanguti, “Kuti mukaporotangamo cha vinu ndingamuziyani ndi lipanga kumikana namwe.”

¹⁹ŴaYisraele ŵangunena nayo, “Ifwe tikendanga mu mseu pe; ndipo asani ifwe ndi viŵetu vidu timwengepo maji ghinu, iku ndikalipanga pa mtengo wake; kuti ndikachitangamo so kanthu kanyake cha; kweni kwendamo waka ndi marundi pe.”

²⁰Iyo wanguti, “Kuti mukaporotangamo cha.” Edomu wanguza ndi nkhondo yikuru ya ŵanthu ŵanthazi.

²¹Viyo Edomu wangukana kupaska nthowa ŵaYisraele kuti ŵaporote mu charu chake; sono ŵaYisraele ŵangutuwako.

²²Ndipo wumba wose wa ŵaYisraele, ungutuwa ku Kadeshe, unguza ku phiri la Horo.

²³Ambuya angurongoro kwaku Mosese ndi Aroni pa phiri la Horo, mu mphaka ya charu cha Edomu,

²⁴“Aroni wakatorekiyanga ku ŵanthu ŵake; chifukwa pa maji ghaku Meriba, mungumikana ndi langulu langu, ndipo kuti wamusere mu charu cho ndikupaska ŵaYisraele cha.

²⁵Uto Aroni ndi Eleazara mwana wake, ukwere nawo pa phiri la Horo;

²⁶uzuwe maraya ghaku Aroni, uvwarike Eleazara mwana wake; Aroni wakatorekiyanga ku ŵanthu ŵake, ndipo wakafwiyanga kweniko.”

²⁷Mosese wanguchita nge ndimo Ambuya angumunene; ndipo wangukwere pa phiri la Horo pa maso gha mzinda wose.

²⁸Ndipo Mosese wanguzuwa maraya ghaku Aroni, ndi kughavwarika mwaku Eleazara mwana wake; ndipo Aroni wangufwiya penipa pachanya pa phiri. Sono Mosese ndi Eleazara ŵangutuwako ku phiri.

²⁹Wumba wose unguti waziŵa kuti Aroni wafwa, ŵaYisraele wose ŵangumuliya kwa mazuŵa machumi ghatatu.