Read gitonga Maŵerengedu 36 Bible Online

Maŵerengedu 36 - gitonga bible

Maŵerengedu 36

¹Ŵaraŵara ŵa nyumba za auskeu ŵa mbumba ya ŵaGileada mwana waku Makiri, mwana waku Manase, ŵa nyumba za auskeu ŵa ŵina Yosefe ŵangundere kufupi ŵangurongoro paurongo paku Mosese ndi pa ŵaraŵara ŵa nyumba za auskeu ŵa ŵaYisraele;

²ŵanguti, “Ambuya angunena ndi mbuyafwe kupereka charu nge nchihara ku ŵaYisraele mu mphenduzga; ndipo mbuyafwe wangupangizgika ndi Ambuya kupaska chihara chaku Zelofehada mbali widu ku ŵana ŵake ŵanthukazi.

³Kweni asani ŵaŵirwa kwaku we yose wa ŵana ŵa mafuku ghanyake gha ŵaYisraele sono chihara chawo chikatorekanga kutuwako ku chihara cha auskefwe, ndi kusazgika ku chihara cha fuku lo ŵaliko; viyo chikatuwangako ku mphenduzga ya chihara chidu.

⁴Ndipo asani chirimika cha malikondwa cha ŵaYisraele chafika, iko chihara chawo chikasazgikiyanga ku chihara cha fuku lo ŵaliko; ndipo chihara chawo chikatuwangako ku chihara cha fuku la auskefwe.”

⁵Mosese wangunena ndi ŵaYisraele kwakulingana ndi mazu gha Ambuya, wanguti, “Fuku la ŵina Yosefe lineneska.

⁶Ichi ndicho Ambuya alangula vyapa ŵana ŵanthukazi ŵaku Zelofehada, ‘Ŵaŵirwe kwaku yose yo ŵeneko ŵankhumba; kweni ŵatenere kuti ŵaŵirwenge mukati mu mbumba ya fuku la auskeu pe.

⁷Chihara cha ŵaYisraele chireke kusinthika kutuwa ku fuku ili kuya ku fuku kiya; yose wa ŵaYisraele wakamelemetiyanga ku chihara cha fuku la suskeu.

⁸Ndipo mwana munthukazi yose yo wendi chihara mu fuku lose la ŵaYisraele wakaŵanga muwoli waku yo ngwa mu mbumba ya fuku la awiske, mwakuti mu Yisraele yose waŵenge ndi chihara cha auskeu.

⁹Viyo palivi chihara cho chikasinthikanga kutuwa ku fuku limoza kuya ku linyake; chifukwa fuku ndi fuku likamelemetiyanga ku chihara chake.’ ”

¹⁰Ndipo ŵana ŵanthukazi ŵaku Zelofehada ŵanguchita nge ndimo Ambuya angulanguliya Mosese;

¹¹pakuti Mahala, Tiriza, Hogola, Milka, ndi Nowa ŵana ŵaku Zelofehada, ŵanguŵirwa ku ŵana ŵanthurumi ŵa ŵabali ŵa auskeu.

¹²Ŵanguŵirwa mu mbumba ya ŵina Manase mwana waku Yosefe, ndipo chihara chawo chinguja mu fuko la mbumba ya auskeu.

¹³Yagha ndi marangu ndi vyeruzgu vyo Ambuya angulanguliya Mosese pa ŵaYisraele mu vidika vya Moabu pafupi ndi Yordane pa Yeriko.