Read gitonga Maŵerengedu 8 Bible Online

Maŵerengedu 8 - gitonga bible

Maŵerengedu 8

¹Ndipo Ambuya angurongoro ndi Mosese anguti,

²“Kamba ndi Aroni, umunene kuti, po ukozga nyali, nkhonde ndi ziŵi ziŵaliyenge paurongo pa chikole-nyali.”

³Ndipo Aroni wanguchitadi viyo wangukozga nyali zo kuŵaliya paurongo pa chikole-nyali, nge ndimo Ambuya angulanguliya Mosese.

⁴Ndipo chikole-nyali chinguchitika ndi golide wakusula; wanguchikhozga pakusula lundi lake ndi maluŵa ghake gha pachanya, kwakuyana ndi chikozgu cho Ambuya angurongo Mosese.

⁵Ndipo Ambuya angurongoro ndi Mosese, anguti,

⁶“Uŵatuzgemo ŵaLevi mukati mu ŵaYisraele, ndipo uŵatozge.

⁷Viyo ndimu ukachitiyanga kwaku wo, pakuŵatozga: uŵamijiye maji ghakutozge, ŵamete liŵavu lawo lose, ŵachape vivwaro vya wo ndipo ŵasambe.

⁸Pavuli ŵato kankhuzi ndi mpasku wake wa ufwa wamampha wakusazgika ndi mafuta, ndipo ukatonga kankhuzi kanyake kaŵe mpasku wapa ulakwi.

⁹Ukamikanga ŵaLevi paurongo pa hema lakuwunganamo, ndipo ukawungang'anga mpingo wose wa ŵaYisraele.

¹⁰Po ukamikanga ŵaLevi paurongo pa Ambuya, ŵaYisraele ŵakaŵikanga manja ghawo pa ŵaLevi,

¹¹ndipo Aroni wakaperekanga ŵaLevi paurongo pa Ambuya nge ndi mpasku wakuzungung'a wakuperekeka ndi ŵaYisraele, alinga kuti kuŵi kwaku iwo kuteŵete Ambuya.

¹²Ndipo ŵaLevi ŵakaŵikanga manja ghawo pa mutu ya nkhuzi zo, sono ukaperekanga yimoza kuŵa mpasku wapa ulakwi ndi yinyake kuŵa mpasku wakocha ku Ambuya, kupepeske ŵaLevi.

¹³Ndipo ukalamuliyanga ŵaLevi kuti ŵateŵete Aroni ndi ŵana ŵake, ndipo uŵapereke kuŵa mpasku wakuzungung'a ku Ambuya.

¹⁴“Viyo ndimu ukaŵatuzgiyangamo ŵaLevi mukati mu ŵaYisraele, ndipo ŵaLevi ŵakaŵanga ŵangu.

¹⁵Ndipo pavuli paku cho ŵaLevi ŵakaserenga kwachiteŵete mu hema lakuwunganamo, pavuli pakutozgeka ndi kuperekeka kwawo ndi iwe nge ndi mpasku wakuzungung'a.

¹⁶Chifukwa ŵaperekeka ŵamphumphu kwaku Ine kutuwa mu ŵaYisraele; mu malo ghaku wose ŵa umwali, ŵa umwali ŵa ŵaYisraele wose, ndaŵato kuŵa ŵangu.

¹⁷Pakuti ŵa umwali wose mu ŵaYisraele mbangu, wose ŵa ŵanthu ndi ŵa viŵetu; pa zuŵa liya ndingubayiya ŵa umwali wose mu charu cha Egipiti, ndingujipatuliya ŵaYisraele kuŵa ŵangu,

¹⁸ndipo ndato ŵaLevi mu malo gha ŵa umwali ŵa ŵaYisraele.

¹⁹Ndipo ndapaska ŵina Levi nge nchawanangwa kwaku Aroni ndi ŵana ŵake kuteŵete mu malo gha ŵaYisraele, mu hema lakuwunganamo, ndi kupepeske ŵaYisraele, alinga kuti ŵaYisraele, ŵachiŵandika ku malo ghakupaturika ŵareke kufwa ndi chideru.”

²⁰Viyo Mosese ndi Aroni ndi mpingu wose wa ŵaYisraele ŵanguŵachitiya ŵaLevi nge ndimo Ambuya angulanguliya Mosese gha pa ŵaLevi, ndimu ŵaYisraele ŵanguchitiya.

²¹Ndipo ŵaLevi ŵangujitozga ku ulakwi, ndi kuchapa vivwaro vyawo; ndipo Aroni wanguŵapereka kuŵa mpasku wakuzungung'a paurongo pa Ambuya, ndipo wanguŵapepeske kuŵatozga.

²²Ndipo pavuli paku ichi ŵaLevi ŵangusere kwachichita uteŵete wawo mu hema lakuwunganamo pa urongozgi waku Aroni ndi ŵana ŵake; nge ndimo Ambuya angulanguliya Mosese pa ŵaLevi, viyo ndimo ŵanguchitiya nawo.

²³Ambuya angurongoro ndi Mosese,

²⁴“Ichi ndicho cha ŵaLevi: kwamba pa virimika machumi ghaŵi ndi vinkhonde (25) ndi kuruska po ŵakaserenga kwa chiteŵeta mu hema lakuwunganamo;

²⁵ndipo kwamba po umoyo wa virimika machumi ghankhonde (50) ŵakajowonga kuchita uteŵete wo, ndipo kuti ŵakawuteŵetanga so cha,

²⁶kweni ŵawovyenge ŵaka ŵanyawo, kusunga umampha, vinthu vyamu hema lakuwunganamo. Viyo mulamuliye ŵaLevi gha uteŵete wawo.”