Read gitonga Maŵerengedu 9 Bible Online

Maŵerengedu 9 - gitonga bible

Maŵerengedu 9

¹Ndipo Ambuya angunena ndi Mosese mu bozwa la Sinai, mu mwezi wakudanga wa chirimika cha chiŵi, ŵanguti ŵatuwa mu charu cha Egipiti, anguti,

²“ŴaYisraele ŵachite phaska pa nyengo yake yakutemeka.

³Zuŵa la chumi ndi chinayi la mwezi uno, ndi mazulo mukachitanga pa nyengo yake yakutemeka; kwakuyana ndi marangu ghake ghose, ndiso ndi kachitiru kake kose ndimu mukachitiyanga.”

⁴Viyo Mosese wangunena ndi ŵaYisraele kuti ŵachite.

⁵Ndipo ŵanguchita phaska pa zuŵa la chumi ndi chinayi, la mwezi waku danga, ndi mazulo, mu bozwa la Sinai; kwakulingana ndi vyose vyo Ambuya angulanguliya Mosese, ndimo ŵaYisraele ŵanguchitiya.

⁶Ndipo ŵengapo ŵanthurumi ŵanyake wo ŵangukazuzgika pa kukwaska chiŵanda, ŵengavi kwenere kuchita phaska zuŵa liya; ndipo ŵanguza paurongo paku Mosese ndi Aroni zuŵa leniliya,

⁷ŵanthu wo ŵanguti, “Takazuzgika pa kukwaska chiŵanda; kumbi takanizgikiyanji kupereka mpasku ku Ambuya pa nyengo yakutemeka mukati mu ŵanyidu ŵaYisraele?”

⁸Mosese wangunena nawo, “Mani danga, ndivwi cho Ambuya akalangulanga paku imwe.”

⁹Ambuya angurongoro ndi Mosese, kuti,

¹⁰“Uŵanene ŵaYisraele, asani munthu we yose mwaku imwe pamwenga wa mphapu yinu waŵa wakukazuzgika chifukwa cha kukwaska chiŵanda, pamwenga we pa ulendo kutali, wakachitanga mbwenu phaska ku Ambuya.

¹¹Zuŵa la chumi ndi chinayi la mwezi wa chiŵi, ndi mazulo, ŵakachitanga; ŵakarghanga ndi chiŵande chambura mtupu ndi munkhwani wakuŵaŵa.

¹²Ŵareke kusiyako kuti ŵarghe mawa nanga nkhuswa chiwanga chake; ŵachite kwakulingana ndi marangu ghose gha pa phaska.

¹³Kweni munthu yo ngwakuphotoka ndipo kuti we pa ulendo cha, asani wareka kuchita phaska, munthu wa viyo wadumulikeko ku ŵanthu ŵake, chifukwa walivi kuchitiya phaska Ambuya pa nyengo yake yakutemeka; munthu yo wakapinganga ulakwi wake.

¹⁴Asani mlendo waja mukati mwinu nayo so wachitiyenge Ambuya phaska, kwakulingana ndi dangu lapa phaska, ndi kwakuyana ndi kachitiru kake, dangu ndimoza pa mlendo ndi pa mweni charu.”

¹⁵Ndipo pa zuŵa lo chingumikikiya chihema chakupaturika, mutambo unguvimba chihema cho, hema la chisimikizgu; ndipo ndi mazulo pachanya pa chihema chakupaturika penga kawonekedu nge nkhamoto mpaka ku mlenji.

¹⁶Viyo ndimu kwaŵiyanga mazuŵa ghose, mtambo unguchivunikiliya ndi msana, kawonekedu ka moto ndi usiku.

¹⁷Ndipo pa nyengo yose yo mtambo ungutuzgikapo pa hema, kukwera kuchanya, po ndipo ŵaYisraele ŵangusoka ulendo, ndipo pa malo po mtambo unguja, po ndipo ŵaYisraele ŵangugoŵa.

¹⁸Pakulangulika ndi Ambuya ŵaYisraele ŵangwenda ulendo, ndipo pakulangulika ndi Ambuya ŵaYisraele ŵangumika mahema; nyengo yose yo mtambo unguja pa chihema, ŵanguja mu ugoŵi.

¹⁹Ndipo asani mtambo ungujaliliya pa chihema kwa mazuŵa ghanandi ŵaYisraele ŵangusunga langulu la Ambuya ndipo kuti ŵangwenda ulendo cha.

²⁰Ndipo kwaŵanga kuti mtambo uchijapo pa chihema mazuŵa ghamanavi, kwakulingana ndi langulu la Ambuya ŵanguja mu ugoŵi, ndipo kwakulingana ndi langulu la Ambuya ŵangwenda ulendo.

²¹Kwaŵanga kuti asani mtambo ungujapo kutuwa mazulo mpaka mlenji; ndi kukwezgeka ndi mlenji, po ndipo ŵangusoka ulendo; manyi mtambo ungukwezgeka ndi msana pamwenga usiku, ŵangusoka ulendo nyengo yeniyo.

²²Manyi ghenga mazuŵa ghaŵi, pamwenga mwezi, pamwenga kuruska po, gho mtambo ungutandaliya pa chihema, kuja penipo, ŵaYisraele ŵangujaliliya mu ugoŵi kuti ŵangwenda lwendo cha; kweni po ungukwezgeke kuchanya ŵangwenda.

²³Pakulangulika ndi Ambuya ŵangupumuwa mu ugoŵi ndipo pakulangulika ndi Ambuya ŵangwenda ulendo ŵangusunga langulu la Ambuya, lakuziya mwaku Mosese.