Read gitonga Mika 1 Bible Online

Mika 1 - gitonga bible

Mika 1

¹Mazu gha Ambuya gho ghanguza kwaku Mika waku Moresete mu mazuŵa ghaku Yotamu, Ahazi, ndi Hezekiya, ŵakaronga ŵaku Yuda; ndivyo wanguwona kunena vya Samaria ndi Yerusalemu.

²Vwani imwe mwa ŵanthu mose; tegherezga wa charu ndi vyose vyo vye mwenimo; rekani Ambuya Chiuta waŵenge kaboni wakususka imwe, Ambuya mu kasopi wawo wakupaturika.

³Pakuti, Ambuya atuwa mu malo ghawo, ndipo akasikanga ndi kudyaka pa malo gha pachanya gha charu chapasi.

⁴Ndipo mapiri ghakasongonokanga pasi pake, ndi madambo ghakaparukanga, nge ndi phura pafupi pa mo to, ndi nge ndi maji gho ghadika pa malo gha kusendemuka.

⁵Ivi vyose vyaŵako chifukwa cha ulakwi waku Yakobe ndi mauheni gha nyumba yaku Yisraele. Kumbi ulakwi waku Yakobe ngune? Kumbi kuti ndi Samaria cha? Ndipo ulakwi wa nyumba yaku Yuda ngune? Kumbi kuti ndi Yerusalemu cha?

⁶Chifukwa ichi ndisanduskenge Samaria ndundu ya mu munda, malo ghakulimamo munda wa mphereska. Ndipo nkhapong'anga mya ya nyumba zake mu dambo, ndikubanuwa viŵanja vyake.

⁷Vikozgo vyake vyose vikatekenyekanga, mphoto zake zose zochekenge ndi moto, ndi ndipasuwenge ŵangoza ŵake wose. Chifukwa wanguwunjika kutuliya mu mphoto ya munthukazi mureŵi, ndi ku munthukazi mureŵi vikawerenga.

⁸Chifukwa ichi ndiliyenge ndikutenje; nkharutanga wakuzuwika ndi wankhuli, nkhatenjenga nge mbakambwe, ndi kuliya nge mbamanchichi.

⁹Chifukwa chironda chake nchambura machizgika; ndipo chaza kwaku Yuda, chafika ku likomo la ŵanthu ŵangu, ku Yerusalemu.

¹⁰Mungachikambanga mu Gata, mungariyanga nanga nkhamanavi; mu Betele-Afra mujikunkhuzge mu fuvu.

¹¹Mwende mu nthowa yinu, mwa ŵakuja mu Safiri, mu nkhuli ndi soni; wo ŵaja mu Zanana kuti ŵatuza cha; chitenje chaku Betezele nchilondenge kwaku imwe malo ghake ghakumapo.

¹²Pakuti ŵakuja mu Maroti ŵalindizga chamampha ndi linweka likuru, chifukwa uheni wasikiya pasi kutuwa ku Ambuya, kuza ku likomo laku Yerusalemu.

¹³Mangani gareta kuŵa kavalo, imwe mwa ŵakuja mu Lakishi; ndimwe mungwananga pakudanga ku ŵanthu ŵaku Zioni, chifukwa maulakwi ghaku Yisraele ghangusanirika mwaku imwe.

¹⁴Chifukwa ichi mukaperekanga vyawanangwa vyakupatukiyana, kwaku Moresete-Gata; nyumba zaku Achizibi zikaŵanga kanthu kakupusika ku ŵakaronga ŵaku Yisraele.

¹⁵Nkhazanga so ndi mupundi paku imwe, ŵakuja mu Maresha; unkhankhu waku Yisraele ukazanga ku Adulama.

¹⁶Mujimete phara ndimusunge sisi linu, chifukwa cha ŵana ŵinu wo mukondwa nawo; mujimete phara nge ndi nkhwazi chifukwa ŵatuwengeko kwaku imwe kuya ku uŵanda.