Read gitonga Mika 2 Bible Online

Mika 2 - gitonga bible

Mika 2

¹Owe kwaku wo ŵaghanaghana ubendezi ndi kuchita uheni pa ŵagonapa vita vyawo! Kuchicha ndi mlenji ŵatuwuchita chifukwa we munthazi za janja lawo.

²Ŵakhumbira minda, ŵayironda; ndi nyumba ŵazironda; ŵasuzga munthurumi ndi mbumba yake; munthurumi ndi chihara chake.

³Chifukwa ichi, viyo atiti Ambuya: Ndirunguruka chiheni kumikana ndimbumba iyi, kwaku chenicho kuti muziŵa kuwezgako masingo ghinu cha; ndipo kuti mukayendanga kwakujikuzga cha, pakuti yikaŵanga nyengo ya uheni.

⁴Mu zuŵa liya ŵakambanga sumu yakunyoza imwe, ndi kubongo ndi chitenje chikuru, ndi kuti, “Tapasuka ukongwa; wasintha phandi la ŵanthu ŵangu; mo walituzgiyako kwaku ine! Ŵagaŵiya minda yidu kwaku wo ŵatiko.”

⁵Chifukwa ichi kuti ukaŵanga nayo cha wakupong'a chingwe cha mayera mu unganu wa Ambuya.

⁶“Rekani kutaula,” viyo ŵataula, “munthu kuti watenere kutaula ndi vinthu vya viyo cha; soni kuti zikatikonga cha ifwe.”

⁷Kumbi ichi chitenere kukambika, imwe mwa nyumba yaku Yakobe? Kumbi kuti mzimu wa Ambuya ngwa kuzika cha? Kumbi iyi ndiyo milimu yake? Kumbi mazu ghangu kuti ghachita umampha cha kwaku yo watenda kwakurunjika?

⁸Kweni uyukiya ŵanthu ŵangunge ndi murwani; utumuzuwa munjilira wakuzika ndiso wo ŵajumpha ndi chigomezgu, kwambura maghanaghano gha nkhondo.

⁹Ŵanthukazi ŵa ŵanthu ŵangu uŵadikiskiya kubwalo, kutuwa mu nyumba zawo zakukondweska; ndiutuzgiyako limu unkhankhu wangu ku ŵana ŵawo.

¹⁰Yuka rutanga, pakuti yagha kuti ndimalo cha ghakupumuliyapo; chifukwa cha uheni wo ubwanganduwa ndi kubwanganduka kwakofya.

¹¹Asani munthu wangenda ndi mtima wakupusika ndi kukamba utesi, ndi kuti, “Nkhataulanga kwaku iwe ndiza vinyo ndiso ndi vyakumwa vyakuloŵeleska,” ndiyo wangaŵa wakutaula wa ŵanthu yaŵa!

¹²Nkhamuwunjikaninga mose, A! Yakobe, nkhawunjikanga ŵakujako ŵaYisraele; ndiŵaŵikenge pamoza nge ndi mberere mu khola, nge ndimberere mu uliska wake, mpingu wa ŵanthu ŵa chiwawa.

¹³Yo wajura dangazi waruta panthazi pawo; wakatoronga ndi kuporota pa likomo, kutuliya kubwalo paku lo. Karonga wawo ndiyo wamudanjiya panthazi pawo, Ambuya akuŵalongozga.