Read gitonga Nahumu 1 Bible Online

Nahumu 1 - gitonga bible

Nahumu 1

¹Uchimi wakunena ndi Nineve. Buku la chiwona chaku Nahumu waku Elikoso.

²Ambuya ndi Chiuta wasanji ndi wakuwezge thayu, ndi wakukaripa, Ambuya awezge thayu pa ŵakupindikana ŵawo, ndipo aŵikiya ukari pa ŵarwani ŵawo.

³Ambuya mbachizita ku ukari ndi anthazi zikuru, ndipo kuti Ambuya afwatuwenge ŵalakwi cha. Nthowa yawo yemu kavuru-vuru ndi chimphunga, mitambo ndi fuvu la marundi ghawo.

⁴Achenya nyanja ndi kuyikamuska, aphwiska misinji yose; Bashani ndi Karmele ŵafota, luŵa laku Lebanoni nalo lifota.

⁵Mapiri ghasukunika paurongo pawo, tumapiri tusongonoka; charu chapasi chipasuka paurongo pawo, charu ndi wose ŵakujamo.

⁶Ndiyani wangama paurongo pa ukari wawo? Ndiyani waziŵa kukunthiyapo mu chifundizi cha ukari wawo? Ukari wawo upungulika nge ndi moto, ndi majalawi ghasweka ndi iwo.

⁷Ambuya mbamampha, linga lakukho mu zuŵa la suzgu, atuŵaziŵa wo ŵabendama mwaku iwo.

⁸Kweni ndi kusapatiya kwa zandi amalizgiyenge limu ŵakupindikana nawo, ndi kudikiskiya ŵarwani ŵawo ku mdima.

⁹Chifukwa nchine cho mumikiyana ndi Ambuya? Amaliyenge limu; kuti awezgiyenge thayu kaŵi cha pa ŵamawongo ŵawo.

¹⁰Nge ndi minga yakuhoma ŵanyekenge, nge nchivwati chakumira.

¹¹Kumbi kuti yumoza wangutuliya mwaku imwe cha, yo wanguchita uheni kumikana ndi Ambuya, ndikupereka fundu yakupusika?

¹²Viyo atiti Ambuya, “Chingana ŵangaŵa ŵanthazi pamwenga ŵanandi, ŵakadumulikanga ndi ŵakamaranga. Chingana ndamusuzgani, kuti ndimusuzgeninge so cha.

¹³Ndipo sono ndiswenge goŵa lake lituweko kwako, ndi ndidumuwenge vimangilo vyako pakati.”

¹⁴Ambuya alangula ndi iwe: “Kuti zina lako likarutiliyanga so cha; mu nyumba ya ŵachiuta ŵako ndibwangandu wenge, ŵangoza ŵakusema ndi ŵangoza ŵakusongono. Ndichitenge muunda wako chifukwa ungukazuzgika.”

¹⁵Wona, pa mapiri marundi ghaku yo watuza ndi uthenga wamampha, yo wawandiska chimangu! Sunga madghera ghako, Yuda, fiska marapu ghako, chifukwa wazenge so cha muheni kumikana nawe, wamalizgike teteti.