Read gitonga Nahumu 2 Bible Online

Nahumu 2 - gitonga bible

Nahumu 2

¹Yo wabwanganduwa waza kulimbana namwe, Sungani linga; lindani nthowa, vwalani zikho muchiwunu; nkhozgani nthazi zinu zose.

²(Chifukwa Ambuya awezge so kuzirwa kwaku Yakobe nge nkhuzirwa kwaku Yisraele. Chifukwa ŵakuskoŵa ŵaŵapantha ndi kunanga mphanda zawo.)

³Nguru ya vinkhara vyake njiyera, ŵankhondo ŵake ŵavwara viyera. Magareta ghagazima nge ndi mlipu wa moto pa ghalongosoleka umampha; ŵakavalo ŵachilipuka.

⁴Magareta gharotoka mu ŵagurwi, ghabwanyana-bwanyana mu miseu; ghang'anima nge vyenje, kumwetuka nge ndi malimphezi.

⁵Zinduna zidanika, ziguŵa mukwenda kwawo, zitinthimika kuruta ku linga, ndi kunozga chivikiru.

⁶Malikomo gha misinji ghajulika, nyumba ya karonga njakutimbanika;

⁷fumukazi yakoreka, ŵaruta nayo, ŵateŵeti ŵake ŵanthukazi ŵaliya, mazu nge ndi nkhunda, ndi kugung'uska pa vifuŵa vyawo.

⁸Nineve we nge nchisima cho maji ghake ghapungulika. “Wadanirizga; mani!” Kweni kulivi yumoza wakuweko.

⁹Skoŵani siliva, skoŵani golide! Usambasi wambura kumara, pamwenga chuma cha kanthu kose kakuzirwa.

¹⁰Wapasuka! Phasulo ndi pharghaniko! Mitima yitufwa msara ndipo makongono ghabwaskana, kuŵaŵa kwe mu viwunu vyose, visku vyose vyasanduka!

¹¹Mphanji ya nkharamo ye pani, ndi mphanji ya nkharamo zampupuka, ko nkharamo yingutole nyama yake, kweniko kwenga ŵana ŵake, kwambura kofyeka ndi kanthu?

¹²Nkharamo yaparuwa nyama kwakuyana ndi ŵana ŵake, ndi kupikitiya zinthukazi; yazaza mphanji zake ndi vyakuparuwa-paruwa, ndi mazenje ghake ndi nyama yakutwazuwa.

¹³Nadi, nde ndi kafukwa ndi iwe, atiti Ambuya ŵa maŵanja, ndipo ndochenge magareta ghako mu usi, ndipo lipanga lidumuwenge nkharamo zako zampupuka; ndidumuwengeko mskowo wako pa charu chapasi, ndipo mazu gha mathenga ghako ghavwikenge so cha.