Read gitonga Nahumu 3 Bible Online

Nahumu 3 - gitonga bible

Nahumu 3

¹Owe ku msumba wa ndopa, wakuzaza utesi ndi vyakuskoŵa, kuskoŵa kwambura kumara!

²Chifukwa cha likwechu, ndi chiwawa cha mikombero pakwenda, kuchimbiya kwa ŵakavalo, ndi kumbwefuka-mbwefukwa kwa magareta!

³Ŵapakavalo ŵarotoka, ndi lipanga lakugabuka ndi mkondo wakuphurika, ŵakubayika mbanandi, ndundu za vitanda, vitanda vyambura kumara-ŵaguŵa mu vitanda pakwenda!

⁴Ichi chose nchifukwa cha ureŵi wa munthukazi muyaya; wakutowa ndi wa njirizi, yo wasaska ku mitundu yose uyaya wake, ndi ku ŵanthu njirizi zake.

⁵Wona, ndimikana nawe, atiti Ambuya ŵa maŵanja, ndi ndituzgengeko chidinkhu pachanya pa chisku chako; ndipo mitundu ya ŵanthu yiwone nkhuli yako ndi mafumu soni zako.

⁶Ndipo ndipong'enge vya uyu paku iwe ndikukudumbizga ndikukuchita kuti uŵenge chakudaŵirapo.

⁷Ndipo kuŵenge kuti wose wo ŵakalereskanga paku iwe ŵachinthukenge ndi kuti, Nineve wapasuka; ndiyani yo wakakuliriyanga? Ndi nunkhu ko ndingakupenje wakukusangaruska?

⁸Kumbi we wamampha kuruska Tebesi yo waja mumphepete mu Nile, ndi maji ghakumuzunguliya, linga lake ndi nyanja, ndi maji nchiliŵa chake?

⁹Nthazi yake wenga Etiopia, ndi so Egipiti, ndipo yambura kumara; Putu ndi ŵaLibiya ŵenga ŵakovya ŵake.

¹⁰Kweni ŵangutoreka, ŵanguruta mu umikoli, twana twake tungutekenyurikiya pasi mu ŵagurwi wose; ŵanthu ŵake ŵakuzirwa ŵanguŵapenduzgiya mphenduzga, ndipo vinkhara vyake vyose vingumangika ndi unyoro.

¹¹Nawe so uloŵenge, utimbanizgikenge; upenjenge utaski ku murwani.

¹²Malinga ghako ghose ghakozgana ndi mikuyu ndi nkhuyu zakudanga kufya asani zasukuniskika zimbotoka mu mlomo wa ŵakuzirgha.

¹³Ehe, ŵankhondo ŵako mbanthukazi mukati mwako. Malikomo gha charu chako ghe mwazi ku ŵarwani ŵako; moto wawocha mipilingizgu yako.

¹⁴Neghe limu maji pa nyengo yakujalizgika, khozga malinga ghako; sere mu nkhando, kantha dongo, khozga ng'anjo ya ncherwa!

¹⁵Kweniko moto wakukupirizga, lipanga lakukupikita, lakukumara nge ndi zombe. Wandane nge ndi zombe, wandane nge ndi mphazi!

¹⁶Wandaniska ŵamaronda ŵako kuruska nyenyezi zakuchanya. Zombe wasoska mapapa ghake ndi waphururuka.

¹⁷Ŵakaronga ŵako ŵenge ndi mphazi, ndi ŵalembi ŵako nge ndi maliŵanja gha zombe, ŵakufwasa mulisitu mu zuŵa la mphepo yakuzizira penipo dazi latuwa, waphururuka; kulivi munthu waziŵa kweniko wali.

¹⁸Ŵaliska ŵako ŵasiwa, iwe karonga wa Asiriya; mkoko yako yisiwa. Ŵanthu ŵako ŵaparghang'ika pa mapiri kulivi yumoza wakuŵawezga.

¹⁹Kulivi kupozga kupweteka kwako, bamba lako liŵaŵa. Wose wo ŵavwenge makani ghako ŵakumbiyenge manja. Chifukwa mphakuyani palivi kuza uheni wako wambura kureka?