Read gitonga Habakuku 2 Bible Online

Habakuku 2 - gitonga bible

Habakuku 2

¹Ndimenge pa ulinda wangu kulonda, ndijenge pa chitanthali, ndi kukhazga kuti ndiwone cho wandikambiyenge, ndi cho ndimukenge pa madinginiku ghangu.

²Ndipo Ambuya angundamuka anguti: “Lemba chiwona, malembo ghawonekenge pa vipapate, mwakuti yo waŵerengapo wendepo ruŵi.

³Chifukwa chiwona cheche kulindizga nyengo yake; yithaŵiriya ku umari yikapusikanga cha. Asani yingazuwulika, yilindizge; yizenge nadi, kuti yizuwulikenge cha.

⁴Yo mzimu wake kuti ngwakunyoroka cha watondekenge, kweni murunji waŵenge wamoyo chifukwa cha chivwanu chake.

⁵Kweni ndi kweni, vinyo wapuruska, munthu wakujikuzga kuti wajenge cha. Chiloko chake nchisani nge ndi muunda; nge ndi nyifwa kuti waguta cha. Wajiwunjikiya mitundu yose, ndi kuwunjika ŵanthu wose nge mbake.”

⁶Asi wose yaŵa ŵakamukambanga, ndikumlenga, ndi kumseka kuti, “Owe, kwaku yo wawunjika vyo kuti vyake cha mpaka zuŵanji? Ndi watijizitiska ndi vikole!”

⁷Asi ŵamatewu ŵako ŵayukenge kwamabuchibuchi, ndi kuyuska wo ŵakutenthemeskenge? Penipo uŵenge mskowo kwaku wo.

⁸Chifukwa iwe waskowa mitundu yinandi, ŵanthu wose wo ŵakujako ŵakuskoŵenge. Chifukwa chandopa za ŵanthu ndi nkhaza mu charu, ndi mu misumba ndi wose ŵakujamo.

⁹Soka kwaku yo wanduwiya mbumba yake chanduwo chiheni, mwakuti wazenge nyumba yake pachanya, kuti wataskike ku urwani!

¹⁰Upaska mbumba yako soni, pakudumuwa mitundu yinandi ya ŵanthu; ndipo wanangiya umoyo wako.

¹¹Chifukwa mwa wa chiliŵa wamukati, ndi mgomba waku mapasu vizomerezgenge.

¹²Soka kwaku yo wazenga muzi ndi ndopa, ndi kuzenga msumba pa chiŵanja cha ubudi!

¹³Asi chikuturiya ku Ambuya ŵa maŵanja, kuti ŵanthu ŵatakatakiya chifukwa cha moto pe, ndipo mitundu yitijivukiska ndi vyaŵakaŵaka?

¹⁴Chifukwa charu chapasi chizazenge ndi mziŵiru wa unkhankhu wa Ambuya, nge ndi maji ghazaza nyanja.

¹⁵Soka kwaku yo wamweska munyake nkhombo ya ukari wake ndi kumuloŵeleska, mwakuti wawonenge nkhuli yake!

¹⁶Wamukoreka ndi suzgu kwakuruska thumbiku. Mwanga nawi ndi yenda kwakuzendazenda! Chandi mu janja lamarghe la Ambuya chikazanga kwako, ndipo soni ziŵenge pa thumbiku la wo.

¹⁷Nkhaza zo zinguchitikiya Lebanoni zibwanganduwenge iwe so, kupasuka kwa vinyama kukofyenge, chifukwa cha ndopa za ŵanthu ndi nkhaza panu pasi, ku misumba ndi wose ŵakujamo.

¹⁸Kumbi chikozgo chakusema chitanduwa chine pa wachichita wakusema, chikozgo chakusongono, musambizgi wa mautesi? Chifukwa wakupanga wagomekezga mwaku cho wachipanga, penipo wapanga ŵangoza ŵambuwu!

¹⁹Soka kwaku yo wanena ku chimuti chakusemeka, Yuka; ndi ku mwa wambuwu Ima! Kumbi ichi chingapereka uvumbuzi? Wona, nchakumatika ndi golide ndi siliva, mulivi muvuchi mukati chingana nkhamana.

²⁰Kweni Ambuya ŵemu kasopi wawo wakupaturika; charu chose chije chisisi paurongo pawo.