Read gitonga Habakuku 3 Bible Online

Habakuku 3 - gitonga bible

Habakuku 3

¹Rombo laku Habakuku mchimi, kwakuyana ndi Siginoto.

²Ambuya, ndavwa mbiri yinu, ndipo mlimu winu, Ambuya nthopa nade. Yuskani mlimu winu mukati mu virimika; mukati mu virimika uziŵikwe; mu ukari kumbukani lisungu.

³Chiuta waturiya ku Temani, mutuwa ku phiri la Parana, Unkhankhu waku ubenekere machanya, ndi charu chapasi chinguzaza ndi marumbu ghake.

⁴Kujeduka kwake kwenga nge nkhungweruka, sasiya zamwetukanga mu janja lake; mwenimo mungubisika nthazi zake.

⁵Paurongo pake panguka nthenda ya chideru, nthenda yo yamrondonga mvuli.

⁶Wanguma ndi kupima charu chose chapasi; wangulereska, ndi wangusukung'a mitundu ya ŵanthu; viyo mapiri ghamwaka ghanguparghanika, mapiri ghachijaliye ghangubwanthuka. Nthowa zake zenga nge ndi kale.

⁷Ndinguwona mahema ghaku Kusana mu suzgu vyakuchinga vya charu chaku Midiani vingusukunika.

⁸Kumbi kandundu kinu kenga pa misinji, Ambuya? Kumbi ukari winu wenga pa misinji, pamwenga kutundiya kwinu pa nyanja, pa gareta linu la upundi?

⁹Uta winu mungupinda, ndipo mungusomeka mivwi ku chingwi. Munguparuwa charu chapasi ndi msinji.

¹⁰Mapiri ghangumuwonani, ndi kuvivira; maji ghanthazi ghangusapatiya; ndimba yingutuzga mazu, yingutumphuskiya manja ghake pachanya.

¹¹Dazi ndi mwezi vinguma chete mu malo ghawo ghakujamo pa ukweru wa mivwi yinu mo yingwende, pa kuŵara kwa mkondo winu wakugadima.

¹²Munguja pachanya pa charu mu kandundu, mungukandiya pasi mitundu ya ŵanthu mu ukari.

¹³Mungutuwa chifukwa cha kutaska ŵanthu ŵinu, chifukwa cha kutaska wakupakika winu. Munguphwanya mutu wa muheni, ndi kumlarika wankhuli kwamba ku chigha kufika ku khosi.

¹⁴Mungurasa mutu wa ŵankhondo ŵake ndi mikondo yinu, wo ŵanguza nge ndi kavuruvuru kundiparghang'a, wakukondwa, kusere kwako kwenga nge nkhudoso ŵakavu ku ubendi.

¹⁵Mungudyakadyaka nyanja ndi ŵakavalo ŵinu, mu mayigha gha maji ghanandi.

¹⁶Ndituvwa, ndi liŵavu langu litenthema, mlomo wangu umbwambwantha pa mazu ghinu; chiwozga chisere mu viwanga vyangu, nditenthema mukati mwangu. Ndirindizgenge kwa chisisi zuŵa la suzgu lo liziya wo ŵasere kwaku ifwe ndi nkhondo.

¹⁷Chingana mkuyu ureke kubuska, pamwenga vipasi ku ulevi ku mphereska, maolivi gha tondeke kupasa, ndi minda yitondeke vyakurgha, mskambu umare mu khola, ndi ng'ombe muulevi mu khola,

¹⁸ndipuuli ndikondwenge mu Ambuya, ndi kusekere mwaku Chiuta, mtaski wangu.

¹⁹Ambuya Chiuta, ndiyo nthazi zangu; wasanduska marundi ghangu nge ndi marundi gha mbaŵa, watindendeska mu malo gha pachanya. Ku wakumbiska sumu: ndi ŵabangwi ŵakupindika ndi ukosi.