Read gitonga Zekariya 10 Bible Online

Zekariya 10 - gitonga bible

Zekariya 10

¹Pemphani ku Ambuya vuwa mu nyengo ya vuwa yakumariya, ku Ambuya wo akulenga mitambo ya vuwa, wo apaska vuwa, ku ŵanthu wose, kwaku yose vyakume mu munda wake.

²Pakuti ŵangoza ŵakamba vyawaka, ndi ŵamawula ŵawona utesi; ndi ŵakulota ŵakamba maloto gha utesi, ndi kusangaruska ŵaka. Chifukwa ichi ŵanthu ŵayinga-yinga ŵaka nge ndi mberere; ŵasuzgika chifukwa ŵalivi muliska.

³“Ukari wangu ukole kumikana ndi ŵaliska ndipo ndilangenge ŵarongozgi; chifukwa Ambuya ŵa maŵanja aphwere mskambu wawo, nyumba yaku Yuda, ndi aŵasanduskenge nge ndi kavalo wawo wakurumbika mu nkhondo.

⁴Kutuwenge kwaku iwo mwa wa mungodya, kwaku iwo mzumali wakukhome hema, kwaku iwo uta wa nkhondo, kwaku iwo fumu ye yose.

⁵Ndipo pamoza ŵakaŵanga nge vinkhara vya nkhondo, ŵakukandirizgiya pasi ŵarwani ŵawo mu mawulambwe gha miseu; ŵapotenge chifukwa Ambuya ŵe nawo. Ndipo ŵakamaranga ŵakukwera pa kavalo.

⁶“Ndipo ndikhozgenge nyumba yaku Yuda, ndi nditaskenge nyumba yaku Yosefe. Ndizenge so nawo; chifukwa nde nawo ndi lisungu, ndipo ŵakaŵanga nge ndengavi kuŵajowo; chifukwa ine nde Ambuya Chiuta wawo ndipo ndiŵamukenge.

⁷Ndipo Efraimu waŵenge nge ndi ngwazi, mitima yawo yikondwenge nge ŵamwa vinyo. Ŵana ŵawo ŵawonenge ndi ŵakakondwanga, mitima yawo yikondwenge mu Ambuya.

⁸“Ndiŵambiyenge khweru, ndi kuŵawunjika, chifukwa ndaŵawombo; ŵakaŵanga ŵanandi nge ndimo ŵanguŵiya kali.

⁹Chingana ndaŵambininiskiya mu ŵa mitundu, ndipuuli mu vyaru vyakutali ŵandikumbukenge, ŵajenge pamoza ndi ŵana ŵawo, ndi ŵakawenga.

¹⁰Ndizenge nawo ku muzi kutuwa ku charu cha Egipiti ndi kuŵawunjika kutuwa ku Asiriya, ndizenge nawo mu charu cha Gileada ndi Lebanoni, mpaka malo ghaŵaŵiye ghamana.

¹¹Ndipo ŵaporotenge mu nyanja ya charu cha Egipiti,[1] ndi mayigha gha nyanja ghamupumika ndipo ndimba zose za msinji Nile ziphwenge. Ndipo kujikuzga kwa Asiriya kusiskikiyenge pasi, ndipo ndodo ya ukaronga waku Egipiti yituwengeko.

¹²Ndipo ndiŵakhozgenge mu Ambuya ndipo ŵakakankhuskikanga mu zina lake,” atiti Ambuya.