Read gitonga Zekariya 12 Bible Online

Zekariya 12 - gitonga bible

Zekariya 12

¹Mazu gha Ambuya ghakunena Yisraele: Viyo atiti Ambuya, wo akutandika machanya ndi kuŵika chiŵanja cha charu chapasi, ndipo angulenga mzimu mukati mwa munthu:

²“Ehe, ndikhumba kuchita Yerusalemu kuŵa nkhombo yakutenthemeska ŵanthu wose kwakuzunguliya; kumuŵiyenge ndi Yuda so asani Yerusalemu wajarizgikenge.

³Mu zuŵa lo ndichitenge Yerusalemu kuŵa mwa uzitu ku ŵanthu wose; wo ŵaunyamuwenge ŵakajitekenyuwanga; ndipo mitundu yose ya charu chapasi yiwunganenge kumikana ndi Yerusalemu.

⁴Mu zuwa lo atiti Ambuya, ndikosonge kavalo yose kwakuziziswa, ndi wakukwera yo ndi kufuntha. Kweni ndikaphwerenga nyumba yaku Yuda, mu zuŵa lo ndichikoso kavalo yose wa ŵanthu ndi uchiburumutiya.

⁵Penipo mafuku ghaku Yuda ghatinge, ‘Ŵakuja mu Yerusalemu ŵe ndi nthazi mwa Ambuya, Chiuta wawo wa maŵanja.’

⁶Mu zuŵa lo ndichitenge mafuku ghaku Yuda kuŵa nge nchiŵiya chamoto mukati mu nkhuni, nge ndi chenje mukati mu nchinda; uwochenge ŵanthu wose kwakuzunguriya ku marghe ndiku maze, pa nyengo yo Yerusalemu wakaŵanga weche ndi ŵakujamo mu malo ghake, mu Yerusalemu.

⁷“Ambuya apaskenge danga upundi ku mahema ghaku Yuda, mwakuti unkhankhu wa nyumba yaku Davidi ndi unkhankhu waku wo ŵaja mu Yerusalemu ureke kurumbika kuruska waku Yuda.

⁸Mu zuŵa lo Ambuya avikiriyenge ŵakuja mu Yerusalemu, viyo kuti yo ngwakuvuka ukongwa mukati mwawo pa zuŵa lo waŵenge nge ndi Davidi, ndipo nyumba yaku Davidi yiŵenge nge ndi Chiuta, nge ndi mungelo wa Ambuya panthazi pawo.

⁹Ndipo pa zuŵa lo ndikhumbenge kuparghang'a mitundu yose ya ŵanthu yo yituza kubayana ndi Yerusalemu.

¹⁰“Ndipo ndipunguliyenge pa nyumba yaku Davidi ndi pa ŵakuja mu Yerusalemu mzimu wangu wachisungu-sungu ndi wakuŵeyere, viyo kuti asani ŵalereska paku yo ŵangumugwaza, ŵamuliriyenge, nge ndimo munthu waliriya kananda wake, ndipo wamuliriya ukongwa, nge ndi munthu yo waliriya mwana wake wakudanga.

¹¹Mu zuŵa lo muŵenge chitenje chikuru mu Yerusalemu nge nchitenje cha Hadadirimoni mu dambo la Megido.

¹²Ndipo charu chose chiliriyenge, mbumba paku yija; mbumba ya nyumba yaku Davidi paku yija, ndi ŵawoli ŵawo paku ŵija; mbumba ya nyumba yaku Natani paku yija, ndi ŵawoli ŵawo paku ŵija;

¹³mbumba ya nyumba yaku Levi paku yija, ndi ŵawoli ŵawo paku ŵija; mbumba ya ŵaSimeti paku ŵija, ndi ŵawoli ŵawo paku ŵija;

¹⁴ndi mbumba zose zo zajapo, mbumba yose paku yija, ndi ŵawoli ŵawo paku ŵija.