Read gitonga Zekariya 2 Bible Online

Zekariya 2 - gitonga bible

Zekariya 2

¹Ndingulereska, ndinguwona, ndipo ehe, munthu we ndi chingwi chakupimiya mu janja lake!

²Ndipo ndinguti, “Kumbi uta pani?” Iyo wanguti kwaku ine, “Kwachipima Yerusalemu, kuwona usani wake ndi utali wake mo ulili.”

³Ndipo ehe, mungelo yo wakambanga nane wangutuwa, mungelo munyake wanguza kukumana nayo,

⁴ndipo wanguti kwaku iyo, “Chimbiya, unene munyamata yuwa, kuti, ‘Yerusalemu wakaŵanga ndi ŵanthu ŵakujamo nge ndi mizi yambura malinga, chifukwa cha unandi wa ŵanthu ndi ng'ombe mwenimo.

⁵Chifukwa ine ndiŵenge kwaku wo linga la moto kwakuzunguriya, atiti Ambuya, ndipo ndiŵenge unkhankhu mukati mwakuwo.’ ”

⁶Ehe! Yendeskani, muthaŵeko ku charu chaku nkhonde, atiti Ambuya, chifukwa ndamumbininiskiyani kutali nge ndi mphepo zinayi za kuchanya, atiti Ambuya.

⁷Thaŵiyani ku Zioni, mwa ŵanthu ŵangu imwe muja mu Babiloni.

⁸Chifukwa atiti viyo Ambuya ŵa maŵanja, pavuli pa unkhankhu wawo angundituma ku mitundu yo yingumuskoŵani; chifukwa yo wakwaska imwe, ndikwesa wakwaska mboni ya jiso lawo:

⁹“Ehe, sono ndisukung'iskenge janja langu pachanya pawo; ndipo ŵakaŵanga miskowo kwaku wo ŵatuŵateŵete. Viyo muziŵenge kuti Ambuya ŵa maŵanja andituma.

¹⁰Mbaninga, sekereni, imwe mwa ŵanthu ŵaku Zioni; chifukwa ehe! Ndituza ndijenge mukati mwinu, atiti Ambuya.

¹¹Ndipo mitundu yinandi yiwunganenge kwa Ambuya mu zuŵa lo, ndipo ŵakaŵanga ŵanthu ŵangu; Ine ndijenge mukati mwako, ndipo uziŵenge kuti Ambuya ŵa maŵanja andituma kwako.

¹²Ndipo Ambuya asankhenge Yuda nge ndi phande lawo mu charu chakupaturika cho, ndipo asankhenge so Yerusalemu.”

¹³Jani chisisi, mwa ŵanthu mose panthazi pa Ambuya, chifukwa ayuka mu malo ghawo ghakupaturika ghakujamo.