Read gitonga Zekariya 4 Bible Online

Zekariya 4 - gitonga bible

Zekariya 4

¹Ndipo mungelo wa Ambuya yo wakambanga nane wanguza so, wangundiyuska, nge ndi munthu yo wayuskika mutulo twake.

²Ndipo wanguti kwangu, “Kumbi uwona chine?” Ndinguti, “Ndiwona ehe, chikoleru-nyali cha golide chose, ndi mbali pachanya pake ndi nyali zinkhonde ndi ziŵi paku cho, ndi milomo yinkhonde ndi yiŵi pachanya paku zose.

³Ndipo pe miti ya maolivi penipo, umoza kuchili ku marghe gha mbali, ndi unyake ku maze.”

⁴Ndipo ndinguti ku mungelo yo wakambanga nane, “Kumbi ivi vine, mbuyangu?”

⁵Ndipo mungelo yo wakambanga nane wangwamuka wanguti, “Kumbi uziŵa cha kuti ivi vyakuti viyo?” Ndinguti “Awa, mbuyangu.”

⁶Viyo wangunena nane, “Yagha ndi mazu gha Ambuya kwaku Zerubabele; ndi nkhondo cha, pamwenga ndi nthazi cha, kweni ndi Mzimu wangu, atiti Ambuya ŵa maŵanja.

⁷Ndiwe yani, iwe phiri likuru? Panthazi paku Zerubabele usandukenge chidika; wazenge nawo mwa wapachanya mu kudanirizga, ‘Chimangu, chimangu kwaku wo!’ ”

⁸Ndipo kunguŵa kuti mazu gha Ambuya ghanguza so kwangu, ghakuti,

⁹“Manja ghaku Zerubabele ghazenga chiŵanja cha nyumba iyi; manja ghake ndigho ghamumatizga so.” Ndipo uziŵenge kuti Ambuya ŵa maŵanja andituma kwaku imwe.

¹⁰Chifukwa yose yo wanguyeya zuŵa la tunthu tumana wakasekeriyanga, ndipo wawonenge chingwi chakupimiya cha muzengi mu janja laku Zerubabele. “Yagha ghankhonde ndi ghaŵi ndi maso gha Ambuya gho ghalereska mu charu chose chapasi.”

¹¹Viyo ndinguti kwaku iyo, “Kumbi miti iyi yiŵi ya maolivi nchine, kuchiri ku marghe ndi ku maze kuchikoleru nyali?”

¹²Kachiŵi ndinguti so kwake, “Kumbi mphanda zo ziŵi za miti ya maolivi nchine zo ze pafupi ndi vyakupunguliya vya golide vyo mafuta ghatuwamo?”

¹³Iyo wanguti, kwaku ine, “Kumbi uziŵa cha kuti ivi ndi vyakuti viyo?” Ndinguti, “Awa, Ambuya.”

¹⁴Ndipo wanguti, “Yaŵa mbakupakika ŵaŵi wo ŵatuma pafupi ndi Ambuya ŵa charu chose chapasi.”