Read gitonga Zekariya 8 Bible Online

Zekariya 8 - gitonga bible

Zekariya 8

¹Ndipo mazu gha Ambuya ŵa maŵanja ghanguza so kwaku ine, kuti,

²“Viyo atiti Ambuya ŵa maŵanja: Nde ndi sanje chifukwa chaku Zioni, sanje yikuru, ndipo nde ndi sanje chifukwa chaku iyo ndi kutundiya kukuru.

³Viyo atiti Ambuya: Ndawere ku Zioni ndipo ndijenge mukati mu Yerusalemu, ndipo Yerusalemu wakadanikanga msumba wamagomekezgeka, phiri la Ambuya ŵa maŵanja, phiri lakupaturika.

⁴Viyo ndimo anene Ambuya ŵa maŵanja; Madoda ndi nchembere ŵakajanga so mu ŵagurwi ŵaku Yerusalemu, yose ndi ndodo yake mu janja lake chifukwa cha ukhongwe.

⁵Ndi miseu ya msumba yizazenge ŵahurwa ndi ŵasungwana kusoŵe mwenimo.

⁶Viyo ndimo anene Ambuya ŵa maŵanja: Asani kuŵenge kwakuziziswa mu maso gha ŵakujako ŵamtundu uwu mu mazuŵa yagha, kumbi kuŵenge kwakuziziswa mu maso ghangu atiti Ambuya ŵa maŵanja?

⁷Viyo ndimo anene Ambuya ŵa maŵanja: Nadi, nditaskenge ŵanthu ŵangu ku charu chakuvuma ndi ku charu chaku zambwe;

⁸ndizenge nawo ndipo ŵajenge mukati mu Yerusalemu; ŵaŵenge ŵanthu ŵangu, Ine ndiŵenge Chiuta wawo, mu uneneska ndi mu urunji.”

⁹Viyo ndimo anene Ambuya ŵa maŵanja; “Manja ghinu ghakhome, imwe mu mazuŵa yagha mwavwa mazu mu mlomo wa ŵamchimi, kutuwa ku zuŵa lo chiŵanja cha nyumba ya Ambuya ŵa maŵanja chinguzengeke; kuti kasopi wazengeke.

¹⁰Chifukwa ghandafike mazuŵa gha kwengavi mphoto ku munthu pamwenga mphoto yose ku chakuŵeta, pamwenga wakutaskika ku murwani kwaku yo wangutuwa pamwenga wangusere; chifukwa ndinguŵika munthu yose kulimbana ndi mwanase wake.

¹¹Kweni sono kuti ndiŵachitiyenge ŵakujako ŵa ŵanthu cha nge ndi mu mazuŵa ghakudanga, atiti Ambuya ŵa maŵanja.

¹²Pakuti kuŵenge kumija kwa chimangu; mphereska yipasenge vipasi vyake, ndipo nyata yiperekenge kwandana kwake, machanya nagho ghakaperekanga dungwi lake; ndipo nkhachitanga kuti ŵakujako ŵa ŵanthu yaŵa, ŵaŵe ndi vyose ivi.

¹³Ndipo kuŵenge kuti, nge ndimo munguwiya thembo mukati mu mitundu, iwe nyumba yaku Yuda ndi nyumba yaku Yisraele, viyo ndimo ndimtaskiyeninge ndipo muŵenge ŵakutumbikika. Mungopanga, kweni manja ghinu ghakhome.”

¹⁴Chifukwa viyo atiti Ambuya ŵa maŵanja: “Nge ndimo ndingughanaghaniya kuchita chiheni kwaku imwe po auskemwe ŵangundisosomole ku ukari; ndipo kuti ndingugowoka cha, atiti Ambuya ŵa maŵanja,

¹⁵viyo so ndaghanaghana mu mazuŵa yagha kuchitiya umampha Yerusalemu ndi nyumba yaku Yuda; mungopanga;

¹⁶vinthu vyo muchitenge ndi ivi: Kambani uneneska munthu yose ku munyake, chitani mu malikomo ghinu vyeruzgu vya uneneska ndi vyakupanga chimangu,

¹⁷rekani kughanaghaniyana uheni yumoza ndi munyake mu mtima winu, munganjanga kurapa utesi, chifukwa vinthu ivi vyose nditinkha, atiti Ambuya.”

¹⁸Ndipo mazu gha Ambuya ŵa maŵanja ghanguza kwangu, ghakuti,

¹⁹“Viyo atiti Ambuya ŵa maŵanja: Kufunga kwa mwezi wachinayi, ndi kufunga kwa wachinkhonde, ndi kufunga kwa wa chinkhonde ndi chiŵi, ndi kufunga kwa wa chumi, kukaŵanga ku nyumba yaku Yuda mu nyengo za likondwa ndi chimwemwe, ndi madghera ghakusangaruska; viyo mwanje uneneska ndi chimangu.

²⁰“Viyo atiti Ambuya ŵa maŵanja: Kukaŵanga so kuti ŵanthu ŵazenge, ŵanthu ŵamu misumba yinandi.

²¹Ŵanthu ŵamu msumba umoza ŵarutenge ku msumba unyake, ndi kuti, ‘Tiyeni tendeske tikapemphe wezi wa Ambuya, ndi kupenja Ambuya ŵa maŵanja; ine nane so ndiruta.’

²²Ŵanthu ŵanandi ndi mitundu yanthazi yikazanga, kupenja Ambuya ŵa maŵanja mu Yerusalemu ndi kupempha wezi wa Ambuya.

²³Viyo atiti Ambuya ŵa maŵanja: Mu mazuŵa gho, ŵanthu ŵakutuwa ku mitundu ya karongoroledu kose ŵakonge saru ya muYuda, ndi kuti, ‘Utizomerezge tirutenge, nawe, chifukwa tavwa kuti Chiuta we ndi iwe.’ ”