Read gitonga Malaki 3 Bible Online

Malaki 3 - gitonga bible

Malaki 3

¹“Nadi, ndatuma thenga langu kunozga nthowa panthazi pangu, ndipo Ambuya wo mupenja akazanga kwamabuchibuchi mu kasopi wawo; ehe lituza thenga la phanganu mwaku lenilo mukondwere, atiti Ambuya ŵa maŵanja.

²Kweni ndiyani yo wangazizipizga zuŵa lake lakuziya, ndipo ndiyani wangama pa wawoneka? “Chifukwa wenge ndi moto wa wakwenga, ndi nge ndi sopo wa wakuchapa;

³wajenge nge ngwakwenga ndi wakutozga siliva. Wakatozganga ŵana ŵaku Levi ndi kuŵayengetuwa nge ndi golide ndi siliva, mpaka ŵapereke mipasku yakwenere ku Ambuya.

⁴Viyo mpasku waku Yuda ndi Yerusalemu ukakondweskanga Ambuya nge ndi mu mazuŵa ghakali ndimu virimika vyakudanga.

⁵“Viyo ndinderenge kufupi kwaku imwe kuzacheruzga, ndiŵenge kaboni wamwamphu kususka ŵakuwukwa, ŵareŵi, ndi ŵakurimbira kwautesi; ndi wo ŵapusika wanchitu mu malipilo ghake, choko ndi mranda wambura awiske; ndi wo ŵadika mlendo, ndi kureka kundopa ine, atiti Ambuya ŵa maŵanja.

⁶“Chifukwa ine Chiuta kuti ndisintha cha, imwe mose, ŵana ŵaku Yakobe mulivi kumara.

⁷Kwamba mazuŵa gha auskemwe mwapatuka ku marangu ghangu, ndi mwareka kughasunga. Wereni kwaku ine, ndipo ndiwerenge kwaku imwe, atiti Ambuya ŵa maŵanja. Kweni mutiti, ‘Tikawenga uli?’

⁸Kumbi munthu wangamubiya Chiuta? Ndipuuli, mutindibiya. Kweni mutiti, ‘Tikubiyani uli?’ Pakupereka vyachichumi vinu, ndi pakupaska mpasku winu wambura kwenere.

⁹Mwatembeka ndi thembo, chifukwa mutindiba. Mtundu winu wose watembeka.

¹⁰Zina ndi vyachichumi vyamphumphu ku nyumba yakusungiyamo, mwakuti muŵe vyakurgha mu nyumba yangu. Po ndipo mudese, atiti Ambuya ŵa maŵanja, asani kuti nkhamujuliyaninga cha madangazi gha kuchanya, ndi kumupunguliyani vitumbiku vyakuzara.

¹¹Nkachenyanga zombe chifukwa chaku imwe, kuti wareke kurgha ndi kumwa vipasi vya nyata yinu, ndipo mphereska zinu mu munda kuti zikatondekanga kupasa cha, atiti Ambuya ŵa maŵanja.

¹²Viyo mitundu yose yikatinge mwe ŵakutumbikika, chifukwa mukaŵanga mtundu wakukondweska, atiti Ambuya ŵa maŵanja.

¹³“Mazu ghinu ghaŵa ghazitu kwaku ine, atiti Ambuya. Ndipuuli mutiti, ‘Taŵereŵeta uli kumikana ndi imwe?’

¹⁴Mwakati, ‘Nchaŵaka kuteŵete Chiuta. Kumbi umampha ngune kuti tisungi marangu ghake, pamwenga ŵakwenda nge tiliya pa maso pa Ambuya ŵa maŵanja?

¹⁵Kwamba le titeska kuti ŵakujikuzga mbakutumbikika. Wo ŵachita uheni ŵasakata, ndipo penipo ŵamwesa Chiuta ŵaphokwa.’ ”

¹⁶Viyo wo ŵangopa Ambuya ŵangukambiskana uyo ndi munyake. Ambuya anguŵaphwere ndi anguŵavwa, ndipo buku lachikumbusku lingulembeka pa maso pawo la mazina ghaku wo ŵanguwopa Ambuya, ndi kughanaghana pa zina lawo.

¹⁷“Ŵakaŵanga ŵangu, atiti Ambuya ŵa maŵanja, usambasi wangu wa pade pa zuŵa lo ndichichita. Ndipo ndiŵachitiyenge lisungu nge ndimo munthu wachitiya ndi mwana wake yo watimteŵete.

¹⁸Viyo so mwamupatuwa murunji ku muheni, wakuteŵete Chiuta ndi yo wareka kumuteŵete.