Read gitonga Mateyu 10 Bible Online

Mateyu 10 - gitonga bible

Mateyu 10

¹Ndipo wakudana ŵasambizi ŵake chumi ndi ŵaŵi, wanguŵapaska mtufu wapa mizimu yawiyu, kwachiyituzga, ndi kwachichizga nthenda zose ndi urwali wose.

²Mazina gha ŵakutumika chumi ndi ŵaŵi ndi yagha: wachimoza, Simoni, wakudanika Petro, ndi Andreya, mhurwa wake; Yakobe, mwana waku Zebediya, ndi Yohane, mhurwa wake;

³Filipu, ndi Bartolomeyu; Tomase, ndi Mateyu, wa msonkho yo; Yakobe, mwana waku Alifeyu, ndi Tadeyu;

⁴Simone, mKanane, ndi Yuda mKeriote, yo wangumumpachiya.

⁵Wo chumi ndi ŵaŵi Yesu wangutuma, wakuŵalanguliya, wakuti, “Mungarutanga mukati mu ŵamitundu cha, ndi mu muzi wa ŵaSamaria mungaserengemo cha;

⁶kweni ukongwa mukenge ku mberere zakutayika za nyumba yaku Yisraele.

⁷Ndipo muchiruta memezani, ŵakuti, ‘Waŵandika ufumu wakuchanya.’

⁸Chizgani ŵakutama, ŵakufwa yuskani, ŵamakhate tozgani, ŵademone tuzgani. Kwawezi mwaronde, kwawezi paskani.

⁹Mungajitole golide cha, chingana ndi siliva cha, chingana ndi tambala mu malikwamba ghinu cha:

¹⁰katiri[3] wapa nthowa cha, chingana ndi minjirira yiŵi cha, chingana ndi viyatucha, chingana ndi ndodu cha: chifukwa wanchitu ngwakwenere mpaku wake.

¹¹Ndipo mu msumba we wose, chingana ndi muzi, mo mungasere, penjanimo yo ngwakwenere; ndipo tandarani ndi mweniyo, mpaka po mutuwamo.

¹²Ndipo muchisere mu nyumba, muyitauzge.

¹³Ndipo asani nyumba yo njakwenere, chimangu chinu chiziye paku yo: kweni asani kuti njakwenere cha, chiwere kwaku imwe chimangu chinu.

¹⁴Ndipo mweniyo yose wangamrondeni cha, chingana nkhuvwa mazu ghinu, muchituwamo mu nyumba yo pamwenga muzi wo, kung'unthani fuvu la marwayo ghinu.

¹⁵Nadidi ndinene imwe, mu zuŵa la cheruzgu kuŵenge kwamakunthirikako ku charu cha Sodomu ndi Gomora, kwakuruska ku muzi muwa.

¹⁶“Awonani, ndikutumani imwe nge ndi mberere mukati mu zimphumphi. Viyo muŵe ŵachinjeru nge ndi zinjoka, ndi ŵakuzika nge ndi zinkhunda.

¹⁷Kweni ŵacheŵeni ŵanthu: chifukwa ŵamkomboleninge ku maupu, ndipo mu masinagoge ghawo ŵamkumukwechuwani,

¹⁸ndipo so ku zinduna ndi ŵakaronga mutolekiyenge pa chifwa chaku ine, kwachiŵiya iwo ndi ŵaMitundu chisimikizgu.

¹⁹Kweni penipo ŵamukumweruzgani, mungakweŵeka ndi mo mungakambiya pamwenga cho murongoronge cha, chifukwa kupaskikenge kwaku imwe mu ora lenilo chenicho murongoronge.

²⁰Chifukwa kuti ndimwe cha mwamurongoro, kweni Mzimu wa Auskemwe ndiyo wamrongorore mwinu.

²¹Ndipo mbali wapachiyenge mbali ku nyifwa, ndi wiske mwana: ndipo ŵana ŵayukiyenge pa ŵapapi, ndi ŵaŵabayiskenge.

²²Ndipo muŵenge ŵakutinkhika ndi wose pa chifwa cha zina langu: kweni wakukunthiyapo mpaka umari, ndiyo wakataskikanga.

²³Ndipo ŵachimundondoroskani mu muzi uwu, thaŵiyani ku unyake; chifukwa nadi ndinene imwe kuti mukafiskanga mizi yose yaku Yisraele cha, wenga wandazi Mwana wa munthu.

²⁴“Kuti msambizi we pachanya pa msambizgi wake cha, chingana ndi mteŵeti pachanya pa mbuyake cha.

²⁵Nkhwakukwaniya msambizi kuti waŵe nge ndi msambizgi wake, ndi mteŵeti nge ndi mbuyake. Asani mweninyumba ŵatimzumbuwa Belzebule, uli ukongwa kwakuruska ŵamunyumba yake?

²⁶“Viyo mungopanga wo cha: chifukwa palive kakuvunikirika ko karekenge kuvunulika; ndi kakubisika ko karekenge kuziŵikwa.

²⁷Cho ndikuneniyani mu mdima, kambani pakweru, ndipo cho mutuvwa mu makutu kwakutokotezga memezani pa mabagha.

²⁸Ndipo mungopanga cha ŵakubaya liŵavu, kweni mbakuwara nthazi kubaya mzimu: ukongwa mopenge yo ngwanthazi kwananga mzimu nawo ndi liŵavu mu gehena.

²⁹Asi twaphwitu tuŵi tugurika katambala kamoza? Ndipo kuti kamoza kaku to kawenge pasi cha, kwambura khumbo la Auskemwe.

³⁰Kweni masisi nagho gha mutu winu ghaŵerengeka ghose.

³¹Mungopanga cha; imwe muruska twaphwitu tunandi?

³²“Viyo yose yo wakazomeranga ine paurongo pa ŵanthu, nane so ndakumzomera paurongo pa Ada wo ŵakuchanya.

³³Ndipo yose yo wangakana ine paurongo pa ŵanthu, nane so ndamkumukana paurongo pa Ada wo ŵakuchanya.

³⁴“Mungarungurukanga cha kuti ndikuziya kwazipaska chimangu pa charu; kuti ndikuziya kwazipaska chimangu cha; kweni lipanga.

³⁵Chifukwa ndikuziya kwazigawuskana mwana munthurumi ku wiske, ndi mwana munthukazi ku nyina, mkumwana ku mpongozi wake;

³⁶ndipo ŵamawongu ŵa munthu ŵaŵenge ŵamunyumba yake.

³⁷Yo ngwakwanja wiske pamwenga nyina kwakuruska ine kuti ngwakwenere ine cha; ndipo yo ngwakwanja mwana munthurumi pamwenga mwana munthukazi kwakuruska ine, kuti ngwakwenere ine cha.

³⁸Ndipo yose yo wareka kujitole mphinjika yake ndi kurondo ine, kuti ngwakwenere ine cha.

³⁹Yo wasaniya umoyo wake, wawutayenge; ndipo wakutaya umoyo wake pa chifukwa chaku ine, wawusaniyenge.

⁴⁰“Wakuronde imwe waronde ine, ndipo wakuronde ine waronde wakundituma.

⁴¹Yo waronde mchimi mu zina la umchimi, warondenge mphotu ya mchimi; ndipo yo waronde mrunji mu zina la urunji wake, mphotu ya mrunji warondenge.

⁴²Ndipo yose yo wangamweska yumoza wa ŵamana yaŵa chingana ndi chandi cha maji ghakuzizira mu zina la msambizi, ndikuneneskiyani, kuti wangataya mphotu yake cha.”