Read gitonga Mateyu 11 Bible Online

Mateyu 11 - gitonga bible

Mateyu 11

¹Ndipo kunguŵa kuti wati wamara Yesu kuŵalanguliya wasambizi ŵake chumi ndi ŵaŵi, wangutuwako kweniko wanguruta kwachisambizga ndi kutaula mu mizi yawo.

²Kweni Yohane wanguvwa mu ulinda machitidu ghaku Kristu, wangutuma ŵasambizi ŵake,

³wakufumba, “Kumbi imwe ndimwe yo watuza, pamwenga tilereziyenge munyake?”

⁴Ndipo yesu wangwamuka ndi wanguŵanene, “Kaninga kamtauliyeni Yohane vyo mutuvwa ndi muwona;

⁵ŵachiburumutiya ŵalereska, ŵakuganthiya ŵatenda, ŵamakhate ŵatozgeka, ŵamgota ŵatuvwa, ŵakufwa ŵayuskika, ndipo ŵakavu ŵataulikiya makani ghakunozga.

⁶Kweni ngwakutumbikika yose yo kuti ŵaguŵiskika mwaku ine cha.”

⁷Ndipo ŵachiruta iwo, wangwamba Yesu kukambiya mizinda yo gha paku Yohane, “Munguturiya kubozwa lo kwachiwona chine? Dete lakusukuniskika ndi mphepu kumbi?

⁸Kweni mungutuliya kwachiwona chine? Munthu wakuvwara minjirira yakuworofoka mbamu nyumba za mafumu.

⁹Kumbi mungutuliya chine? Kwachiwona mchimi? Inyadi, ndinene imwe, ndi wakuruska mchimi,

¹⁰ndi mweniyo kwalembeka paku iyo, ‘Awonani, ine ndituma thenga langu paurongo pa chisku chako, mweniyo warongosonge nthowa yako paurongo pako.’

¹¹Nadidi ndikuneniyani, mu ŵakupapika ndi ŵanthukazi kuti wayuka cha muraku kwakuruska Yohane Mbatizi: kweni mumanako yo mu ufumu wakuchanya ndi mura kwaku iyo.

¹²Ndipo kutuwa ku mazuŵa ghaku Yohane Mbatizi mpaka ku sono ufumu wakuchanya wakomwa ndi masuzgu, ndipo ŵanthu ŵa viwawa ŵati wupoka ndi nthazi.

¹³Chifukwa ŵamchimi wose, ndi langulu lo, ŵanguloska ndi vinthu vyo vikazanga mpaka paku Yohane.

¹⁴Ndipo asani mukhumba kuwuronde, Yohane, ndiyo Eliya yo wazanga.

¹⁵Wakuŵa nagho makutu kuvwa wavwe.

¹⁶“Kweni ndilinganizgenge mgonezi uwu ndi chine? Ulingana ndi ŵana ŵakuteka pasi mu maluluwa, ndi ŵakubongore ku ŵanyawo, ŵakuti,

¹⁷‘Tingufyororoske imwe, ndipo kuti munguvina cha; tinguliriya imwe, ndipo kuti mungutenje cha.’

¹⁸Chifukwa wanguza Yohane wakurgha cha chingana nkhumwa cha, ndipo ŵatiti, ‘We ndi demone.’

¹⁹Wanguza mwana wa munthu wakurgha ndi wakumwa, ndipo ŵatiti, ‘Awonani, munthu nkharghi, ndi nkhamwi, bwezi la ŵamsonkho ndiŵalakwi!’ Ndikweni zeru yirunjiskika ndi machitidu ghake.”

²⁰Sono wangwanda kuchenya mizi mwenimo vyanthazi vyake vinandi vinguchitika, chifukwa kuti yingung'anamuka cha.

²¹“Owe, Korazine we! Owe Betesaida we! Pakuti ne mu Turo ndi Sidoni vinguchitikamo vyanthazi vyakuchitika mwinu, mphanyi mu chigudulu ndi choto ŵakung'anamuka kali.

²²Kweni ndikuneniyani, mu zuŵa la cheruzgu kuŵiyenge Turo ndi Sidoni kwamakunthirikako kwakuruska kwaku imwe.

²³Ndipo iwe, Kapernaumu, utumphulikiyenge mpaka kuchanya, nthu? Mpaka ku Hadesi upawuskikiyenge. Chifukwa asani mu Sodomu vinguchitika vyanthazi vyakuchitika mwako, mphanyi wungujaririya mpaka kuno ku le.

²⁴Kwenidi ndinene imwe, kuti mu zuŵa la cheruzgu ku charu cha Sodomu kuŵenge kwamakunthirika kwakuruska kwaku imwe.”

²⁵Pa nyengo yeniyo, Yesu wanguti, “Ndikuwongani, Ada, mweni kuchanya ndi pasi, kuti munguvibisa ivi ku ŵazeru ndi ŵakuwamo, ndipo munguvivumbuliya ku ŵamjedu.

²⁶Inya, Ada, pakuti viyo ndimu kunguwoneke umampha mu maso ghinu.

²⁷Vyose vyaperekeka kwaku ine ndi Ada: ndipo palive yumoza yo waziŵa Mwana kweni Ada pe, ndipo palive yumoza yo waziŵa Dada kweni Mwana pe, ndi so mweniyo yose Mwana wakhumba kumvumbuliya.

²⁸Zani kwaku ine, mose mwaŵakudinirwa ndi mwaŵakuzitiskika, ndipo ine ndikupumuzganinge;

²⁹jitoleni pinu goŵa langu, ndi sambirani kwaku ine; pakuti ndine mpovu ndi wakujiyuyuwa mu mtima: ndipo musaniyenge chipumulu ku mizimu yinu.

³⁰Chifukwa goŵa langu ndakoroŵa, ndi chifinga changu nchiyuyu.”