Read gitonga Mateyu 14 Bible Online

Mateyu 14 - gitonga bible

Mateyu 14

¹Pa nyengo iyi Herode, wachinaikiru[4] yo, wanguvwa thenthe laku yesu,

²Ndipo wanguŵanene ŵateŵeti ŵake, “Mwenuyu ndi Yohane Mbatizi yo; wayuka ku ŵakufwa; ndipo chifukwa chenicho vyanthazi ivi vichitika mwake.”

³Chifukwa Herode, wati wamuko Yohane, wangumumanga ndi kumutaya mu ulinda pa chifukwa chaku Herodiya muwoli waku Filipu, mhurwa wake.

⁴Chifukwa Yohane wamukanizganga, “Kuti kuyamu cha kuti uŵe nayo.”

⁵Ndipo pakukhumba kumubaya, wangopa mzinda wo, pakuti ŵangumpimiya nge ndi mchimi.

⁶Kweni lati lafika zuŵa la kawi kaku Herode, mwana munthukazi waku Herodiya wanguvina mukati, ndipo wangukondweska Herode,

⁷viyo kuti wangurapa rapu kumpaska chenicho chose wangapempha.

⁸Ndipo msungwana yo, pakusambizgika ndi anyina, wanguti, “Ndipaskeni panu pa mbale mutu waku Yohane Mbatizi yo.”

⁹Karonga wanguchita chitima; kweni chifukwa cha marapu gho, ndi chifukwa cha ŵakutekapo pamoza nayo, wangulangula kuti upaskike;

¹⁰ndipo wangutuma ndi wangudumuwa mutu waku Yohane mu nyumba ya ulinda,

¹¹ndipo mutu wake ungutoleka pa mbale, ungupaskika ku msungwana yo: ndipo wanguwutole ku anyina.

¹²Sono ŵanguza ŵasambizi ŵake, ŵangutuzga thupi lo, ndi ŵangumuŵika; ndipo ŵanguza chimtauliya Yesu.

¹³Ndipo wachivwa Yesu wangutuwako kweniko mu ngaraŵa wanguza ku malo ghabozwa ku udeke; kweni yati yavwa mizinda yo, yingumrondo pa mtunda pasi kutuwa ku mizi.

¹⁴Ndipo wachituwa mu ngaraŵa wanguwona mzinda ukuru, ndipo wanguŵafwiya lisungu, wanguŵachizga ŵarwali ŵawo.

¹⁵Ndipo kwati kwaŵa mazulo, ŵasambizi ŵangumziya ŵakuti, “Malo ngabozwa, ndipo ora laruta mbwenu; tumani mizinda yo. Alinga ŵarutenge ku mizi, ŵajiguliye vyaukurgha.”

¹⁶Kweni Yesu wanguŵanene kuti, “Ŵangaruta cha; ŵapaskeni kurgha.”

¹⁷Kweni ŵangumunene, “Tendi viŵande vinkhonde pe panu ndi somba ziŵi.”

¹⁸Iyo wanguti, “Vitoleni kuno kwangu.”

¹⁹Ndipo wati walanguliya mizinda kuteka pasi pa uteka, ndipo wati waronde viŵande vyo vinkhonde ndi somba zo ziŵi, wakulereska kuchanya wangutumbika, ndipo wati wamenya wangupaska viŵande ku ŵasambizi, ndi ŵasambizi wo ku mizinda.

²⁰Ndipo ŵangurgha wose, ndi ŵanguguta: ndipo ŵanguyora ghakujapo gha marivuvu sokora zakuzaza chumi ndi ziŵi.

²¹Ndipo wo ŵangurgha ŵenga ankhumba ŵanthurumi vikwi vinkhonde pade pa ŵanthukazi ndi ŵana.

²²Ndipo pavuli wanguŵachichizga ŵasambizi kusere mungaraŵa, ndi kumudanjiriya kusirgha po iyo waneniyanga mizinda yo kuti yirutenge.

²³Ndipo wati wayituzgapo mizinda, wangukwere mu phiri ku udeke kwachiromba. Ndipo kwati kwaŵa mazulo, wenga yija kwenikuwa.

²⁴Kweni ngaraŵa yo panyengo iyi yenga mukati mu nyanja, yakuvutika ndi mayigha; chifukwa mphepu yenga ku musu.

²⁵Ndipo mu lindu lachinayi la usiku wanguza kwaku wo, wakwenda pa nyanja.

²⁶Ndipo ŵasambizi pakumwona wakwenda pa nyanja ŵangumbwambwanthiya ŵakuti, “Ndi muzghuka!” Ndipo ŵangukambura chifukwa cha mantha.

²⁷Kweni ruŵi Yesu wangurongoro nawo, wakuti, “Chinthani mtima; ndine; mungopanga cha.”

²⁸Ndipo Petro, wakwamuka, wanguti, “Ambuya, asani ndimwe, ndilanguliyeni kuza kwinu pa maji.”

²⁹Ndipo wanguti, “Zanga!” Ndipo wati wasika kutuwa mu ngaraŵa, Petro wangwenda pa maji gho kuya kwaku Yesu.

³⁰Kweni wachiwona mphepu, wangopa; ndipo, wangwamba kubira, wangukambura, wakuti, “Ambuya, nditaskeni.”

³¹Kweni sosonukweni Yesu, wakutambaruwa janja lake, wangumuko, ndipo watiti kwaku iyo, “Wa chivwanu chimana we, chifukwa chine ukangang'a.”

³²Ndipo wati wakwera so mu ngaraŵa, mphepu yingugowoka.

³³Ndipo ŵamu ngaraŵa ŵangumlambiya, ŵakuti, “Ndimwe nadi Mwana waku Chiuta.”

³⁴Ndipo ŵati ŵambuka ŵanguza ku mtunda, ku Genesarete.

³⁵Ndipo ŵanthu ŵa malo ghenigho pakumziŵa ŵangutumiya mu charu chose chakuzunguliya, ndipo ŵangumtole wose ŵakutama,

³⁶ndipo ŵampempha ngakuti ŵakwaske mphonji pe za munjirira wake: ndipo wo wose ŵanguzikwaska ŵanguchizgika.