Read gitonga Mateyu 15 Bible Online

Mateyu 15 - gitonga bible

Mateyu 15

¹Sono ŵanguza kwaku Yesu ŵaFarisi ndi ŵalembi ŵakutuwa ku Yerusalemu, ŵakuti,

²“Chifukwa chine ŵasambizi ŵinu ŵajumpha mdauku wa ŵara? Chifukwa kuti ŵasamba manja cha penipo ŵaturgha kurgha.”

³Kweni, wakwamuka, wangunena nawo, “Chifukwa chine imwe namwe mujumpha langulu laku Chiuta ndi mdauku winu?

⁴Chifukwa wangukamba Chiuta ‘Tumbika ausu ndi anyoko’; ndipo ‘Wakukambiya uheni pa wiske pamwenga nyina, kufwa wafwe.’

⁵Kweni imwe mutiti, ‘Yose yo wanganene awiske pamwenga anyina, Cho mwatinge mwanduwenge imwe kwaku ine chapaskika kwaku Chiuta; kuti watumbika awiske cha.’

⁶Ndipo mwapenevya mazu ghaku Chiuta chifukwa cha mdauku winu.

⁷Mwafuzi mwe, Yesaya wanguloske imwe umampha, wakuti,

⁸‘Khamu ili litinditumbika ndi milimo yawo; kweni mtima wawo we kutari kwaku ine.

⁹Kweni ŵatindisopa kwaŵaka, kusambizga nge ndi visambizgu marangu gha ŵanthu.’ ”

¹⁰Ndipo, wakujidaniya mzinda wo, wanguŵanene, “Vwani, ndi wanimo.

¹¹Chakusere mu mlomo kuti chikazuzga munthu cha, kweni chakutuwa mu mlomo ndichu chikazuzga munthu.”

¹²Sono ŵasambizi ŵangumziya, ndipo ŵanguti kwaku iyo, “Kumbi muziŵa kuti ŵaFarisi, ŵanguti, ŵavwa mazu gho, ŵanguguŵiskika?”

¹³Kweni, wakwamuka, wanguti, “Chakupandika chose cho ŵengavi kupanda Ada wakuchanya, chizuwikenge.

¹⁴Warekeni: mbachirongozgi ŵachiburumutiya. Ndipo asani wachiburumutiya warongozga wachiburumutiya, wose ŵaŵi ŵawenge mu zenje.”

¹⁵Petro, wakwamuka, wanguti kwaku iyo, “Tifwatuliyeni ntharika yo.”

¹⁶Ndipo wanguti, “Kumbi namwe so ndasono mweche ŵambura kuwamo?

¹⁷Asi muteska kuti chose chakusere mu mlomo chiporota mu chifu, ndipo chipong'eka ku dondu?

¹⁸Kweni vyakutuwa mu mlomo vituliya mu mtima; ndipo ndivyo vikazuzga munthu.

¹⁹Chifukwa mu mtima mutuliya maghanaghanu ghaheni, zimbanda, maureŵi, mauyaya, maunkhungu, visimisimi vitesi, matuka.

²⁰Ivi ndivyo vyakukazuzga munthu; kweni kurgha ndi manja ghambura kusamba kuti kukazuzga munthu cha.”

²¹Ndipo Yesu wangutuwa kweniko, ndipo wanguruta ku vigaŵa vya Turo ndi Sidoni.

²²Ndipo wonani, munthukazi muKanani, wakutuwa mu mphaka zenizo, wangubongo, wakuti, “Ndifwiyeni lisungu, Ambuya, mwa Mwana waku Davidi; mwana wangu munthukazi wakoreka uheni ndi demone.”

²³Kweni iyo kuti wangumwamuka mazu cha. Ndipo ŵasambizi ŵake ŵanguza kumenene kuti, “Mudikeni; pakuti wakambura pavuli pidu.”

²⁴Kweni wakwamuka iyo wanguti, “Ndikutumikiya ku mberere zakutayika za nyumba yaku Yisraele pe.”

²⁵Kweni munthukazi wanguza ndi kumlambiya, wakuti, “Ambuya, ndovyeni.”

²⁶Iyo, wakwamuka, wanguti, “Kuti kuyamu cha kuto chiŵande cha ŵana ndi kupong'eŵagaru.”

²⁷Munthukazi wanguti, “Inyadi, Ambuya, kweni ŵagaru nawo ŵaturghako marivuvu ghakumbotoka pa gome la mbuyawo.”

²⁸Sono Yesu, wakumwamuka, wangumunene, “Wamunthukazi'we, nchikuru chivwanu chako: kuŵiye iwe uli ndimo ukhumbiya.” Ndipo wanguchizgika mwana munthukazi wake paora leniliya.

²⁹Ndipo wakutuwa kweniko Yesu wanguza kufupi ku nyanja ya Galile; wangukwere mu phiri lo, ndipo wanguja pasi kweniko.

³⁰Ndipo kungumziya mizinda yikuru, yakuŵa nawo pamoza ŵakuganthiya, ŵachiburumutiya, ŵambuwu, ŵakupunduka, ndi ŵanyake ŵanandi, ndipo ŵanguŵapong'a pa marundi ghake; iyo wanguŵachizga;

³¹viyo kuti mzinda wo unguzizwa wachiwona ŵambuwu kurongoro, ŵakupunduka kuŵa ŵanthazi, ŵakuganthiya kwenda, ndi ŵachiburumutiya kulereska: ndipo ŵangumkankhuska Chiuta waku Yisraele.

³²Ndipo Yesu, wakudana, ŵasambizi ŵake, wanguti, “Nde ndi lisungu ndi mzinda wo, pakuti sono watandara nane mazuŵa ghatatu, ndipo ŵalive kanthu ko ŵangargha, ndipo kuti ndikhumba kuŵawezga ŵamsara cha, vinu kokuli ŵangafwa chipoyu mu nthowa.”

³³Ndipo ŵasambizi ŵanguti, “Tingatuwa navyo nunkhu mu boswa viŵande vinandi vyakugutiska mzinda ukuru waviyo?”

³⁴Yesu wanguŵafumba, “Mwe navyo viŵande viringa?” Iwo ŵanguti, “Vinkhonde ndi viŵi, ndi tusomba tumanavi.”

³⁵Ndipo wangulanguliya mzinda wo kuteka pasi;

³⁶wakuto viŵande vyo vinkhonde ndi viŵi ndi somba; ndipo, wakuwonga, wangumenya, ndi wangupaska ku ŵasambizi, ndi ŵasambizi ku mizinda yo.

³⁷Ndipo ŵangurgha wose, ndi ŵanguguta, ndipo ŵanguyora vyakujako vya marivuvu, vitete vyakuzaza vinkhonde ndi viŵi.

³⁸Ndipo ŵakurghapo ŵenga ŵanthurumi vikwi vinayi, pade pa ŵanthukazi ndi ŵana.

³⁹Ndipo wati wawezga mizinda yo, wangusere mungaraŵa wanguza mu mphaka za Magdala.