Read gitonga Mateyu 16 Bible Online

Mateyu 16 - gitonga bible

Mateyu 16

¹Ndipo ŵanguza ŵaFarisi ndi ŵaSaduki, ndipo pakumwesa ŵangufumba kuŵarongo chisimikizgu chakutuwa kuchanya.

²Ndipo iyo wakwamuka wanguŵanene, “Kwati kwaŵa mazulo mutiti, ‘Kuchenge umampha; chifukwa mitambo yacheŵara.’

³Ndipo ndi mlenji, mutiti, ‘Le kuŵenge mphepu, chifukwa kuchanya kuŵisuka.’ Chisku cha kuchanya muziŵa kuteska, kweni visimikizgu vya zinyengo kuti muziŵa kuteska cha.

⁴Mphapu yiheni ndi yireŵi yipenja chisimikizgu, ndipo kuti chisimikizgu chipaskikenge kwaku yo cha, kweni chisimikizgu cho chaku Yona.” Ndipo wanguŵareka wangutuwapo.

⁵Ndipo ŵasambizi, ŵachiza kusirgha, ŵanguruwa kupinga chiŵande.

⁶Ndipo Yesu wanguŵanene, “Cheŵani ndi chenjeni pa mtupu wa ŵaFarisi ndi ŵaSaduki.”

⁷Kweni iwo ŵapimanga mwaku ŵija, kuti, “Nchifukwa tirive kupinga chiŵande.”

⁸Kweni Yesu, pakuziŵa, wanguti, “Mwaŵachivwanu chimana, chifukwa chine murongoro mwaku mwija, kuti mulive kupinga chiŵande?

⁹Kumbi mundawemo, chingana nkhuti mukumbuka cha viŵande vinkhonde vyo vya vikwi vinkhonde ndi masokora gharinga gho munguwunjika?

¹⁰Pamwenga viŵande vinkhonde ndi viŵi vyo vya vikwi vinayi ndi masokora gharinga gho munguwunjika.

¹¹Uli mureka kuwamo kuti ndengavi kukukambiyanivya viŵande? Kweni chenjeni ndi mtupu wa ŵaFarisi ndi ŵaSaduki.”

¹²Sono ŵanguwamo kuti, kuti waŵachenjezganga ndi mtupu wa chiŵande cha, kweni pa chisambizgu cha ŵaFarisi ndi ŵaSaduki.

¹³Ndipo Yesu, wati waza mu vigaŵa vyaku Kaesarea Filipi wangufumba ŵasambizi ŵake, wakuti, “Ŵanthu ŵatiti Mwana wa munthu ndi yani?”

¹⁴Wanguti iwo, “Ŵanyake ŵatiti, Yohane Mbatizi, ŵanyake ŵatiti Eliya; ndi ŵamwenga, Yeremiya, pamwenga yumoza wa ŵamchimi.”

¹⁵Watiti kwaku iwo, “Kweni imwe mutiti ine ndine yani?”

¹⁶Ndipo Simoni Petro wakwamuka, wanguti, “Imwe ndimwe Kristu, Mwana waku Chiuta wamoyo.”

¹⁷Ndipo Yesu wanguti, “Wakutumbikika ndiwe, Simoni mwana waku Yona, pakuti vinjeru vya munthu kuti vingukuvumbuliya ichi cha kweni Ada wakuchanya.

¹⁸Ndipo ine nane ndinene iwe, kuti ndiwe Petro, ndipo pa jarawe lenili nkhazenganga eklesiya langu; ndipo nthazi za nyifwa kuti zingalipunda cha.

¹⁹Ndikupaskenge mipiringizgu ya ufumu wakuchanya; ndipo chose cho ungamanga panupasi chiŵenge chakumangika kuchanya; ndipo chose cho ungafwatuwa panupasi chiŵenge chakufwatulika kuchanya.”

²⁰Sono wangulanguliya ŵasambizi ŵake kuti ŵangamunene yumoza cha kuti iyo ndi Kristu.

²¹Kwanda pa nyengo yeniyiya Yesu wangwamba kurongo ŵasambizi ŵake kuti kutenere iyo kuruta ku Yerusalemu, ndi kuvwiyapo vinandi ku ŵara ndi ŵazukuru ŵara ndi ŵalembi kubayika, ndipo pa zuŵa lachitatu kuyuskika so.

²²Ndipo Petro wangumto, ndi wangwamba kumsuska, wakuti, “Kuŵe kutari kwinu, Ambuya: chingamuŵiyani ichi cha.”

²³Kweni wati wang'anamuka, wangumunene Petro, “Kanga kuvuli kwangu, Satana; ndiwe guŵisku kwaku ine chifukwa kuti we kuchiri kwaku Chiuta cha kweni ku ŵanthu.”

²⁴Yesu wanguŵanene ŵasambizi ŵake, “Asani yumoza wakhumba kuza kuvuli kwangu, wajikanizge, wato mphinjika yake, ndi wandirondo.

²⁵Chifukwa yose yo wangakhumba kutaska umoyo wake, wawutayenge: kweni yose yo wangataya umoyo wake pa chifwa chaku ine, wawusaniyenge.

²⁶Chifukwa kumovyengenji munthu, asani wanganduwa charu chose, kweni wataye umoyo wake? Pamwenga munthu wapaskenge chine nge ndi maronda gha umoyo wake?

²⁷Chifukwa Mwana wa munthu wakazanga mu unkhankhu wa Awiske pamoza ndi ŵangelo ŵake; ndipo penipo wapaskenge yumoza ndi yumoza kwakulingana ndi mlimu wake.

²⁸Ndikuneneskiyani, Alipo ŵanyake ŵaku wo ŵatuma panu, wo kuti ŵesenge nyifwa cha, mpaka po ŵawona Mwana wa munthu wachiza mu ufumu wake.”