Read gitonga Mateyu 19 Bible Online

Mateyu 19 - gitonga bible

Mateyu 19

¹Ndipo kunguŵa, wati wamara Yesu mazu ghenigho, wangutuwako, ku Galile, wanguza mu mphaka zaku Yuda sirgha liya Yordane;

²ndipo yingumrondo mizinda yikuru; ndipo wanguŵachizga kweniko.

³Ndipo kunguza kwaku iyo ŵaFarisi, ŵakumwesa, ndi ŵakuti, “Kumbi kuyamu kuti munthu wampate muwoli wake pa chifukwa che chose?”

⁴Kweni wakumuka wanguti, “Asi mwaŵerenga kuti kutuwa ku mtendeku chata wanguŵachita munthurumi ndi munthukazi.

⁵Ndipo wanguti, ‘Chifukwa chenichi munthu wasiyenge wiske ndi nyina, ndipo wasunganenge ndi muwoli wake, ndipo wo ŵaŵi ŵaŵenge munthu yumoza.’?

⁶Viyo kuti mbaŵi so cha, kweni munthu yumoza. Viyo chenicho Chiuta wamangirizga pamoza munthu wangafwatuwanga cha.”

⁷Ŵangumfumba, “Viyo chifukwa chine Mosese wangulangula kupaska kalata wa chipata ndi kumpata?”

⁸Watiti kwaku wo, “Po chifukwa cha unononu winu wamtima Mosese wanguzomerezga imwe kupata ŵawoli ŵinu: kweni kutuwa ku mtendeku kuti kwaŵa viyo cha.

⁹Ndipo ndikuneniyani kuti yose yo wangapata muwoli wake, kwambura kuti mpha ureŵi ndi wato munyake, wachita ureŵi; ndipo wakuto wakupatika nayo wachita ureŵi.”

¹⁰Ŵasambizi ŵamunene, “Asani che viyo chifukwa cha munthu ndi muwoli wake; iku kuti nkhwamampha cha kuto.”

¹¹Kweni iyo wanguŵanene, “Kuti wose ŵangaronde mazu yagha cha, kweni kwaku ŵeniwo pe kwapaskika.

¹²Chifukwa ŵalipo ŵamthenu, wo ŵanguŵa viyo ku chibali cha ŵanyinau: ndipo ŵalipo ŵamthenu wo ŵangutheneka ndi ŵanthu, ndipo ŵalipo ŵamthenu wo ŵangujithena pa chifukwa cha ufumu wa kuchanya; wakuŵa ndi nthazi kuronde, waronde.”

¹³Sono kungumtoleke twana, alinga kuti waŵike paku to manja ghake, ndi watiombe: ndipo ŵasambizi wo ŵanguŵachenya.

¹⁴Kweni wanguti Yesu, “Tirekeni twana, mungatukanizganga cha kuza kwaku ine; chifukwa ngwa twaviyo ufumu wa kuchanya.”

¹⁵Ndipo wati waŵikapo manja paku to, wangutuwako.

¹⁶Ndipo yumoza wanguza, ndi wamunene, “Muwomba, ndichitenge chamampha chauli, mwakuti ndiŵe ndi umoyo wamuyaya?”

¹⁷Kweni iyo wanguti kwake, “Chifukwa chine mufumba ine pa chamampha cho? Walipo yumoza wamampha. Kweni asani ukhumba kusere mu umoyo, sunganga marangu.”

¹⁸Wali kwaku iyo, “Nagha?” Yesu wanguti, “Ungabaya, ungareŵa, ungaba, ungatiya ukaboni utesi,

¹⁹tumbika ausu ndi anyoko; ndipo wanjenge munyako uli ndiwe wamweni.”

²⁰Jaha lo linguti kwaku iyo, “Ghose yagha ndikusungirizga: ndeche kupere chine?”

²¹Wangumnene Yesu. “Asani unkhumba kuŵa wakukongora, kanga, kasaske vyo we navyo, paska ku ŵakavu, ndipo uŵenge ndi mbiku kuchanya; ndipo zanga, rondo ine!”

²²Kweni jaha lo, lati lavwa mazu gho linguruta lachisungu ukongwa; chifukwa lenga ndi usambasi unandi.

²³Ndipo Yesu wanguŵanene ŵasambizi, “Nadidi ndikuneniyani, nkhwaunononu msambasi kusere mu ufumu wa kuchanya.

²⁴Ndipo so ndinene imwe, nkhuyuyu ku gamila kuporota mu mphowozi ya zingani, kwakuruska ku msambasi kusere mu ufumu waku Chiuta.”

²⁵Ndipo ŵachivwa ichi wasambizi ŵanguzizwa ukongwa, ŵakuti, “Ipo njani waziŵa kutaskika?”

²⁶Kweni Yesu pakuŵalereska wanguti, “Ku ŵanthu kuti nchamachitika cha ichi, kweni kwaku Chiuta vyose vyamachitika.”

²⁷Sono Petro wakwamuka wangumnene, “Awonani, ifwe tasiya vyose, ndipo takurondoni; na tiŵenge ndi chine ifwe?”

²⁸Yesu wanguŵanene, “Nadidi ndikuneniyani, kuti imwe mwaŵakundirondo, mu charu chifya cho penipo Mwana wa munthu wajenge pa chitengo cha unkhankhu wake, namwe so mwazamuja pa vitengo chumi ndi viŵi, ŵakweruzga mafuku chumi ndi ghaŵi ghaku Yisraele.

²⁹Ndipo yose yo wasiya zinyumba, pamwenga ŵabali, ŵazichi, wiske, nyina, ŵana pamwenga vyaru, pa chifukwa cha zina langu, wamronde mbwerezga ya machumi pe chumi, ndipo waharenge umoyo wamuyaya.

³⁰Kweni ŵanandi ŵakudanga ŵaŵenge ŵakumariya, ndi ŵakumariya ŵakudanga.